Read BORANA BIBLE – KITAABA WAAQA 2 Makabayo 8 Bible Online

2 Makabayo 8 - BORANA BIBLE – KITAABA WAAQA bible

2 Makabayo 8

¹Yuda Makabayotifi jaallowani isaa d'ossaani olla ch'ufa keesa marani nama gosa Yahudi ka aada ufi jabeesu ka kuma jaa, wolti guurani duula baasani.

²Worri Aabbo Waaqa kad'ate aka inni gumi ufi ta amma gochiti ch'ufti dabsite ufi jalati bulchitu tana qarqaare Mana isaa ka amma worri aada inqamne kunini t'ureese nahe,

³ammalle dira Yerusalemu ka amma balleesani diquma insigissini naasu isaatini qarqaaru.

⁴Ammalle worri Aabbo Waaqa kad'ate, aka inni, nyaapa gumi isaa fit'e, naasu male ilmaani woma iyakini hobaase Aabbo Waaqale arabsu, haalo baafate akasini aka inni waan hamtu jibbu garsiisu.

⁵Akuma Yudani duula isaa wolti baaseni duuli gosa d'ibi kaani duula isaa dura eju dad'abe, wonti akanatiifi dallansuni Aabbo Waaqi worra Israeliti dallanu amma gargalte naasu taate.

⁶Yudani tasa d'ufe diraafi ollowaani had'e gube balleese, inni fulla jajabdu nyaapi keesati d'owatu fud'ate, nyaapa suni gube. Inni hojja halkani nama had'u guddo nyaapa dabsata ufi arge, duuba fulla ch'ufati jannooma isaa haasani.

⁸Namichi gudda Yerusalemu ka Filipo jed'ani aka Yudani laakuma bulle kauni jabaate, haga qara ira yo ch'ufa nama dabsatu arginaani tatabe gara namicha gudda Arda Koele-Shamu ka Tolomayo jed'ani t'aafe lafa hayyuuni fidu jed'i na qarqaari jed'e.

⁹Tolomayoni hojuma suni Nikano ilma Patroklo ka innileeni jara jaallowani hayyu kaani keesa jiru fohate, askarti gosa gosa ta kuma diddama woliini erge, beena gosa Yahudi ch'ufa haguma isiini geetuni fit'a jed'e. Ammalle Tolomayoni namicha Gorgia jed'ani toko ka guddo waan lola beekhu ka ammalle gudda askarti isaani woliini erge.

¹⁰Hayyu Antiokoni gati worra Rumi kilo kuma jaatami saddeeti ta qarsi qaba; Nikanoni gati suni aka worra Yahudi ka boojiani gurgure baasufi malate.

¹¹Tanaafi hojuma suni qonqo dira afaani baariini jiru ch'ufati erge waan jed'e, Koota anini Yahudi gati kilo qarsi tokole ingeenneti gurgura bitad'a. Ammo inni gaargala Waaqi guddaani isaa olkaye quba inqabu.

¹²Yudani aka Nikanoni duula ufi fud'ate Yudea d'ufuti jiru d'agaye jara isaati hime.

¹³Worri suni nami gari abeeba aka Waaqi d'uga gula deemu d'ugefachu dide, kae haguma dandau baqate.

¹⁴Ammo ka gari waan qabu ch'ufa gurgurate, aka akasini Aabbo Waaqi harka namicha isaa imbeenne ka Nikano jed'ani ka ato worra inhad'ini aka tisse gurguratu jala baasu kad'ate.

¹⁵Worri Waaqa kad'ate waan jed'e, Ee Waaqa yo atini nu jette waan kana tolchule baate wold'aqisa ababoota teenna woliini tolfate jed'i nu bassi. Atini Waaqa jabeennafi guddinna qabu, atini nu yaamte gumi tante nu tolfate.

¹⁶Yudani askarti isaa ta kuma jaa taani ch'ufa wolti yaame, waan jed'eeni hojja isani duula gosa d'ibi ka fayyuma tana isani had'u d'ufu agartani, mudamtani ind'eetina, ammo garaa jabaad'a had'a,

¹⁷daba worri Mana Waaqati dabe qaabad'a, aka worri Yerusalemu gaargalche aada Yahudi balleesule inded'ina.

¹⁸Worri woraanafi jannooma ufi heregata, ammo nu Waaqa gudda ka askarti tana ch'allaniti ammo yo fed'u lafa ch'ufa chochoiti mata ufi ch'allaani balleesu dandau hereganna.

¹⁹Yudani ammalle aka duri Waaqi ababoota isaani qarqaare worra qaabsiise: bara Senekaribu askarti nyaapa nama kuma d'ibbaafi saddeetami shani balleesani;

²⁰ammalle gaafa toko lafa Babiloni keesati Yahudini nami kuma saddeeti askarti Makedonia ta kuma afuri qarqaaru d'ufte, duula Galatia kuma d'ibbaafi diddama dabsate waan heddu iraa boojite, wonti kunini ch'ufti qarqaarsa Waaqatini taate.

²¹Dubbini Yuda jara isaa garaa jabeesite nami ch'ufti aka aadafi lafa ufiti jed'e duu kutate. Jennaani inni duula ufi fulla afuriti gargari qoode,

²²ka kamu nama kuma tokofi d'ibba shani qabu, duuba isaafi oboleesa isaa Simionifi Yusufufi Yonathanini qooda suni toko tokooni abba duula iti taate.

²³ Inni Eleazari kitaaba qulqullo lalabi soomi jed'eeni jennaani, Waaqa nu qarqaari jed'e, hobaati labse. Inni duula ufi dura deeme Nikano had'e.

²⁴Waaqi guddaani worra qarqaare worri duula nyaapa nama kuma sagali gau keesa fit'e. Worri duula nyaapa nama heddu madeese, haguma inni gaunu baqachiise.

²⁵Worri worra sila aka tisse worra bitata d'ufu kaani beese ira saame, nyaapa sunile guddo reebe, eege waan Sabatoni d'iateefi jala deebie.

²⁷Worri miha lola ka nyaapa boojie reefale miha ira yafanaani jila Sabato tolfatani Aabbo Waaqa faarsani galata isaa deebisani; wonti akanatiifi isati guyya suni nagayaani worra galche, akheekha qara ka naasu isaa worra garsiise.

²⁸Guyyaani Sabato dabre jennaani worri waan boojiani suni ka gari nama duri gaargalchanifi nad'eeni hiyyeeyifi ilmaani hiyyeeyi qoode, waan hafe worra ufiti kenne.

²⁹Eegi waan kana ch'ufa tolchani wolti d'ufani Waaqa abba naasu kad'atani, Waaqa hojattu teeti nahi jed'ani.

³⁰Yahudini eegi suni duula Timotheotifi ka Bakidetini wolhaate, nama kuma diddama ira jiru keesa fit'e. Ammalle worri maneeni jajabdu d'ed'eertu gari dabsate qabe, waan heddu boojie qoodate, nad'eeni hiyyeeyifi ilmaani hiyyeeyifi jaaroleefi worra duri gaargalchanileni gae.

³¹Miha lola ka nyaapa kaani aka dansa wolti guurani fulla dansaati olnaqani, ammo waan boojiani kaani ch'ufa Yerusalemu geesani.

³²Worri namicha Waaqa imbeenne ka abba duula Timotheo ka guddo Yahudi gaargalche ijeese.

³³Ato worri tae dira ababoota isani keesati maro nyaapa dabsateefi gammadu, worra duri fullo Mana Waaqa gube, ibidaani gube hobaase. Worri fit'ani suni toko Kalestene jed'ani ka qara mana diqa toko keesati d'okhate, duuba inni akanani gati daba ufi argate.

³⁴Kara kanaani namicha dabdicha Nikano jed'ani ka dilaaltu kuma toko ta sila Yahudi bitatu d'ufeeni,

³⁵qarqaarsa Aabbo Waaqatini gochiti qara inni akasi tuffate dabsate. Inni woya isaa mid'aadu askarti yaafate aka tisse baqatu kae baqate, Antiokiani bahe. Wonti inni argate balleesa duula ufi balleese ch'alla.

³⁶Duuba akanani namichi sila gati worra Rumi Yahudi gurgure baasu fed'e, aka nami dandae Yahudi indabsanna garsiise. Nami worra qarqaare worra dabsachiise Waaqa wonti akanatiifi worrati Seera inni worra kenne guute.