Read BORANA BIBLE – KITAABA WAAQA 1 Makabayo 9 Bible Online

1 Makabayo 9 - BORANA BIBLE – KITAABA WAAQA bible

1 Makabayo 9

¹Demetrioni aka Nikanofi duula isaa hobaasani d'ageennaani, inni ammalle Bakideefi Alkimu lafa Yudati erge, duula worra Shamu woliini.

²Worri kara Gilgali gula iti d'aabate, dira Mesalothi ka lafa Arbela marse, dabsate qabe nama heddu fit'e.

³Jia qara ka ganna 152 worri d'aatu Yerusalemuti qubate.

⁴Duuba arti kae askarti miilaani yaatu ta kuma diddamatifi ta farda nama kuma lamatini dira Berea d'aqe.

⁵Yudani qara Alasa nama kuma sadii ka ch'ufti waan woraana guddo beekhuni qubate.

⁶Ammo worri duula gudda muumme inqamne ka nyaapa arginaani mudame, nami hedduuni baqate, nami d'ibba saddeeti ch'allaani hafe.

⁷Yudani aka duuli isaa baqachuti jiru ammalle aka nyaapi diquma hirba iti inkachisini arginaani aka male lubbuuni d'ufte, wonti akanatiifi hojaani inni duula ufi wolti deebisu injirtu.

⁸Inni waan tau wollaale ammo waan worra isa woliini hafeeni jed'e, Had'iisa kurfefad'a, hegeri worra kana indabsanna faa.

⁹Askartini isaa waan isaani jette, Laki indandeennu, nu irre inqamnu, baqanne lubbu teenna baamna, duuba eege yo nama d'ibi arganne dachaane haana, nu amma nama inqamnu.

¹⁰Yudani waan jed'eeni, Nami Yudaani ya nyaapa baqate injed'ini. Yo guyyaani keenna gae, gosa teenna ta Yahuditi jenne aka janna doone, gurra keenna dansa badi d'owara.

¹¹Duuli askarti Shamu gadi bahe aka Yahudi had'u kurfefate. Askarti fardoni yaatu fulla lamati gargari qoodani, askarti jajanna dura aansani, ammo askarti t'iyaatifi worri gulubaani nama had'u askarti taani ch'ufa dura dabre,

¹²Bakideeni ufi gama mirga eje, askartini miila ta askartini farda moga lachu jirtu durati yaate, magalata hobaatile d'aani. Askartini Yudaleeni magalata ufi d'oofte.

¹³Duuli sunini lamaani wolti baafate lafa chochose haga diirama iti keeyatani haga galgalee wolhad'ani.

¹⁴Yudani aka Bakideefi irreeni duula Shamu ch'ufti gara mirga jirtu arginaani, jari isaa jajanni ch'ufti isati darame.

¹⁵Worri duula Shamu ka gama mirga dabsate haga hunda gaareeni reebe,

¹⁶ammo worri Shamu aka gama bitaa aka duula worraa ka mirga dabsatani arginaani, gargale Yudafi askarti isaa dudda duubani had'e.

¹⁷Had'iisi aka, male jabaate gama lachu guddo nami keesa hobae.

¹⁸Eege Yudale ijeesani, jennaani jari isaa ka hafeleni baqate.

¹⁹Yonathanifi Simionini reefa oboleesa isaani fuud'ani ireesa worra isaani ka Modiniti awaalani.

²⁰Achiti fulla awaala suniti isaa bohani. Nami Israeli haga bulti hedduu laalefate isaa bohe waan jed'e:

²¹Janna keenna ka nu baasu ya ijeesani d'uguma dandeenne iraa inhamna?

²²Waan Yudani tahe, had'iisa inni nyaapa had'e taanaani jannooma isaa taanaani waan gurraa heddu inni tolche, taanaani dandaani t'aafani keesa imbaani.

²³Yudani doanaani worri seera injabeesine kaani lafa Yudeati dachae, worri ch'ubbichileeni ch'ufti deebie.

²⁴Ammalle gaafasi oollaani hamtuni d'ufte nami ch'ufti goli worra hamama kaani tahe.

²⁵Bakideeni worra Yahudi ka aada ufi lakise ka gari gugurda lafa suni tolche.

²⁶Jari kunini jaallowani Yuda ch'ufa barbaade qaqabe Bakidetini d'ufe. Duuba inni worra gaargalche iti tabate aka male ch'eerse.

²⁷Bari sunini guddo bara gaargala hama worra Israeliti. Wonti akasi hamtu bara raagoota lafaa d'abani kaani male taka lafa Israeli keesati imullanne.

²⁸Duuba jaallowani Yuda ch'ufti Yonathaniti ga d'ufte waan jetteeni,

²⁹Haguma oboleesi kanke Yudani due, nami aka isaa ka nu dura deeme nyaapa keennafi Bakideefi nama gosa teenna ka nuni morku nura had'u injiru.

³⁰Tanaafi nu arra si fohanna aka atini fulla isaa nu fidde abba duula taate nyaapa nura haatu.

³¹Jennaani Yonathani, aka gudda worraa tau ee jed'e fud'ate fulla oboleesa isaa Yuda fud'ate.

³²Bakideeni dubbi tana d'ageennaani aka Yonathani ijeesu garaa kutate.

³³Ammo Yonathanini d'ageennaani, oboleesa isaa Simionifi jara isaa fud'ate lafa aloo ta Tikoati baqate, d'aatu haro Asfariti qubate.

³⁴(Bakideeni odu tana guyya Sabato d'ageennaani duula ufi ch'ufa fud'ate galaana Yordani iti taake.)

³⁵Yonathanini oboleesa isaa Yohana ka worra askarti qorqoratu gara gosa Nebayothi ta worri guddo wold'agauni erge waan jed'eeni, fulla nu miha keenna iti olkeeyannu nu keenna.

³⁶Ammo worri Jambiri Madeba d'ufe Yohana had'e isa boojie miha kaani ch'ufa saamate.

³⁷Eegi suni Yonathanifi oboleesii isaa Simionini aka worri Jambiri jila fuud'a jabdu tolchu fed'u d'agayani, ammalle aka worri intala fuud'ani dira Nadabathi keesaa fuud'e yaunile d'agayani Intalti fuud'ani suni dubra namicha gudda toko ka gosa kanaani.

³⁸Yonathanifi Simionini qara haalo oboleesa isaani Yohana ka qara ijeesani baasu fed'ani, tanaafi worraafi jari worraa gaara toko korani achiti d'okhatani.

³⁹Ato taani aka worri d'ufu eeganu, gumi guddo miha guddaani yaatu ta ufuma d'uqisa yaatu, argani, namicha intala fuud'ufi jaallowani isaatifi fiit'ani isaaleeni, worra intala fuula keesa yaani. Worri woraana jaba qaba, ammalle dibbeefi miha sirba d'aanani sirba yaani.

⁴⁰Yahudini fulla iti d'okhatu taani gadi baate nama heddu fit'e, nami hafe gaareeniti d'eete, ammo Yahudini waan worra ch'ufa boojite.

⁴¹Duuba akanani guyyaani fuud'a guyya boha tahe sirbi gammada faaru boha tahe.

⁴²Yonathanifi Simionini haalo oboleesa isani ka ijeesani baafatani jennaani kaani ch'afa lafa ta afaani galaana Yordaniti dachaani.

⁴³Bakideeni dubbi tana d'ageennaani guyya Sabato afaani galaana Yordani duula guddaani d'ufe.

⁴⁴Yonathanini waan jara isaatini jed'e, D'iiro kakaa, lubbu teenna jenne nyaapa ufira d'owara. D'iba taka nu inarginiiti arra nu qabate.

⁴⁵Nyaapi nu dura jira galaanati nu duuba jira mirgafi bita teenna ch'afafi danqarati marsa aka baanu inqamnu,

⁴⁶amma Aabbo Waaqa kad'ad'a, aka inni harka nyaapa keenna jalaa nu baasu.

⁴⁷Had'iisa hirba wolti kaasani, Yonathanifi jari isaa ka diquma Bakide inijeesini inni askarti dudda duubati d'eete akasini lubbu bahe.

⁴⁸Yonathanifi jari isaa galaana duude, daakhate gama kaaniti take baqate. Ammo duuli Ashuru galaana taake worra inreemne jalaa hafe.

⁴⁹Guyya suni nami Bakide ka due nama kuma toko inga.

⁵⁰Bakideeni Yerusalemuti deebinaani, worri Shamu dira Yudea heddu maneeni jajabdufi naabo d'ed'eertu iti jaare fullo sibiilaani ch'ufaani iti ch'ufe: Emau, Beth-Horoni, Besheli, Timnathi, Pirathoni, Tefonifi maneeni jajabdu Yeriko.

⁵¹Dira kana ch'ufa keesa Bakideeni askarti Yahudi gaargalchitu iti galche.

⁵²Ammalle inni maneeni jajabdu Bethsuritifi ta Gazaratifi ta Yerusalemule jabeese jaare. Inni askartile keesa kaye woreega worri sooratule achiti olkayefi.

⁵³Duuba inni ilmaani jaarole gugurdo lafa suni ch'ufa qaqabe, maneeni jajabdu Yerusalemu keesati hid'ani hid'e.

⁵⁴Jia lameeso ka ganna 153 qaallichi guddaani Alkimu jed'ani, Girgida naabo Mana Waaqa ka keesa ch'absa jed'e, wonti inni jed'e kunini sila yayu waan raagi duri jed'e kaani balleesite ammo akuma huji suni iti keeyatanini

⁵⁵onneeni isaa ch'ite, duuba huji suni lakisani, inni kokotae afaanilee banachu dad'abe, akasini worra isaaleeti d'aamachu hanqate.

⁵⁶Inni aka hama gaargale due.

⁵⁷Bakideeni aka Alkimuni due d'ageennaani gara hayyu Demetrio deebie. Suni gula lafti Yudea haga ganna lama nagayaani teete.

⁵⁸Jennaani worri aada ufi lakise kaani wolti bahe waan jed'e, me ilaala Yonathanifi jari isaa kaani ch'ufti nagayaani taani. Yo nu amma tana Bakide armaani d'umne inni halkanuma toko worra qaqaba.

⁵⁹Duuba worri kae Bakide d'aqe, waan suni mala woliini d'aatani. Duuba

⁶⁰inni askarti heddu fud'ate kae duule. Inni tatabe d'ossaa goli isaa ta Yudea keesa jirtu ch'ufati erge Yonathanifi jara isaa qaqaba jed'e, Ammo wonti sunini intaane, wonti akanatiifi mala worra duratu beekatani.

⁶¹Yonathanifi jari isaa nama shantama ka gosa ufi mormate mala suni abba iti tahe, qaqabe fit'e.

⁶²Duuba Yonathanifi Simionifi duuli worra Beth-Basi ta lafa alooti dachae, maneeni jajabdu dira suni ta qara ch'absani jaare.

⁶³Bakideeni waan kana ch'ufa d'ageennaani duula ufi ch'ufa wolti baase worra isaa ka Yudea jiru qonqo iti erge.

⁶⁴Inni Beth-Basi moga ch'ufaani had'e, waan ira ejaanjani dira had'ani jaarate; had'iisi d'eerannaani,

⁶⁵Yonathanini dira suni keesa nama diqa toko fud'ate bahe, oboleesa ufi Simioni dirati lakise.

⁶⁶Inni namicha Odomera jed'anifi gosa isale dabsate, ilmaani Fasironilee waaro isii keesati fit'e. Eegi dabsatani worri sunini Yonathaniti darame isa woliini Bakide had'u d'aqe.

⁶⁷Ammalle Simionifi jari isaa dira keesa orie, waan ira ejaanjani dira had'ani kaani gube,

⁶⁸lola suni keesati isa guddo mudamsiisani, mali inni d'aateleeni ch'ufti bade isale dabsatani.

⁶⁹Inni Yahudi ta aada ufi lakifte lafa Yudea, Kooti jette isa yaamte guddo iti dallane, heddu fit'e. Jennaani Bakideeni gala kae,

⁷⁰ammo Yonathanini odu tana d'ageennaani, nama gara isaa erge, aka nagaya dubbatani nama Yahudi ka qara qaqabani kaani gadi d'isaani.

⁷¹Bakideeni dubbi Yonathani gula gale, ammalle aka ituma deebie Yonathani haga inni jiru ch'ufa intunne iti kakhate.

⁷²Inni jara qaqabani kaani gad'iise lafa worrati galche ufi kae lafa ufiti gale, ituma deebie lafa Yahuditi indebine.

⁷³Akanani woraani lafa Yahudi keesa bade. Yonathanini Mikmashiti qubate, biyya fide, jara Yahudi ka aada ufi lakise kaanile lafa Israeli keesa balleese.