Read BORANA BIBLE – KITAABA WAAQA 2 Makabayo 13 Bible Online

2 Makabayo 13 - BORANA BIBLE – KITAABA WAAQA bible

2 Makabayo 13

¹Ganna 149 Yuda Makabayotifi jari isaa aka Antioko Eupatorini duula gudda muumme inqamne fud'ate Yudea had'u d'ufuti jiru d'agaye.

²Ammalle inni aka Lisani ka duri hayyu guddise, ka ammalle guddinna gula hayyuti aanu isa woliini jiru d'agaye. Worri sunini askarti Griki ta miilaani yaatu nama kuma d'ibbaafi kud'anitifi askarti fardaani yaatu nama kuma shanifi d'ibba saditifi arba diddami lamatifi gaari fardi hirkisu ka waan aka goraade miilaati naqani ka d'ibba sadii qaba.

³Menelaoni waan kana arginaani mala hama d'aate goli worra tahe, wonti inni akasi taefi, maro gosa ufiti jed'e waan suni intaane, ammo maruma huji ufi ta qaalluma keesati hafu fed'ufi akasi tahe.

⁴Ammo Waaqi hayyuuni hayyoota ch'ufa Antioko Menelaoti dallansiise, Lisiani aka nami Antioko balleese gaargala kana ch'ufaani iti d'ufe Menelao isati hime; tanaafi Antiokoni isa dira Beriati geese aada lafa suni gula isa ijeesa jed'e.

⁵Dira suni keesa doofi d'eertu tokoti jira ta old'eerinni isii d'und'uma shantama, doofi suni daarani guutani, ammalle doofi suni garaa isii ch'ufa keesa goodesani daarati gadi d'aabani.

⁶Nama waaqoota arabse yokhaani waan hamtu d'ibi tolchu, achi geesani goodo suni iraa gadi d'iisani, daara suni keesati ijeesani.

⁷Manelao kara suniini ijeesani, akasiini inni awaalale d'abe,

⁸sunini woma isaa male. Inni qara maro heddu daara qulqullo ibida waan sorio irati baasani ta mana Waaqa t'ureese, duuba amma daara keesati due.

⁹Hayyu Antiokoni akuma ufi kaani kiyyibe ufi olfuud'e naasu male lafa Yudea had'e. Haga abbaani isaa duri had'e kaanile ira had'e balleesu fed'e.

¹⁰Yudani waan kana d'ageennaani biyyaani halkani guyya Waaqa kad'ad'a jed'e, wonti akanatiifi worri,

¹¹aka lafa worra ta d'io nagaya argatte harka gosa d'ibi keesa seenu d'owani.

¹²Seerafi lafafi Mana Waaqale aka d'abiisa jira. Worri haga durile ira qarqaarsa isaa fed'a. Haga guyya sadii ch'ufa biyyiti huji ufii lakifte lafati gogombifamte ufi agabsite, boote, Aabbo Waaqa abba naasu qarqaarsa kad'ate. Jennaani Yudani biyya garaa jabeese, insodatina lola kurfefad'a jed'e.

¹³Duuba eege Yudani jaarole Yahudi kobaati yaame, waan jed'eeni, koota qarqaarsa Waaqatini hayyu haana fulla teenne Antioko ka Yudea had'e Yerusalemu marsu eennu.

¹⁴Jennaani Yudani dabsacha woraana harka Waaqa, ka waan ch'ufa uumeti lakise, askarti isaa garaa jabeese, aka janna had'a maro seerafi, mana Waaqa ka Yerusalemutifi lafa worraatifi jireenna worra ch'ufa ufi baasa dua jed'eeni. Worri bulto duula d'aatu dira Modeiniti jaarate.

¹⁵Yudani dabsachaani ta Waaqa jed'e, hobaati labse halkanuma suni askarti isaa kaima jajanna garaa beekhu keesa file, nama d'aatu waaro hayyu jiru ch'ufa had'e nama kuma lama fit'e. Ammalle worri arba arba ch'ufa hojja lola dura deemufi namicha isa yaabatule ijeese.

¹⁶Worri bulto duula keesa jiru ch'ufti Yudafi jara isaa ka dabsate,

¹⁷ado lafti imbariinu galu arginaani mudame lubbuuni d'ufte. Qarqaarsafi qorqorti Aabbo Waaqati waan kana ch'ufa tolche.

¹⁸Hayyichi jannooma Yahudi suni arginaani, aka yo mala d'aate male dandae Yahudi indabsanne hubate.

¹⁹Inni dira Yahudi ka Beth-Suri jed'ani ka jabeesani jaarani maro heddu had'e, ammo eege isa dabsatani.

²⁰Yudani nama dira jaba suni nyaapa ira eegu miha ergeefi.

²¹Ammo askartichi Yahudi ka Rodoka jed'ani dubbi d'ossaa toko askartiti hime. Jennaani dubbi isaa suni hubatani, isa qabani ijeesani.

²²Hayyichi ammalle worra Beth-Suritini wold'aqisa woliini tolfachu fed'e, ammo eeguma wold'aqani inni askarti isaa deefate. Duuba kae Yuda had'e, ammo ammalle isuma dabsatani.

²³Jennaani inni aka Filiponi ka Antiokia keesa finna lafa ch'ufa harkati lakisani isati gargale d'agaye. Hayyichi waan tahu wollaale jennaani qonqo nagaya Yahuditi erge, waan worri jed'u ch'ufa ee jed'e gula gale, arma achi isani indabsu jed'e iti kakhate. Aka wold'aqisa suni jabeesu inni sorio baase, mana waaqa ulfeese, isaa jed'e waan guddo baase,

²⁴Yuda Makabayole harka lamaanini fud'ate wolti araaramani. Eegi suni hayyichi namichi Hegemonidesi jed'ani gudda lafa jiddu dira Tolemasitifi Gerari tolche,

²⁵ammalle ufi dira Tolemasiti dabre. Worri dira suni waan inni Yahudini wold'aqefi guddo isati dallane — worri guddo isati dallane woldaqisa sunile chabsu fed'e.

²⁶Ammo Lisiani kora baase aka woldaqisa suni kalchu. Duuba inni eegi biyya garaa qabaneese, aka dubbini isaa d'ugaa garsiise kae Antiokiati deebie. Duuba kara kanaani hayyu Antiokoni ka qara Yahudi had'u d'ufe gara gale lafa ufiti gale.