Read BORANA BIBLE – KITAABA WAAQA Matayo 16 Bible Online

Matayo 16 - BORANA BIBLE – KITAABA WAAQA bible

Matayo 16

¹Farisayoofi Sadukayoni gara isaa d'ufte aka sila ilaalattu, Akheekha gubba nu agarsiisi jed'aniini.

²Yesoni waan worraani jed'e, Yo aduuni d'iite galchuuni diimate, bori bokai irroobu jettani.

³Ammo diirama, Bokai irrooba jettani, waan dumansi guraatae d'ud'ufaeefi. Isaani waan gubba beetani, ammo akheekha bara kana gargari barachu imbeetani.

⁴D'alooti hamani Waaqa didu kunini akheekha mama, barbaada akheekhi mama ka anini nama garsiisu injiru ka Yona male. Duuba akasi jed'e kae worra bira iti d'aabate.

⁵Jari isaa gama galaanati taakinaani, qit'a fud'achu ded'ani.

⁶Yesoni waan worraani jed'e, Bukho Farisayootiifi ta Sadukayo eegad'a.

⁷Jennaani jari isaa woliini hasae waan jed'e, Nu qit'aani ind'umne.

⁸Yesoni waan kana beennaani waan jed'eeni, D'ugefachaani teesani waan diqo. Maafi hasooftani, Nu qit'a inqamnu jettani?

⁹Ammalle inhubanne? Qit'a shanaani ka nami kunki shani nyaate inqaabatani? Ammalle dadu hagami ta hambaa guurtani?

¹⁰Yokhaani qit'a torbaani ka nami kunki afuri nyaate inqaabatani? Ammalle dadu hagani ta hambaa guurtani?

¹¹Akami inhubanne re aka anini waan qit'a dubbachuti injirre? Bukho Farisayootiifi ta Sadukayo eegad'a.

¹²Jennaani aka inni bukho qit'a ta Farisayootiifi ta Sadukayo imbaaniini, ammo barsiisa Farisayootiifi ta Sadukayo eegad'a jed'eeni hubatani.

¹³Duuba Yesoni lafa Kaisaria Filipi d'umnaani, jara isaa gaafate waan jed'eeni, Biyyiti, Ilmi Namatiini eennu jetti?

¹⁴Worri waan jed'eeni, Hagi toko, Yohana nama batisu jed'a, ka gari, Eliya jed'a, ka gari, Yeremia yokhaani raaga duri toko jed'a.

¹⁵Yesoni waan worraani jed'e, Ammo isani eennu naani jettani?

¹⁶Simoni Petroni waan jed'eeni, Atini Kristo, Ilma Waaqa jiruuti.

¹⁷Yesoni waan jed'eeni, Ayyaani keti, Simoni, ilma Yona. Nafafi d'iigi waan kana siti imullimne, ammo Abba kiyya ka gubba jiruti siti mullise.

¹⁸Anini siti hima: Maqaani ke Petro yokhaani d'akha, d'akha kana gubbati anini gumi tiyya ijaara. Dooti dandeete jabeenna isii indabsattu.

¹⁹Fura Finna gubba siti kenna; waan atini lafa tana keesati didde gubbaleti didani, waan atini lafati ee jette gubbaleti ee jed'ani.

²⁰Jennaani Yesoni jara ergattu isaa ch'ufati seere, Aka anini Kristo nama tokoleti inhimina jed'eeni.

²¹Eegi suni Yesoni diideese jara ufiti hime waan jed'eeni, Anini Yerusalemu d'aqu male. Harka jaaroletiifi qaalole gugurdotiifi jara Seera beekhutiini gaargala. Ammalle na ijeesani, guyya sadeeso kau male.

²²Duuba Petroni kobati yaame waan jed'eeni, Waaqi si didinna, Aabbo. Wonti kuni tahu himmalle.

²³Ammo Yesoni garagale waan jed'eeni, Na biraa deemi, Sheet'ana; atini na gufachiifta, heregi kanke ka nama male ka Waaqatiiniti.

²⁴Jennaani Yesoni waan jara ufitiini jed'e, Yo nami tokoleeni na gula deemu fed'e ha ufi mormate, maskali ufi baate na gula deemuti.

²⁵Wonti akanatiifi nami jireenna ufi baasu fed'u ch'ufti ind'aba; ammo nami jireenna ufi naa jed'e balleesu inargata.

²⁶Yo waan lafa ch'ufa argatani ammo jireenna ufii d'abani, maani namaa baati? Nami maani dandae gati jireenna ufiti baasa?

²⁷Ilmi Nama malaika ufi woliini guddinna Abbaatiini d'ufa, duuba nama ch'ufa huji isaa gula waan isaa male kennaafi.

²⁸D'uguma, waan anini isaniini jed'u, Jara arma ejaanju kana keesa nama haga Ilmi Nama guddinna ufitiini d'ufuti indooneti jira.