Read BORANA BIBLE – KITAABA WAAQA 2 Makabayo 5 Bible Online

2 Makabayo 5 - BORANA BIBLE – KITAABA WAAQA bible

2 Makabayo 5

¹Bara suni Antioko afreeso maro lameeso lafa Misiri had'e.

²Bulti afurtama geetu nami Yerusalemu keesa jiru ch'ufti, askarti fardaani yaatu ta woya lola ta worqi naqatu ta gubba qilleensa keesa oriitu daayyani arge. Askartini sunini woraanafi goraade ga baafate kurfo ejiti.

³Worri lola wolti kurfefate, wolti bue wolhad'e wonteeni, woraani aka bokaya roobe, t'iyiti qilleensa keesa baafate. Miha lola ka gosa gosaatifi lugami farda ka worqi adu keesati bibiliqe.

⁴Nami dira keesa jiru ch'ufti aka daayyani tunini waan dansa d'ooftu Waaqa kad'ate.

⁵Qonqoni d'ara ta Antiokoni ya due jettu lafa qabate jennaani Yasonini nama kuma gau fud'ate Yerusalemu tasa had'e. Worri askarti naabo dira eedu had'e dudda duuba deebise, eege dira dabsate fud'ate Menelaoni maneeni jajabdu d'aatu gaara Mana Waaqati baqate,

⁶ammo Yasonifi jari isaa naasu male gosa isaani ta Yahudi hobaase. Yasonini aka nami gosa ufi had'e dabsate waan dansa intaini inhubanne. Inni dabsacha gosa ufi dabsate suni waan nyaapa dabsate sehe, ammo akasiniti.

⁷Ato akasile taate Yasonini gudda lafa suni tahe lafa infinne, ammo eege lafa Amoniti baqate, mali hamani inni d'aate kaani badiifi ch'eeraani iti d'ufe.

⁸Inni gaargala keesati due. Aritani ka gudda Arafti isaa hid'e; nama wo yaku ka gosa ufi balleesu jed'ani, aka hama jibbani; ammalle nami ch'ufti isa reebe, innileeni bulti d'aabe dira ch'ufa ira mara. Inni lafa Misiriti baqate,

⁹artile kae lafa Spartati baqate waan worri Sparta ka Yahudini wolfiit'a isa baasu sehe. Duuba eege, nami kunini ka nama gosa isani heddu lafa isaani keesa baqachiise, ufiftu lafa isaani keesa baqate lafa nyaapa keesati due.

¹⁰Yasonini qara nama heddu ijeese, reefa worrale awaala d'owe, ammo amma doonaani nama isaa bou d'aabani. Isa ireesa ababoota isa keesati inawaalle yokhaani nami isaa bohe tokoleeni injiru.

¹¹Antiokoni odu waan Yerusalemu keesati tahe d'ageennaani waan lafti Yudea ch'ufti isati gargaltu sehe aka male dallane. Duuba inni lafa Misiriti bahe, tasa d'ufe Yerusalemu aka hama had'e,

¹²waan askarti isaatini jed'e, Naasu male nama ch'ufa fit'a, ka mana keesati d'okhatele imbaasina ijeesa.

¹³Worri nama ch'ufa d'iirafi nad'eenifi dubrafi ijoolle d'iiratifi daima didiqale ch'ufa fit'ani.

¹⁴Guyya sadi keesati Yerusalemuni nama kuma saddeetama d'abde: kuma afurtama fit'ani kuma afurtama d'ibi geesani gurgurani.

¹⁵Ammo Antioko wonti kunileeni inquubsine inni Mana Waaqa ka lafa ch'ufa keesa mani isa ira qulqulloo injire garaa jabaate oli seene. Nama isa artini d'ufe, namicha Menelao jed'ani ka aada ufitifi gosa ufileti ch'ubbame,

¹⁶harka isaa t'uricha aka injire ka qulqullo intainini Antiokoni miha woyyumatifi waan d'ibi hayyooti d'ibiini guddinna Mana Waaqati jette baafte ch'ufa guurate.

¹⁷Inni waan tahe kana guddo ira gammade, ammo aka Aabbo Waaqi maro ch'ubbuuni worra Yerusalemu haga diqa toko dallansiifteefi Mana isaa qulqullo t'ureesani iti lakise inhubanne.

¹⁸Ato worri Yerusalemu ch'ubbu hagasi geetu suni tolchu baate Antioko sila yoosu gaargalchani huji daalluma suni ira d'owani. Isa sila gaargaluma Heliodoro, ka hayyu Selenkino beeni beese Mana Waaqa laali jed'eeni qabate kaaniti qabata.

¹⁹Ammo Aabbo Waaqi Mana isaati jed'e gumi infohanne; gumi ufitifi Mana isaa jaare.

²⁰Akanani Mani Waaqa gaargala biyyiti argatu argate, ammo eege worri wo horannaani innileeni wo argate. Aabbo Waaqi dallanaani Mana ufi lafa buuse, dallansu galfannaani Mana ufi jaare mid'aase.

²¹Antiokoni kilo kuma jatami lama ta qarsi fud'ate hariifate Antiokia d'aqe, inni kiyyibe haga dabre, waan dandae hobolo lafa gogodu iraa deemsise, ammo askarti miilaani bisaani gubba deemsisu sehe.

²²Inni nama lafa fidu fohate aka inni nama dabsu tolche. Inni Yerusalemu keesa namicha toko ka lafa Frigiaati d'ufe ka Filipo jed'ani, ka Antiokole ira hamaa gudda iti tolche.

²³Gaara Gerezimu irati inni Androniko gudda tolche. Worra kana malele namicha hama tokoti jira ka worra kana ch'ufa ira gosa ufi ta Yahudi dabse ka Menelao jed'ani. Antiokoni Yahudi aka taka inargini jibbe,

²⁴askarti lafa Misia ta bitani kuma diddami lama Yerusalemuti erge, waan namicha gudda askarti suni ka Apolonio jed'anini jed'e, Nama d'iira ka dira keesa jiru ch'ufa fit'i nad'eenifi ijoollele booji gurguri.

²⁵Apolonioni Yerusalemuni bahe, namuma imaltu nagaya deemu ufi fakeese. Duuba guyya Sabato toko ka Yahudini ch'ufti boqotu inni askarti ufi ta miha lola ch'ufa harka qabdu, d'aatu dirati wolti baase aka nami daawatu.

²⁶Duuba inni nama gadi bahe isa daawatu ch'ufa askarti isaatini fit'a jed'e. Worri orie dira duude nama heddu hobaase.

²⁷Ammo Yuda Makabayotifi nami sagali gau, gaareeni aloo tokoti baqate aka bineensa, alati gale. Worri aka ufi int'ureesine, mid'aani ala nyaate.