Read BORANA BIBLE – KITAABA WAAQA 2 Makabayo 11 Bible Online

2 Makabayo 11 - BORANA BIBLE – KITAABA WAAQA bible

2 Makabayo 11

¹Timotheo dabsatani diqo wobubulani, namichi Lisia jed'ani ka fiit'a hayyu ka duri isa guddise, ka ammalle finna lafa gula hayyuti aanu waan tahe kana d'agaye. Jennaani dallane

²askarti miilaani yaatu nama kuma saddeetamatifi askarti isa ta fardaani yaatu ch'ufa fud'ate aka dira Yerusalemu gargalche dira Griki tolchu, Yahudi had'u d'aqe.

³Akasini Mana Waaqale akuma maneeni gochiti d'ibiini waaqa iti kad'atu damoosa iraa fuud'ani, nami hori guddo nama ch'ufa ira baasu huji qaallicha gudda argata.

⁴Lisiani askartini isaa ta miilaani yaatu ta kuma hedduutifi askarti fardaani yaatu ta muumme inqamneefi arba saddeetama maachinaani jabeenna Waaqa qulqulluma ded'e.

⁵Inni lafa Yudea seene dira Beth-Suri, ka maili diddama ka Yerusalemu bita had'e.

⁶Yudafi jari isaa aka Lisiani maneeni worra jajabdu marse had'uti jiru d'ageennaani gumi worraa ch'ufa woliini bohani, Ee Aabbo Waaqa malaika dansa ta nu baaftu nuu ergi nu baasi jed'ani kad'atani.

⁷Yudani nama ch'ufa durati woraana ufi guurate. Jara isaaleeni waan jed'e, D'iiro koota gosa teenna ta Yahuditi jed'a lubbu teesani jibbaad'a nyaapa had'a. Akasini garaa tokooni wolqabatani iti d'abatani.

⁸Ammo ato Yerusalemu ira infagatinu nama toko ka miha lola ka worqitifi woya adi qabu ka worra dura deemu argani.

⁹Hojuma suni worri ch'ufti Waaqa ka naasu qabu galata deebise; inni jannooma ka namaani had'ani ch'alla inkenninefi ammo ka bineensa hamaafi yokhaani naabo sibiila guraachani jaaranini had'anile kenneefi.

¹⁰Akasini lola kurfefatani, ka namichi Aabbo Waaqi naasu isaatini aka inni worraa kalchu erge ka innileeni worraani woliini jiru yaani.

¹¹Jennaani akuma nyeench'a nyaapa kaanti baafatani, askarti miilaani yaatu nama kuma kud'ani tokotifi askarti fardaani yaatu nama kuma tokotifi d'ibba jaa fit'ani ammalle worra iraa hafele bassani balleesani.

¹²Worra baqate suni keesa nama heddu qara mamadeesani woraana worrale keesa baasani. Lisialeni aka daafanaa d'eete akasini lubbu bahe.

¹³Lisiani daalluma inqabu. Inni aka isaa dabsatani kaani herege, jennaani aka Waaqi guddaani Yahudi kalcha bue, nyaapi worra indabsanne arge. Duuba inni qonqo Yahuditi erge,

¹⁴aka kara d'ugaatini nagaya wolti buufatani sobate, ammalle aka hayyule garaa worrati mid'aasu kakhateefi.

¹⁵Yuda Makabayo waan worra isaati olaani herege, akasini waan Lisiani jed'e kaani ch'ufa ee jed'e, wonti akanatiifi hayyichi dubbi Yudani t'aafe Lisiatini d'ufe ch'ufa yayu ee jed'e.

¹⁶Lisiani akana jed'e tatabe worra Yahuditi t'aafe: Anini Lisiani gosa Yahudi nagaya fuud'a.

¹⁷Yohanafi Absolomoni ka isani ergitani yayu woraqata isani worraani ergitani natiini d'ufani waan nani jed'ani, Dubbi arma keesati t'aafani tana ee jed'i fud'ad'u.

¹⁸Anini waan sila hayyutini d'ufu malani itini d'ufnaani inni waan dandau intolcha jed'e.

¹⁹Yo isani jecha hayyu ira goru didani jabeesitani gula yaatani anini arraa achi aka finni lafa teesani tolu isani tolcha.

²⁰Anini nama kiyyafi keetile aka worri siti d'ufe woliini tetetani dubbi tana keesa keeso isi woliini gaafatani, yayu iti hime.

²¹Nagayati dubbi tana guyya diddami afreeso ka jia Dioskuro jed'ani, ganna 148 t'aafani.

²²Tunini tatabe hayyuuni t'aafe: Anini hayyu Antiokoni obolesa kiyya Lisia Nagaya fuud'a.

²³Maro abbaani kiyya gara waaqoota teenna olgalefi, anini aka gochiti lafa anini fidu keesa jirtu ch'ufti ka namu waan worra keesa imbuune teete waan ufi ufumati tolfatu fed'a.

²⁴Aka anini d'agayeti Yahudini akuma abbaani kiyyaleni qara heregate finna gosa Griki gula yaani infeetu, ammo finna worraa ira jaalate, aka aaduma worraa gula fidamtu kad'ate.

²⁵Maro anini aka worrileeni akuma gosa d'ibi gaargala male lafa anini fidu keesati fidamu fed'ufi, anini amma waan siini jed'u, Mana Waaqa isaani worraa deebisi, worrileeni ha aada ababoota isaani gula fidamaniti.

²⁶Waan atini taatu dubbi tana worrati himi aka anini jaala worrale beesisi, aka akanani worri waan ufi soda male nagayaani tolfatu.

²⁷Tunini tatabe hayyichi gosa Yahuditi t'aafe: Anini hayyu Antiokoni jaarole Yahuditifi gosa Yahudi ch'ufa nagaya fuud'a.

²⁸Nu nagaya qabna isani nagaya qabdu, anileeni nagaya fayya qaba.

²⁹Menebani yayu aka isani worra keesaniti galtani huji teesani tolfachu feetani nati hime.

³⁰Tanaafi isani worri ato guyya sodomeeso ka jia Zanthiko ingahinu galtani soda male taa.

³¹Dandeetani seera keesani ka sagaletifi ka d'ibile akuma duri gula yaatani, ammalle nama Yahudi ka maro wollaalchatifi woyake tokole wollaala iti imurani.

³²Anini Menelao aka inni garaa isani jabeesu isaniti erguti jira.

³³Nagayati. Tatabe tana guyya kud'ani shaneeso ka jia Zanthiko jed'ani ganna 148 t'aafani.

³⁴Worri Rumileeni tatabe tana worra Yahuditi t'aafe: Qinto Memmiofi Tito Manioni, ka worri Rumi erge worra Yahudi nagaya isani fuuna.

³⁵Nu waan namichi fit'a hayyu ka Lisia jed'ani isanii kenne ch'ufa yayu ee jenne.

³⁶Nu amma tana Antiokiati yauti jira, tanaafi waan Lisiani hayyu gaafad'a jed'e ch'ufa aka dansa qorqorad'a. Duuba hurrisa qonqo nu deebisa aka nu waan garaani keesani fed'u ch'ufa hayyuti isanii himnu. Waan kana haga dandeetani ch'ufa.

³⁷Ariifad'e tolcha, aka nu waan isani buufatani beennu.

³⁸Nagayati. Tatabe tana guyya kud'ani shaneeso ka jia Zanthiko jed'ani ganna 148 t'aafani.