Read BORANA BIBLE – KITAABA WAAQA 2 Makabayo 15 Bible Online

2 Makabayo 15 - BORANA BIBLE – KITAABA WAAQA bible

2 Makabayo 15

¹Nikanoni aka Yudafi jari isaa lafa Samaria keesa jiru d'ageennaani, guyya Sabato ka ato inni worra had'ele woma insodaanne had'iisa malate.

²Yahudini ta irreeni duula isaati darani, waan daba ka akana kana intolchini, guyya Waaqi guddaani waan ch'ufa argu ulfeese guyya ch'ufa ira qulqulleese, ulfeesi jette kad'ate.

³Duuba Nikanoni namichi abaarsa kaani, waan worraani jed'e, Hayyicha hayyu ch'ufa ira gudda ka gubba jiru ka guyya Sabato ulfeesa isanini jed'e jira?

⁴Yahudini waan isaani jette, Ee, Aabbo Waaqa ka jiru, ka hayyu gubbati, guyya Sabato ulfeesa nuni jed'e.

⁵Ammo Nikanoni waan jed'eeni, Yoosi anileeni hayyu lafa tanati woraana keesani guurad'a jecha hayyu guuta. Ammo ato tatele mali isaa ka daba kaani tahufi dide.

⁶Nikanoni qara kiyyibe d'ad'ade waan jed'e, Anini Yuda hojja dabsad'e aka waan suni qaabatani beesisa, jaara.

⁷Ammo Yudani aka Aabbo Waaqi isa qarqaare d'ugefannaani,

⁸jara isaatini nyaapa insodatina jed'e. Inni worra garaa jabeese aka Waaqi guddaani duri worra gula bahe qarqaare qaabsiise, aka ammalle inni akasuma worra dabsachiisule qaabsiise.

⁹Inni kitaaba Seeratifi ka raagoota keesa soomeefi had'i duri worri keesaati nyaapa dabsate ch'ufa qaabsiise akanani garaa worra jabeese.

¹⁰jari isaa lola kurfae jennaani inni aka worri nyaapa had'uu male iti hime, ammalle artumati aka gochiti d'ibiini kakhu ufi inguunne ka tanaafu dandaani ind'ugefanne garsiise.

¹¹Inni jara isaa woraana wonte teesani d'aabad'a injenneeni, ammo dubbi jannooma ta garaa nama jabeesituni gorse. Ammalle inni waan oobjate, ka aka daayya ka nami dandae d'ugefatu iti hime akanani worra soda ch'ufa iraa balleese.

¹²Wonti inni daayyani arge kana: Onia ka duri qaallicha gudda, ka nama balchicha dansa adabicha kiyyiba inqamne ka dubbi beekhu, ka ammalle kara dansaani guddisani arge. Ammalle Onia harka ballise olqabate gosa Yahudi ch'ufa Waaqa kad'atu arge.

¹³Yudani ammalle jaarsa mata arii ka jabeennafi guddinni iraa mullatu arge.

¹⁴Oniani waan jed'e: kunini Yeremia ka raaga Waaqa, ka gosa ufi ta Yahudi jaalate nuufi dira keennaa qulqullo Yerusalemule kad'ate.

¹⁵Jennaani Yeremiani harka isaa mirgicha diriirfate, goraade worqi Yuda kenne waan jed'eeni,

¹⁶Goraadeni qulqullooni tunini waan Waaqi sii kenne, fud'adi nyaapa keetini hobaasi.

¹⁷Dubbini dansaani Yudani dubbate tunini nama ch'ufa garaa jabeesite jannoomsite, ijoollele aka nama gudda nyaapa haasifte. Maro diraafi aadafi Mani worra ka Waaqaleni, ch'ufti mal badi keesa jiruufi Yahudini aka maro tokoti nyaapati bute soda male wolti duudani wolhad'ani garaa kutate.

¹⁸Worri worra isanitifi fiit'a worrale Mana Waaqatini wolbira iqabanne, ammo Mana Waaqa iti ch'ibre jabeese.

¹⁹Ammalle nami Yerusalemuti hafeleni guddo waan loli alati wolhad'ani suni buufatuni herege garaani iti eje.

²⁰Nami ch'ufti waan loli suni buufatuni eege argu fed'e. Duuli nyaapa ka askartini fardaani yaatu moga lamaani yaatu, ka arbale fulla malteefi jiddu keesa naqe, wolqabate d'ufe.

²¹Yuda Makabayo duula nyaapa ka muumme inqamneefi woraana worra ka akakatifi arba hamama worrale arginaani, harka Waaqati olqabate, Aabbo Waaqa ka waan mama tolchu kad'ate; wonti akanatiifi inni imbeekha aka Aabbo Waaqi namuma nyaapa dabsachu male dabsachiisu.

²² Yudani waan jed'e, Ee Aabbo Waaqa gaafa Hezekianiani lafa Yuda mohatu atini malaika tante ergite isiini nama kuma d'ibbaafi saddeetami shani ka hayyu Senekaribu fit'e.

²³Amma arale ee Aabbo gubbaa malaika tante dansa ergi aka isiini nyaapa keenna sodaachifte hollachiftu.

²⁴Jabeenna kanke guddaani worra kana ka si arabse gumi atini fohate tana had'u d'ufe balleesi. Akanani duuba Yudani kad'acha ufi buufate.

²⁵Nikanofi duuli isaa magalata d'ae geerare gad'ufe.

²⁶Ammo Yudafi jari isaa Ee Waaqa nu qarqaari jed'e fuula keesa yae.

²⁷Duuba Yahudini harka ufitini nyaapa haate, garaa ufi keesaleti. Waaqa kad'ate, nyaapa suni nama kuma sodomi shani fit'e, qarqaarsa Waaqi kenneefile guddo ira gammade.

²⁸Ka amma loli hobae worri geerara galu jiru, Nikano ka miha lola ch'ufa ufira qabu ka due ch'iisu argani.

²⁹Duuba lalabani ch'aarani afaani worratini Aabbo Waaqa faarsani.

³⁰Yuda Makabayoni ka gosa ufiti jed'e, lubbu isa jibbaate nyaapa had'e ka taka gosa ufi jabeesu ilakisini, waan jara isaatini jed'e, Harka Nikano mirgichafi mata isale ira kuta Yerusalemu geesa.

³¹Worri diraani banaani nama ch'ufa wolti yaame, qaalole waan sorio irati baasani bira d'ad'aabe jara maneeni jajabdu keesa jiru kaani gayyaame jed'e.

³²Inni mata namicha dabdicha Nikano jed'ani kaanitifi harka namichi ch'ubbichi suni ka kiyyibe mana qulqullo, Waaqa guddati olqabe worra garsiise.

³³Jennaani inni araba namicha Waaqa imbeenne kaani keesa kute, waan jed'e Anini araba kana ch'ire allaati durati jisse, mata isaale ka waan daallumti isaa baate garsiisu Mana Waaqa durati olfannisa.

³⁴Nami achi jiru ch'ufti gubba ollaale, Aabbo Waaqa ka jabeenna ufi agarsiise Mana isaale t'urau d'owe faarse.

³⁵Yudani mata Nikano naabo maneeni jajabdu taaniti olfannise aka akanani qarqaarsi Aabbo Waaqi nama qarqaaru nama ch'ufaa galu.

³⁶Biyyiti ch'ufti iti woli galte aka guyya suni iti deebiani indeene, ammo ganna ch'ufa galgala boriya guyya Mordekai, ka guyya kud'ani sadeeso ka jia kud'ani lameeso, ka afaani worri Shamutini Adari jed'ani jila tolfatani.

³⁷Aki Nikanoni buufateeni akasi. Diri Yerusalemu eegi guyya suni harka worra Ebraniati hafe, akanani duuba anini odu tiyya armumati buufad'a.

³⁸Yo isiini ta aka dansa t'aafamte waan ch'ufa himtu taate, naa gammada; ammo yo t'aafini isi intolini isiini ta nama ingamachimne tatele hagi anini dandauti hagasi.

³⁹Akuma daad'ini yo ka bisaani iti inaqini d'ugani fayya nama d'owarte, ammo yo bisaanini wolti darani miyofte nama gammachiiftu akasuma oduuni dandsaleni yo aka isii male t'aafani, nama isi soomu gammachiifti. Tanaani anini dubbi tiyya buufad'a.