Read BORANA BIBLE – KITAABA WAAQA 1 Makabayo 7 Bible Online

1 Makabayo 7 - BORANA BIBLE – KITAABA WAAQA bible

1 Makabayo 7

¹Ganna 151 Demetrioni ilmi Seleuko dira Rumiti bahe nama diqa tokooni woliini kae dira afaani galaanati d'ufe, achiti hayyu ufi tolche.

²Ato inni mana hayyoota ababoota isaati deemuti jiru askartini Antioko shaneesotifi ta Lisia isa qabde, fulla Demetrio geesu feete.

³Demetrioni dubbi suni d'ageennaani anini fuula worrale argu infuud'u natiini ind'ufina jed'e.

⁴Duuba akanani askartini worra fit'e Demetrioni hayyuma fud'ate.

⁵Jennaani Yahudini aadafi Seera Waaqa injabeesine ka Alkimuni nami qaallu gudda tau fed'u iti mataa, kaani gara Demetrio d'aqani,

⁶Yahudi d'ibi himatani waan jed'ani Yudafi oboleyaani isaa yayu goli tante ch'ufa fit'ani, nule lafa teenna keesa gussani.

⁷Mali nu sii d'oomnu kana nama atini d'ugefatu ergi, aka inni d'aqe, waan keennafi ka lafa hayyu ta balleesani laale, Yudafi oboleyaani isaatifi goli isaa ch'ufa gaargalchu.

⁸Hayyichi nama mala isaa d'au toko ka Bakide jed'ani, ka lafa galaanani gamati guddaa fohate. Inni lafa hayyuuni fidu keesati guddo gurra qaba ammalle hayyuuni guddo isa d'ugefata.

⁹Duuba isa namicha Waaqa imbeenne ka Alkimu jed'ani ka hayyuuni qaallicha gudda tolcheeni woliini ergani Yahudi haalo baafad'i jed'anini.

¹⁰Worri Antiokia kae duula guddaani Yudea d'ufe. Bakideeni Yudafi oboleyaani isaa nagaya woliini tolfanna jed'e sobe.

¹¹Ammo Yudafi oboleyaani isaa duula gudda muumme inqamne ka worri d'ufeeni agaraani qonqo iti ergani taani d'ugefachu didani.

¹²Gumiini jara Seera beekhu toko gara Alkimutifi ka Bakide d'ufte aka d'uga lafa keesati tolchani worra kad'ate.

¹³Jari Hasidimu jed'ani kunini worra qara ka Yahudi keesa Alkimufi Bakide d'aqe nagaya woliini tolfanna jed'eeni.

¹⁴Worri Alkimu d'ugefate, waan jed'e qaalluuni d'aloota Haruni ya askarti woliini d'ufe amma woma nu intolchu.

¹⁵Inni dubbi nagaya worraani dubbate kakhate waan worraani jed'e, Nu isanifi jaallowani teesanile intunnu.

¹⁶Jennaani worri dubbi isaa d'ugefate; ammo inni worra nama jaatama qaqabe guyyuma suni fit'e. Akuma t'aafini jettu:

¹⁷ D'iiga jara kanke ka si d'ugefatu jissani, reefa worraa Yerusalemu keesati firfirsani nama worra awaalulle d'abani.

¹⁸Wonti kunini ch'ufti taanaani, nami ch'ufti worra kaani lamaani aka male sodaatani, waan woliini jed'ani, worri kunini nama diqole d'uga gula deemuniti. Worri kakhu kakhate ammo eege kakhu suni guutu dide!

¹⁹Bakideeni Yerusalemu kae Betezaiti qubate. Inni Yahudi gari ta aada ufi jabeesitu qaqabe ta garile ta aada ufi lakifte isati galte qaqabe. Worra ch'ufa fit'e, boola qile tokoti d'abbe.

²⁰Bakideeni finna lafa harka Alkimuti kenne askarti isaa qarqaartule lakisefi, ammo ufi hayyuti deebie.

²¹Jennaani Alkimuni kara ch'ufaani guddo iti game qaallicha gudda ufi tolchu fed'e.

²²Duuba nami lafa suni keesa wo yaku fed'u ch'ufti goli isaa tahe, lafa Yudea qabe. Worri finna lafa Yudea harka ufiti deefate, Yahudile guddo gaargalche.

²³Yudani aka gaargali Alkimufi jari isaa lafaani d'ufe, gaargala worri gosa d'ibi kaani lafaani d'ufe ira hama arge.

²⁴Jennaani lafa Yudea ch'ufa keesa mare, nama goli Alkimu tahe ch'ufa haaloo baafate, dira keesale alati bau d'owe.

²⁵Alkimuni aka Yudafi jari isaa jabaate haga duri ira irre horate arge, ammalle aka inni dandae worra dura inejine hubannaani, hayyuti deebie waan hamtuni worra himate.

²⁶Jennaani hayyichi namicha guddo gurra qabu ka Nikano jed'ani toko ka guddo Yahudi jibbu beeni worra hobaasi jed'eeni.

²⁷Nikanoni askarti heddu fud'ate Yerusalemu d'ufe, qonqo nagaya Yudafi oboleyaani isaati erge, sobu fed'e, waan jed'eeni,

²⁸Anaafi isani woraani womatu jiddu teenna injiru, anini nama diqa toko fud'ad'e d'ufe nagaya isani fuud'e woliini haasomna.

²⁹Duuba inni fulla Yuda d'ufe nagaya wolfuud'ani; ammo hojja suni jari isaa kaani kurfo jira aka Yuda qabe yauni.

³⁰Yudani aka Nikanoni mala d'aate isa qabisa d'ufe hubannaani, ufi sodaate waan jed'e, Anini nama kana deebie argu imfed'u.

³¹Nikanoni aka mala isaa kaani beekhaani hubannaani, Yerusalemu kae Yudani Kafesalamati woli had'u d'aqe.

³²Jara Nikano nama haga d'ibba shani fit'ani, duuli isaa ka hafeleni baqate maneeni jajabdu Yerusalemutini bahe.

³³Eegi suni Nikanoni gaara Sioni d'aqe, jennaani qaaloleeni gari Mana Waaqa keesa yaate, jaarole gumi ta gari ufi gula fud'ate Nikanoni nagaya fuud'iti fuula keesa yaate, ammalle sorio gubani ta maro hayyuti jed'ani baasani isa agarsiifte.

³⁴Ammo inni worra goyeese, miid'e hanch'ufa iti tutufe t'ureese balleese, aka male iti kiyyibe,

³⁵dallane worrati kakhate waan jed'eeni, Yo Yudafi askartini isaa harka nati kennachu baate, anini eegi nagayaani dabsad'e gale Mana Waaqa kana gube balleesa duuba inni dallane kae iti d'aabate.

³⁶Jennaani qaaloleeni gara naabo Mana Waaqa d'at'e, waan sorio irati baasanifi Mana Waaqale fuula iti deefate ejaanjite Waaqa kad'ate boote waan jette,

³⁷Ee Aabbo Waaqa, atini Mana kana fohate, maqa keetini yaamte fulla gumiini tante wolti baate si kad'atu tolchite.

³⁸Amma nama kanaafi duula isaa haalo baafad'i, woraanani hobaasi. Aka worri waan hamtu dubbate si arabse qaabad'i, tokole hafu d'owi balleesi.

³⁹Nikanoni Yerusalemu bahe Beth-Horiniti gabunaani duuli Shamu isati darame.

⁴⁰Duuba gaafasi Yudani nama duula ka kuma saditini Adasati qubate, achiti Yudani Waaqa kad'ate waan jed'e.

⁴¹ T'aafi keesati waan jed'ani, gaafa hayyichi toko nama si arabsu siti erge si arabse, malaikaani tante hojuma suni askarti isaa nama kuma d'ibbaafi saddeetami shani ira fit'e.

⁴²Amma akasuma duula nu had'u fed'u kana hobaasi aka nami ch'ufti aka Nikanoni waan Mana kanke qulqullo arabsefi gaargala argate beekhu. Maro ch'ubbu isaatifi waan isaa male kennifi.

⁴³Duuli sunini guyya kud'ani sadeeso ka jia Adari jed'aani wolhad'e, duula Nikano dabsatani. Had'iisa suni keesa nami qara ijeesani Nikano;

⁴⁴askartini isaa aka inni due arginaani woraana lafati d'abbite kaate baqate.

⁴⁵Yahudini guyya suni ch'ufa gussite, Adasaa reebde Gazarani baafte. Akuma reebanini magalata d'aani

⁴⁶ollowaani Yudea ta d'aatu ch'ufa keesa nyaapa baqa yau moga ch'ufa haate. Akanani nyaapi sunini waan tau d'abe Yahudi worra reebdu taani ira dachae, akasini ch'ufti woraana keesati hobae, tokoleeni ka fiige injiru.

⁴⁷Yahudini waan worraa ch'ufa saamate, mataafi harka Nikano mirgicha ka inni olqaqabe kiyyibuuni ira kute, mataafi harka suni dira Yerusalemu alati biyya garsiisani.

⁴⁸Duuba Yahudini guyya suni aka male gammade; guyya jila tolfate,

⁴⁹guyya kud'ani sadeeso ka jia Adari jed'aani woli galte ganna ch'ufa keesa jila tolfate.

⁵⁰Akanani bulti diqo toko lafa Yudea keesa nagaya argatani.