Read BORANA BIBLE – KITAABA WAAQA 2 Makabayo 12 Bible Online

2 Makabayo 12 - BORANA BIBLE – KITAABA WAAQA bible

2 Makabayo 12

¹Yahudifi worri Shamu aka nagayaani woliini taani woldubatani buufannaani Lisiani hayyuti deebie, Yahudileeni oobru worra qotiti dachate.

²Ammo jari arda lafa suni ka gari fidu, aka Timotheofi Apolonio ilma Geneo ammalle Demofanoleni nagayaani worra tau d'owani, ammalle Nikanoni ka askarti bitani ta lafa Kiproti d'ufte iti guddaleeni nagayaani tau worra d'owe.

³Gaafasuma worri Yaafaleni Yahudi dira suni keesa jirtu waan hamtu tolche. Worri Yahudi sobe jaala worra ufi fakeese waan jed'eeni, Koota nad'eeni ijoolle teesanini hobolo teenna duuda baariini gubba yaana.

⁴Waan worri dira suni ch'ufa woligale akana malatefi Yahudini waan hamtu keesati insehanne, ammo garaa tokooni ee jetteeni. Ammo galaana keesaa yaani fagannaani worri Yaafa sunini Yahudi d'ibba lama taani ch'ufa bisaani keesa jisse hobaase.

⁵Yudani akuma waan hamtu kana ka gosa isaa ta Yahudi tolchani d'agayeeni yaame jara isati hime.

⁶Waaqa ka d'ugani wo muru kad'atani jennaani worra nama fit'e kaani had'ani. Worri dukana jala fulla hobolooni iti galtu ibida iti kahani hobolo ch'ufa gubani, nama achiti d'okhatu ch'ufa fit'ani.

⁷Balbalti naabo dira suni ch'ufaa qabdi jennaani Yudani keesa deebie; ammo aka taka tana keesa deebie nama dira suni keesa tau ch'ufa fit'u garaa kutate.

⁸Yudani aka worri dira Yamnia Yahudi lafa isaani hobaasu fed'u d'ageennaani,

⁹halkanini Yamnia had'e, hobolofi fulla isiini iti galtulle ch'ufa ibida iti kaye gube. Kayyo ibida suni Yerusalemu ta maili sodoma arti iraa fagoleti inargani.

¹⁰Yudafi jari isaa ka Timotheoni wolhad'u yau Yamnia haga maili toko ira fagaate jennaani, duuli Arafti ka kuma shani ira jiru, ka askarti fardaani yaatule qabu worrati baafate had'e.

¹¹Eegi aka jaba wolhad'ani qarqaarsaa Waaqatini worri gosa gamooji keesa godaantu suni dabsate. Jennaani worri suni gargale aka worra Yahudi nagayaani woliini taani dubbate horile isanii kennine kara d'ibileeni isani qarqaara jed'eeni.

¹²Yudani aka wold'aqisi worraani wold'aqani wobahu arginaani aka nagayaani worraani woliini taani ee jed'e; eegi suni Araftini taani worra ufiti galte.

¹³Ammalle Yudani dira Kaspini jed'ani toko ka naabo isaa guddo jabeesani jaarani had'e. Gochiti achi keesa teetu suni Yahudiniti ammo gosa d'ibi heddu,

¹⁴ta jabeenna naabo dira sunitifi guddinna sagale worri olkeeyate ta ato dira suni guyya heddu marsanile inhobaane d'aabate. Tanaafi Yudafi jara isaa goyeesani, abaarani Waaqa worrale arabsani.

¹⁵Ammo Yahudini Aabbo Waaqa gudda ka lafafi gubba harka qabu, ka bara Yoshua miha naabo dira ta d'akhatini ch'ach'absani male naabo dira Yeriko ch'ach'abse kad'ate. Jennaani naabo dira suni aka jaba had'ani

¹⁶fed'i Waaqa gula dira suni dabsatani qabani. Yahudini nama heddu fit'e akasini galaani toko ka d'aatu suni ka ballinni isaa d'und'uma kuma toko gahu aka waan d'iigani guutame irani dambalae fakaate.

¹⁷Yudafi jari isaa dira Kaspini ira haga maili sagaltami shani yaanaani olla Yahudi ka Karaka jed'ani ka d'aatu dira Tobutini baani.

¹⁸Ammo Timotheo achiti inargine, wonti akasitifi inni qaraa arda suni keesaa deeme. Inni woma toko achiti tolchu dad'abe ammo askarti isaa ta irre jabdu qabdu ch'alla achiti lakise.

¹⁹Worri askarti Yudati mata lama, ka Dositheofi Sosipatro jed'ani askarti lafa suni eedu had'ani nama kuma kud'ani ka achi jiru ch'ufa hobaasani.

²⁰Jennaani Yudani askarti isaa gargari qoode, Dositheofi Sosipatro ta kamu askarti ufi qabdu achiti lakise, ufi Timotheo ka askarti miilaani yaatu nama kuma d'ibbaafi diddamatifi askarti fardaani yaatu nama kuma lamaafi d'ibba shani qabu reebu dabre.

²¹Timotheoni aka Yudani faana isaa d'ufuti jiru d'ageennaani nad'eenifi ijoolle gara dira Karnaimu ka dandaani imarsine, yokhaani ka maro daandini isaani senanileni t'it'ititifi nami akanati iti imbaane, mihaani ufi dura erge.

²²Ammo akuma askartini Yuda hagi toko mullateeni, duuli nyaapa daayya Waaqi waan ch'ufa argu erge arginaani bakhakhe. Mudamsu suni keesa worri wold'ae gara ch'ufa baqate goraaduma ufitini woli mamadeese.

²³Akanani Yudafi jari isaa haga dandaani ch'ufa nyaapa suni reebe nama kuma sodoma gahu keesa hobaase.

²⁴Timotheole askartini Dositheotifi ta Sosipatro qabde. Ammo waan inni malticha hamatifi worra suni sosobe waan jed'eeni, yo isani wo na tolchitani aninileeni fiit'a teesani heddu ta qara qaqabe harka qabu infit'a.

²⁵Eegi inni worra fiit'a isaani ka harka qabu suni nagayaani isani gadi d'isa jed'eeni worrileeni isaa gadi d'ise.

²⁶Eegi suni Yudani dira Karnaimutifi mana waaqa worra ka Atergati jed'ani had'e nama kuma diddami shani fit'e

²⁷diraafi mana waaqa worra sunile balleese. Jennaani inni dira Efroni ka jabeesani jaarani, ka Lisiafi nami gosa ch'ufaa keesa qabatu had'e. Kaimi jajabani naabo dira dura ejaanjate nyaapa ufira d'owa; ammalle dira suni keesa miha lolaatifi woraana muumme inqabne jira.

²⁸Ammo Yahudini AABBO Waaqa ka irre nyaapa ufi balleesu qarqaarsa kad'ate. Duuba worri dira suni dabsate qabe nama kuma diddami shani fit'e.

²⁹Achi kaani hariifatani dira Beth-Shani d'aqani; dira sunini maili torbaatami shani Yerusalemu iraa moga mirgatini.

³⁰Yahudini dira suni keesa jirtu aka worri dira suni worraa dansa, keesuma yo worri gaargala qabu fa worra qarqaaru Yudati himte.

³¹Duuba akanaafi Yudafi jari isaa guddo galata worra suni galchani, akuma kana worra Yahudi kana naha qarqaara jed'anini. Duuba kaani Yerusalemu d'aqani, ka diquma jilti mid'aani murani ingaini achini baani.

³² Eegi jilti muransa ta afaani Grikitini Pentekoste jed'ani dabarte, Yudafi jari isaa yoosu kaani namicha gudda lafa Edumea ka Gorgia jed'ani had'u d'aqani,

³³Gorgiani ka askarti kuma sadii ta miilaani yaatufi d'ibba afuri ta fardaani yaatu qabu worra fuula keesa d'ufe wolhad'ani.

³⁴Had'iisa suni keesa nami Yahudi ka fit'ani diqa.

³⁵Jennaani namichi Yahudi toko ka dira Tobu ka Dositheo jed'ani jabaani, teetu farda, woya Gorgia qabe irre guddooni butte hirkise, aka akasini namicha dabdicha suni jira qabe boojiu. Ammo namichi gosa Thataka ka fardaani deemu toko hariifate Dosetheoti bururate harka ira kute, duuba akasini Gorgiani lubbu bahe kae dira Marisaati baqate.

³⁶Waan Edrafi jari isaa guyya heddu nyaapani wolhad'ani dad'abi qabaniifi Yudani Aabbo Waaqa kad'ate aka inni worraa kalche abba duula worraa tau.

³⁷Duuba Yudani afaani gosa ufitini fokore jara ufi garaa jabeese, jennaani Yahudini Gorgiafi duula isaa dagu haate baqachiifte.

³⁸Jennaani eegi loli hobae Yudani jara isaa dira Adulamuti geese, guyyaani suni boriyyaate guyya Sabato tanaafi worri aada Yahudi gula ufi qulqulleese aada guyya qulqullo suni guute.

³⁹Boriyyaate lafa kaani reefa worra woraani keesati fit'ani, wolti guurani awaala worra isaani keesati awaalani, wonti akanatiifi hujini sunini waan hurre tolchu malani.

⁴⁰ Ammo worri reefa worra suni ch'ufa akheekha didiqa waaqoota Yamnia keesati kad'atani woya worra keesati argani, akheekha waan akasi suni Yahudini aada gula keeyachu himmalle, akanani nami ch'ufti waan worra kana fit'anifi beekhe.

⁴¹Duuba worri Aabbo Waaqa, ka d'ugaani wo mure waan d'ossani diidati mullisu faarse, waan inni waan kana tolcheefi.

⁴²Ammalle isa kad'atani ch'ubbu tana nura d'iqi jed'anini. Jennaani namichi jabaani Yuda jed'ani sunini waan worraani jed'e, Isani waan worri ch'ubbu tolche sunini tahe ya agartani. Tanaafi ch'ubbu ira fagaad'a.

⁴³Ammalle inni jara isaa ch'ufa qarsi haga kilo lama iraa guure dira Yerusalemuti erge, aka sorio dabaani ufi iraa baasani baasani. Wonti Yudani waan dansa kana tolcheefi waan inni aka nama due kaasani d'ugefateefi.

⁴⁴Yo sila inni waan suni d'ugefachu baate kad'achaani inni Waaqa kad'ate sunini daalluma fakaati woma imbaatu.

⁴⁵Yudani aka nami Waaqa d'ugefatu ch'ufti taka tana, waan dansa isa iraa argatu guddo d'ugefate tanaafi inni qarsi wolti guure sorio dabaani ufi ira baasani baase, aka akasini worra fit'ani suni ch'ubbu isaani, iraa d'iqani.