Read BORANA BIBLE – KITAABA WAAQA 2 Makabayo 3 Bible Online

2 Makabayo 3 - BORANA BIBLE – KITAABA WAAQA bible

2 Makabayo 3

¹Gaafa Oniani qaallicha gudda Yerusalemu, diri qulqullooni nagayafi bulti dansa argate. Ammalle waan inni Waaqa jaalate waan hamtu jibbeefi, seera dira suni jabeesani gula deemani.

²Hayyooti Shamutifi ta Misiri Mana Waaqa suni ulfeesite, waan dadansa guddo gati qaba kenniteefi,

³ammalle hayyuuni Asia ka Seleuko jed'ani damoosa inni guurateeni sorio Mana Waaqa bite.

⁴Ammo namichi Simioni jed'ani ka gosa Benjamini toko, ka huji Mana Waaqa iti mata, dubbi seera gabaya dira suni Oniani irati wolmormani ammo Oniani dabsate.

⁵Gaafasi Hapolonio ilma Tarso gudda Koele-Shamu. Simionini gara isaa d'aqe waan jed'eeni,

⁶Beese guddo muumme inqamneti fulla beese Mana Waaqa iti olkayani keesa jira, ammalle waan isiini qooda beese sorio baasani keesa injireefi, yo harka hayyuti deebisani dansa.

⁷Hapolonioni hayyuuni wolwoldaani jennaani waan beese suni iti haasae, duuba hayyuuni namicha huji isaa harka qabu ka Heliodoro jed'anini waan jed'e, Beeni beese suni naa fuud'i.

⁸Heliodoroni, hojuma suni beese suni fuud'iti iti d'aabate, ammo biyya sobe waan jed'eeni, Anini dira gugurda lafa Koele-Shamu keesa jiru ch'alla laalu deeme.

⁹Eegi Yerusalemuni bahe, qaallichi guddaleeni aka dansa beela d'eebu isaa baase, inni waan d'ufefi, worrati hime, dubbi qara iti himani taani aka isiini d'ugaa gaafate.

¹⁰Jennaani qaallichi guddaani waan jed'eeni namichi dabdichi Simioni jed'ani suni, dubbi d'ugaa isaniti inhimne. D'uguma beeseni olkayani Mana Waaqa keesa injirti, ammo beeseni suni gami toko ta hiyyeeyiti, ta haftele ta Hirkano ilma Tobia ka guddinna qabu. Qarale beeseni sunini ch'ufti wolti qarsi kilo kuma kud'ani saditifi worqi kilo kuma jaatifi d'ibba shani.

¹²Ammalle inni waan jed'e, Beese Mana Waaqa ka lafa ch'ufa keesa gurra qabu, ta nami d'ugefate qorqorti Mana suniti jed'e achiti olkaye, dandaani nama tokoleeti inkennani.

¹³Ammo Heliodoroni akuma hayyuuni jed'e kaani beese suni na kenni ha fulla beese hayyu iti olkayaniti olkayaniti jed'e.

¹⁴Duuba inni guyya tolfate Mana Waaqa olseene, henna beese suni ira eje laale. Wonti kunini nama dira suni ch'ufa dallansiifte nami ch'ufti d'uqise kaye.

¹⁵Qaaloleeni ta woya qaalluma ufira qabdu mesa sorio durati lafaani ufi d'od'ofte, Ee Waaqa beese tana badu d'owi jette kad'ate, waan jette, Siumati seera beese biyyiti Mana kanke keesa keeyate badi d'owartuni gadi baase.

¹⁶Nami qaallicha gudda arge, ch'ufti iraa laalefate garaani tarsae, fuuli isaa golgolae laalala hamtu inni qabu garsiisa,

¹⁷ammalle inni hollate soda onne isaa sunini garsiise.

¹⁸Biyyiti mana ufi keesa oriite wolti baate Waaqa kad'ate, Ee Waaqa Mana kanke t'urau d'owi jetteeni.

¹⁹Nad'eeni ch'arqi hid'aanati maratu male waan d'ibi ufira inqamne kara dira ch'ufa guute ufuma yaati, dubarti haga d'alate taka mana gadi imbainileeni, fulloofi naaboti oriite hagi tokoleeni dereshaani wo daawate.

²⁰Ammo worri fulla yau ch'ufati harka olfud'ate Waaqa kad'ate.

²¹Wonti kunini waan akami hamtu ka qaallichi guddaani akana laalefate, nami ch'uftileeni waan tau wollaale lafati gogombifame ufuma ch'iisu.

²²Ato nami ch'ufti wolti bahe, Aabbo Waaqa gudda kad'ate, Beese Mana kankeetiti olkayani qorqorad'i jechuni jiru,

²³Heliodoroni waan qara malate kaani tolchiti iti kaye.

²⁴Ammo isaafi jari isa tissu fulla beese iti olkayani d'umnaani, Waaqi abbaani waan ch'ufa harka qabu, daayya nama garsiise, duuba akanani nami garaa jabaate, Heliodoro woliini arti olseene ch'ufti aka male sodaate mumudame lubbuuni d'ufte, maro jabeenna Aabbo Waaqa ka argani kanafi.

²⁵Daayya suni keesa worri fardafi nama isa yaabatu arge. Fardi sunini lugama mid'aaga guddo ch'okhani qaba, nami isa yaabatu ka woya worqi ta lola ufira qabu nama sodaachisa, maro tokotu fardi kaani Heliodoroti ch'ee, kote iti olguurate d'ae.

²⁶Heliodoroni ammalle nama kaima lama jajaba mimid'aaga woya dadansa naqatu arge. Worri lamaani kunini moga moga isaa ejaanje naasu male aka hama isa, d'aane,

²⁷inni hojuma suni gagabe lafa d'ae, jari isaa kaani wosasani fuud'e,

²⁸alatini bahe, qara diquma waan sunini durati namichi kunini nama hedduufi jara isaa eegu woliini mana suni olduude, ammo amma tana, aka nama ufi indandeenne baatani deemanini. Tanaafi worri ch'ufti diiduma keesa jabeenna Waaqa gudda arge.

²⁹Heliodoroni ka dubbachu dad'abe, abdi jabeenna irre Waaqa ta waan kanaani jala bahe fayyuni inqamne fulluma toko ufuma ch'iisa.

³⁰Ammo Yahudini Waaqa gudda faarsite, waan inni kara mamatini Mana isaa qorqorate, fulla qara nami wo sodaate waan tau wollaale, maruma toko gammadaani d'ufefi.

³¹Jaallowani Heliodoro ta gari, hurifte gara qaallicha Gudda Onia jed'ani d'at'e waan jetteeni, Waaqa Gudda gubba jiru nu kad'aadi aka inni nama kana fayyise duu d'owu.

³²Duuba akasini Qaallichi Guddaani sorio baase, aka Waaqi Heliodoro fayyisu, wonti akasitifi inni aka hayyuuni Yahuditi nama inni erge kana akana tolche jed'u infeene.

³³Ato Oniani sorio suni baasuti jiru jari kaima kaani lamaani ka woyuma taani ufira qabu Heliodoroti mullate waan jed'eeni, Qaallicha Gudda kana galata galchi, maro isaatifi Aabbo Waaqi lubbu tehe baase.

³⁴Qabad'i nami si gaargalche Aabbo Waaqa gubbati, amatana beeni nama ch'ufa jabeenna isaa iti haasai. Worri dubbi tana jed'e buufannaani lafaa d'abani.

³⁵Jennaani Heliodoroni sorio Aabbo Waaqa baase, waan heddu kakhateefi, maro inni lubbu isaa baasefi. Duuba nagayati Oniani jed'e, askarti ufi fud'ate hayyuti deebie.

³⁶Achini banaani waan Aabbo Waaqi, ka waaqoota ch'ufa ira jabeenna qabu tolche nama ch'ufati haasae.

³⁷Hayyichi nama dansa Yerusalemuti ergu malani Heliodoro gaafannaani, inni waan jed'eeni,

³⁸Yo nyaapa qabaate yokhaani nama siti malate si gargalchu fed'u qabaate isuma ergi, inni yo deebile kauma d'aanani diquma lubbu inkutiniti gadi deebia, wonti akanatiifi irre nami waan isii imbeenne ta Waaqati achi jira.

³⁹Waaqi gubbaa Mana suni qorqorate, nama isa balleesu d'ufu ch'ufa d'ae ijeesa.

⁴⁰Aki beese Mana Waaqatini qorqoratani Heliodoro ira d'owani akasi.