Read BORANA BIBLE – KITAABA WAAQA 2 Makabayo 14 Bible Online

2 Makabayo 14 - BORANA BIBLE – KITAABA WAAQA bible

2 Makabayo 14

¹Eegi ganna sadi taani, Yudafi jari isaa aka Demetrioni ilmi Seleuko hobolofi askarti guddo fud'ate dira afaani baariini ka Tripoli jed'ani d'ufe d'agaye.

²Ammalle worri aka inni hayyu Antiokofi namicha isa guddise ka Lisia jed'anile ijeese lafa ira fud'ate d'agaye.

³Duuba namicha tokoti jira ka Alkimo jed'ani, ka duri Qaallicha Gudda, ammo eege, gaafa woraani lafa seene kaani finna Griki jaalate iti gale.

⁴Inni aka deebie Qaallicha Gudda intaane ufi arge ammalle waan Yahudini isa tolchitu sodaannani ganna 151 keesa hayyu Demetrio argu d'aqe. Guyya suni inni ruufa worqitifi dame meet'itifi damele ejersa ta aada gula Mana Waaqati baasanini d'ufe hayyu kenne, ammo mala garaa qabu iti inhimne.

⁵Duuba eege, gaafa Demetrio kora jara isaa mala d'auti isaa yaame, waan Yahudini tau feetu gaafannaani, mala isaa ka daalluma kaani qoomni gadiini baasu argate. Alkimoni waan jed'e,

⁶Jari Yuda Makabayo gula yau, nama aada Waaqa guute gosa ufi jabeesu ufi seha; worri woraana jaalate biyya wolti kaase lafa gargalche, lafa teenna nagaya d'owa.

⁷Maro gaargala worri lafaani d'ufe kanatifi anini huji tiyya ta qaalluma jabdu ta d'aloota gulalle isiini sila tiyyuma, amma d'abe ufuma taa. Tanaafi anini arra arma d'ufe,

⁸keesuma aka waan hayyuma teetifi olaanatifi ammalle waan gosa tiyya ira jira barbaadu, wonti akanatiifi mali daalluma ka Yudafi jari isaa d'aate yayu gosa teenna ch'ufa gaargala guddaani iti d'ufe.

⁹Ee hayyicha, waan atini keesafi keeso dubbi tana beetufi, anini si kad'ad'a aka atini akuma kanke kaani arjooma keetini gosa teennafi lafa teennale daba dabsani kana keesa baaftu.

¹⁰Haga Yudani jiru gochiti teenna dandeete nagaya inhoratu.

¹¹Akuma inni dubbi suni buufateeni, jari hayyu mala d'au kaani ch'ufti ka qara Yuda jibbu dubbi taani owise Demetrio dallansiise Yudati kaase.

¹²Duuba hojuma suni hayyichi kaani Nikano namicha guddo askarti arbaani yaatu, gudda lafa Yudea tolche, waan jed'eeni beeni,

¹³Yuda ijeesi jara isaale gargari boolati d'ai, duuba Alkimo Mana Waaqa ka lafa ch'ufa keesa gurra qabu qaallicha gudda iti tolchi.

¹⁴Nami gosa d'ibi ka gosa Yudea keesa jiru ch'ufti, ka Yuda baqate achiti gale, orie goli Nikano tahe, wonti akanatiifi worri waan sehe hojja Yahudi dabsatani gaargalchani, waan wonti sunini worraa ira jirtu sehe.

¹⁵Yahudini aka Nikanoni worra had'uti jiru ammalle aka worri gosa d'ibii ka lafa isaani keesa jiruleeni isaa kalche d'ageete. Jennaani biyye matati naqate Waaqa isaani ka worra fohate haga jiru jireenna nama ufi tolfate, hojja gaargalale taka worra inlakisini kad'ate.

¹⁶Jennaani Yudani ka gudda worraa, kaa yaa jed'eeni, worri hojuma suni yae, nyaapani d'aatu olla Adasati wolhad'ani.

¹⁷Oboleesi Yuda ka Simioni jed'ani, Nikanoni had'uti jira, ammo diquma isa indabsatini, wonti akanatiifi nyaapi sunini mala inni insehatini iti d'aate.

¹⁸Ammo hatatu Nikanoni aka Yudafi jari isaa garaa jabaate lafa isaaniti jed'e, tae had'uti jiru d'ageennaani, sodaate worra had'u dide.

¹⁹Ammo Pasodoniofi Detheodotifi Matathia Yahuditi erge aka wold'aqisa woliini tolfatani.

²⁰Dubbi wold'aqisa suni aka dansa woligalani jennaani Nikanoni jara isaati hime worrileeni garaa tokooni Ee jed'e dubbi suni fud'ate.

²¹Jennaani guyya tolfatani aka nami nama dura yau ch'ufti wolti d'ufe wo wolgaafatu. Duuba barch'uma kora bulto duula lachu keesaa guurani ch'ufa wolbira d'ad'aabani.

²²Yudani aka nyaapi dagu isa inhaane malate askarti woraana harka qabdu fulla nyaapi sila worraani had'u kaye. Ammo ato akasile taate jari gugurdaani sunini lamaani akuma dansa wold'agae nagayaani kora hobaafate.

²³Nikanoni eegi suni diqo Yerusalemu keesa tae. Inni Yahudi diqole indabsine, ammalle worra isati darame kaanile ufira galche.

²⁴Jari kunini lamaani guddo jaala woli tahe, Yudale fulla Nikanoni bahe ch'ufati woliini argani.

²⁵Nikanoni Yudani dubra fuud'i worra horad'i jed'e gorse. Duuba Yudani Ee jed'e, worra horate qubate nagayaani tae.

²⁶Alkimoni aka Nikanofi Yudani wold'aqani arginaani, tatabe wold'aqisa taani fud'ate hayyu Demetrio argu d'aqe, waan hayyuuni jed'e, Nikanoni ya siti gargale dubbi tante guutu dide, wonti akanatiifi inni namicha hama nyaapa keeti ka Yuda jed'ani kaani aka inni taka tana huji isaa iraa fuud'u fohate.

²⁷Dubbini d'ara tunini aka male hayyu dallansiifte, jennaani inni tatabe Nikanoti qore waan jed'eeni, anini wold'aqisa isani tolfatani suni inquumne Yuda Makabayo qabi amuma tana Antiokiati ergi.

²⁸Qonqoni tunini fulla Nikano d'umnaani inni guddo laalefate waan tau wollaale, wonti akanatiifi inni wold'aqisa nama woma iyakinini woliini tolfate ch'absu infeene.

²⁹Ammo ato akasile taate inni dubbi hayyu dabru indandau tanaafi inni kara Yudani qabu barbaade.

³⁰Ammo Yudani aka Nikanoni isati gargale isa tuffate agarraani, aka wonti kunini waan hamtuni d'uftu arge. Jennaani jara goli isaa wolti guure kae d'okhate.

³¹ Nikanoni aka Yudani isa ira mala qabu arginaani, inni Mana Waaqa gudda qulqullo hojja qaaloleeni sorio baasuti jirtu d'aqe Yuda harka kiyyati keenna jed'eeni.

³²Ammo qaaloleeni taani kakhate nu fulla Yudani jiru imbeennu jette.

³³Jennaani Nikanoni harka isaa mirgicha Mana Waaqati qabe, kakhate waan jed'e: yo isani Yuda qabdani harka kiyyati kennu baatani anini Mana Waaqa kana ch'ach'abse sigise, waan isani sorio irati baaftani kana bulleese, fulluma tanati mana waaqa Dioniso jed'ani jaara.

³⁴Duuba kae deeme, jennaani qaaloleeni harka olqabate Waaqa gosa teenna kalchu kad'ate waan jette:

³⁵Ee Aabbo Waaqa atini d'ipu womaatu inqabdu, ammo fed'i teetini Mana kanke jiddu teennati jaarate nu keesa qubate.

³⁶Si ch'allaati qulqullo, mana kankele d'iuma tana qulqulleesani, tanaafi amma qulqullooma isaa suni ira badu d'owi haga jiru jireenna.

³⁷Namicha Rasisi jed'ani toko ka jaarole Yerusalemu Nikanoti himatani waan jed'ani, Nami kunini gosa ufi kara hedduuni qarqaare, ammalle worrileeni guddo isaa saalfate abba Yahudi jed'ani yaamani.

³⁸Duri gaafa Yahudifi gochiti d'ibiini wold'ageete woliini inqubanne, inni aada Yahuditi jed'e lubbu ufile jibbaate, maro sunifi qabani isa himatani

³⁹Nikanoni aka Yahudi jibbu ufi garsiisu fed'aafi, askarti d'ibba shani ta Rasisi qabdu iti erge.

⁴⁰Inni waan yo nama suni qabani Yahudini gaargaltu sehe.

⁴¹Askartini doofi Rasisini iti baqate taani qabu d'ufte, balbala Fullo naabo Mana Waaqa irreeni ch'absite, ibidaani koota jette balbala suni gubde. Rasisini aka marsani arginaani goraade fud'ate ufi ijeesu fed'e.

⁴²Inni fulla harka worra ch'ubbu suni keesati gaargalchani ch'eersani, iraa gurruma ufi dansaani duu fed'e.

⁴³Ariiti goolama suni keesa Rasisini fulla d'alu wollaale ira gore. Duuba askartini manati baafannaani, inni utaale doofi mana kore, aka janna iraa bururate gumi jala ch'iiftu keesa bue.

⁴⁴Gumiini gugate jennaani diida keesati lafa d'ae.

⁴⁵Ka dallane siae, ka ammalle lubbuuni keesuma jirtu ka d'iigi mada taani keesa dibbise deemu, olkae biyya keesa utaale d'akha gudda toko kore.

⁴⁶Amma ka d'iigi ch'ufti keesa hobae marrumani isaa harkaani ufi keesa guure gumi taanini had'e; ato akasi tahuti jiru inni Aabbo Waaqa jireenna nama kennu marrumani kana naati deebisi jed'e kad'ate. Duuba aki inni due akasi.