Read BORANA BIBLE – KITAABA WAAQA 2 Makabayo 10 Bible Online

2 Makabayo 10 - BORANA BIBLE – KITAABA WAAQA bible

2 Makabayo 10

¹Yuda Makabayotifi jari isaa qarqaarsa Aabbo Waaqatini Mana Waaqatifi dira Yerusalemu nyaapa keesa baasani deefatani.

²Worri waan sorio irati baasani ka nyaapi gabaya keesati jaare ch'ach'abse, fulla worri jaare waaqa iti kad'atu ch'ufa balleese.

³Worri Mana Waaqa qulqulleese waan sorio irati jaarani d'ibi jaare. Duuba worri d'akha woliini d'ae, ibidi keesaa, bahe jennaani ibida suni bobeese sorio haga ganna lama taka imbaasini baase, hit'aana aarse, ifseele bobeese, qit'a woyyumale Waaqa baase.

⁴Eegi waan kana ch'ufa tolchani worri lafati gajed'e Aabbo Waaqa kad'ate aka inni deebie gaargala akana kana worratini ind'umne, ammalle worri nu nahi, hojja atini taka tana maro daba keennati jette nu gaargalchitulle, harka worra hama si imbeenne ka gosa d'ibi suniti nu inkennini jed'e kad'ate.

⁵Guyya diddami shaneeso ka jia Kislevu jed'ani, guyyuma Mana Waaqa gochiti d'ibiini t'ureesite, worri Mana Waaqa qulqulleese eebise.

⁶Worri bulti saddeeti gammadaani jila tolfate akuma jila Hoosa. Worri qara fulla jila Hoosa tolfatu aka bineensa ala gaareeni gubba mare godati gale ammo aka d'io tana gaargala suni keesa bahe qaabata.

⁷Ammo amma tana worri damele meet'itifi ule gaaleeni barreesani guurate, lafa mare Waaqa ka huji qulqulleesa Mana isaa eebise faarse sirba yaa.

⁸Nami ch'ufti woli gale aka gochiti Yahudi ch'ufti jila tana ganna ch'ufa tolfatu buufate.

⁹Guyyaani Antioko Epifane ya ala hobae.

¹⁰ Amma tana nu waan ilma isaa ka waaqa imbeenne toko ka Antioko Eupatori jed'ani himne waan woraani inni lafaani d'ufe nama tolche gabaabdu gula odeesina.

¹¹Inni hayyu taanaani namicha Lisia jed'ani toko fohate, gudda nama finna lafa harka qabutifi nama gudda arda Koele-Shamu tolche,

¹²fulla Tolemayo Makroni, nama serikala gudda ka qara Yahudi nahe. Makronini aka dansa nagayaani worra woliini tae, aka inni akasini gaargala worri qara argate keesaa bahe gammadu.

¹³Waan sunifi jaallowani hayyu gara Eupatori d'at'e. Makroni himate, waan inni lafa Kipro ta jiddu bisaani jirtu, ta hayyuuni Misiri ka Filometo jed'ani harka isati yalabahe, kae goli Antioko Epifane taefi. Yo d'uguma dubbatani, Makronini sunini nama gosa ufi balleesu jed'ani. Inni huji ufi keesa, nama isaa saalfatu d'amnaani had'a d'uge ufi ijeese.

¹⁴Gorgiani gudda Idumea taanaani, askarti bitate, yo dagu iti argatu ch'ufa Yahudi had'e.

¹⁵Tana malele, worri Idumea, ka fulla jajabdu nyaapa iti ufira d'owani qabu, hojja ch'ufa Yahudi had'e gaargalche. Worri nama Yerusalemu keesa baqate ch'ufa fud'ate goli tolfate, haga dandau ch'ufa woraana lafa keesa bau d'owe.

¹⁶Jennaani Yuda Makabayofi jari isaa Waaqa nu qarqaari jed'e kad'ate, orie fulla jajabdu nyaapani ufira d'owani taani had'e.

¹⁷Worri nama naabo nyaapa ira d'owu dabsate, fulla jajabdu suni qabe, nama arge ch'ufa fit'e, nami gaafasi hobaasani nama kuma diddama

¹⁸Ammo taatule nyaapa nami kuma sagali, fulla jajabdu nyaapa iti ufira d'owani lamati baqate; fullaani sunini waan nyaapani ufira d'owani ch'ufa inqabdi.

¹⁹Yudani fulla d'ibi ta isa fed'anifi d'aqe, ammo Simionifi Yusufufi Zakayofi jara isaa woliini achiti lakise. Askartini tunini guddo, dandeete dira marsiti,

²⁰ammo jari Simioni hagi toko sabdae, qarsi kilo jaatami afuritini gumbeesani jennaani, nyaapa suni haga toko aka inni fulla jajabdu suni keesa baqatu iti lakise.

²¹Yudani waan tahe d'ageennaani, jara askarti isaa gugurda yaame, waan jed'eeni isani nyaapa gargale oboleyaani teesani had'u galakiftani, akasini oboleyaani teesani gurguratani.

²²Duuba inni jara gosa ufi gurgure suni fit'e, hojuma suni fulla jajabdu suni lamaani qabe.

²³Yudani lola keesa hojja ch'ufa nyaapa dabsata, ammalle gaafa fulla jajabdu marse had'e nama kuma diddama ira jiru fit'e.

²⁴Timotheoni ka Yahudini qara dabsate askarti heddu bite, askarti fardaani yaatu ta lafa Asiale wolti baase, amma Yudea had'e balleesu d'ufe.

²⁵Ammo ato duuli nyaapa gadi d'ufuti jiru Yudafi jari isaa Waaqa kad'ate worri ch'arqi naqate biyye matati ufi naqe.

²⁶Faano waan sorio irati baasaniti jijibsate, aka Waaqi akuma Seera isaa keesati kakhate, kalcheefi nyaapa worra ira had'u kad'ate.

²⁷Kad'atani ira dachanaani, woraana wonte ufi guuratani, dira Yerusalemu ira fagaatani, nyaapa jala gaani bulani.

²⁸Lafti bariinani duuli lachu wolti bahe wolhad'e. Duuli Yahudi jannooma ufitifi Aabbo Waaqa d'aabate, ammo nyaapi worraa irreefi jannooma ufi ch'alla heregate.

²⁹Loli owe jennaani nyaapi kaani nama shani ka fuula qaqajeela ka farda lugama worqi qabu gulufu ka duula Yahudi dura yau arge.

³⁰Jari kaani shanani Yuda marse woraanafi wonte ufi guurate nyaapa ira d'owe t'iyaafi waan aka qawe waaqa iti buuse. Duuli nyaapa kaani bakhakhe, mumudame waan tahu wollaale gargari baqate; jennaani Yahudini

³¹goraadeni askarti miilaani yaatu nama kuma diddamatifi d'ibba shanitifi askarti fardaani yaatu nama d'ibba jaa fit'e.

³²Timotheoni maneeni jajabdu Gazara, fulla oboleesi isaa Kaereani askarti iti matati ufi baqate bahe.

³³Yudafi jari isaa haga guyya afuri ch'ufa maneeni suni marse garaa tokooni had'e.

³⁴Ammo jari keesa jiru jabeenna mana suni abdate Yahudifi Waaqa worrale aka taka inargini arabsani waan ch'ufa jed'anini.

³⁵Lafti bariinani, jari Yuda nami diddama, ka maro araba kaaniti dallansu injire, garaa jabaate naabo d'akha taani kore ka gugubatu garaa hameennaani nama fuula keesa d'ufu ch'ufa goraadeni fit'e.

³⁶Hojuma suni jari d'ibileeni naabo mana kaani ibida iti kae gube. Ibidi mana qabannaani jari nyaapa hedduuni hobae. Jari d'ibileeni balbala fullo ch'ach'abse jara Yuda ka gadi hafele kara tolcheefi olnaqe akanani dira suni dabsatani qabani.

³⁷Timotheoni eela toko keesati d'okhate, ammo isaafi oboleesa isaa Kaereafi Apolofanile fit'ani.

³⁸Waan kana ch'ufa tolchani dabrani, jennaani Yahudini sirbafi faaru d'aate Aabbo Waaqa, ka guddo worra nahe nyaapa worra dabsachiise galata deebifte.