Read BORANA BIBLE – KITAABA WAAQA Matayo 5 Bible Online

Matayo 5 - BORANA BIBLE – KITAABA WAAQA bible

Matayo 5

¹Yesoni gumi arginaani gaara kore gubba tae. Jennaani jari isaa gara isaa d'ufe,

²inni worra barsiise waan jed'e,

³Ayyaana worra aka garaa keesa hiyyeeyi ufi beekhu: Finni Waaqa ka worraati!

⁴ Ayyaana worra lalefatu: Waaqi garaa worra jabeesa!

⁵ Ayyaana worra ufi diqeesu: lafa ch'ufa d'aalani!

⁶Ayyaana worra d'ugaa jed'e beelae d'eebotu: worra akana kana inquufsani!

⁷Ayyaana worra naasu qabu: worra kana inahani!

⁸ Ayyaana worra garaa qulqullo qabu: Waaqa inargani!

⁹Ayyaana worra nagaya tolchu: ilmaani Waaqa jed'aniini!

¹⁰ Ayyaana worra d'ugaafi gaargalchani: Finni gubbaa ka worraati!

¹¹ Ayyaana keesani hojja beeni isani arabse gaargalche, maro tiyyaafi d'araani isani himate waan hamtu ch'ufa isaniini jed'u.

¹² Hojja suni gammada, qilit'ama, gatiini teesani ta gubba jirtu waan guddo. Akuma kana raagoota duri gaargalchani.

¹³Isani soodda lafaati. Ammo yo sooddi bushae, maaniini kura iti deebisani? Waan tokole himmalle, yo alati gagatani miilaani ira ejaanjatani male.

¹⁴ Isani ifsa lafaati. Diri gaara gubba jiru indaatu.

¹⁵ Ifsa bobeesani qori iti ingombisani, ammo olfannisani, aka nami mana keesa jiru ch'ufti argu.

¹⁶ Akasuma ifsaani keesani ha nama durati ifsu, aka hujiini teesani dansaani mullatte Abba keesani ka gubba jiru guddisani.

¹⁷Waan anini barsiisa Seeratiifi ta raaga balleesu d'ufe insehiina. Anini aka balleesu ind'umne, ammo aka qit'eesu d'ufe.

¹⁸ D'uguma, waan anini isaniini jed'u, Haga lafafi gubbaani dabartuti ch'obi Seera tokoleeni indabru haga seeri ch'ufti guutamuti.

¹⁹Tanaafi nami seera didaqa kana toko ch'abse ammalle akasuma namale barsiise, Finna gubbaa keesati maand'a taha. Ammo nami Seera guute akasuma namale barsiise, Finna gubbaa keesati angafa taha.

²⁰Waan anini isaniini jed'u, Yo d'ugaani teesani ta jara Seera beekhufi Farisayo ira injirre, dandeetani Finna gubba inargattani.

²¹ Yayu d'ageettani aka worra duritiini, Nama inijeesiina; nami nama ijeesu ch'ufti qorsuma male jed'ani.

²²Ammo waan anini amma isaniini jed'u, Nami oboleesa ufiti dalanu qorsuma argachu male. Nama oboleesa ufi arabsu kora iti baasu malani; ammalle nama oboleesa ufi tuffate, Daalle daba jed'uuni, ibida keesa buusu malani.

²³Tanaafi yo aka galata kanke Waaqa baaftu, fulla sorio iti qalani d'ufte, ka aka oboleesi kanke si inquumne qaabatte, fulla sorioti kai,

²⁴waan galata baaftu lakisi deemi, qaraa fiit'e oboleesa kanke araarama kad'ad'u, eege deebii galata kanke baasi.

²⁵Yo nami si himate koraa si yaamani, hurrisi wold'aqa yokhaani inni jaarole si kenne, jaaroleleeni askartiti si kennite, askartileeni mana hid'aansa keesa si buufti.

²⁶D'uguma, waan anini siini jed'u, hid'aansa keesaa imbaatu haga beese ch'ufa baaftuuti.

²⁷ Duri, ya d'ageettani, waan jed'ani, d'iirafi nad'eeni wolbarate gaarayu woliini intolfatini.

²⁸Ammo waan anini isaniini jed'u, Nami d'araani nad'eeni millatu yayu garaa ufi keesati waan hamtu tolche.

²⁹ Yo ilti tante mirgitiini si wollaalchifte, ufi keesaa baasi, gati! Yo atini ila toko d'abde ira sii jirtii, fulla nafa kanke ch'ufa ibida keesa buusani.

³⁰ Ammalle yo harki kanke mirgichi si wollaalchise, ufira kuti, gati! Yo atini harka toko d'abde ira sii jirti, fulla nafa kanke ch'ufa ibida keesa buusani.

³¹ Ammalle duri waan jed'ani, Nami niiti ufi lakisu fed'u ha tatabe lakisaniini kutufi.

³² Ammo waan anini isaniini jed'u, Nami niiti ufi ta d'iira d'ibi imbaranne lakise ya daba keesa isi seensise; nami isi fuud'uleeni daba tolcha.

³³ Ammalle, ya d'ageettani aka worra duritiini, D'araani inkakhatiini, ammalle kakhu tante Waaqa durati guuti jed'ani.

³⁴Ammo waan anini isaniini jed'u, Diqole inkakhatina, gubbaleeni; wonti akanatiifi isiini barch'uma Waaqati;

³⁵ yokhaani lafaleeni; isiini fulla Waaqi miila keyatu; yokhaani Yerusalemuleeni, isiini dira Hayyu Guddaati.

³⁶Ammalle mata kankeleeni inkakhatiini; wonti akanatiifi rifeensa kanke tokole dandeete inadeesitu, yokhaani inguraateesitu.

³⁷Wonti isani jettani ch'ufti ha Eetiifi Hiyyo ch'allaa taatu, ta tana ira Sheet'ana keesaa baati.

³⁸ Duri, ya d'ageettani, waan jed'ani, Nama ila nama basse, ila isaale ha bassani; ka ilkaani nama ch'abse, ka isaale ha ch'absani jed'ani.

³⁹Ammo waan anini isaniini jed'u, nama waan hamtu isani tolchu haalo infuud'iina. Yo boqo mirgiti si d'abanaasani bitatile iti garagalfad'u.

⁴⁰Ammalle yo nami toko si himate ubaara kanke siraa baafate, kootile baafad'ufi.

⁴¹Ammalle yo nami si dabse irreeni haga gabaaba si deemsise haga fago gula deemi.

⁴²Nama wo si kad'atu kenni; ka wo liqefatu ind'owatiini.

⁴³ Duri, ya d'ageettani, waan jed'ani, Oboleesa kanke jaalad'u, nyaapa kanke jibbi.

⁴⁴Ammo waan anini isaniini jed'u, Nyaapa keesani jaalad'a, nama isani gaargalchu Waaqa kad'ad'a,

⁴⁵aka isani ilmaani Abba keesani ka gubba jiru taatani. Inni adu nama hamamafi dadansale baase, bokayale nama d'ugatiifi nama d'arale rooba.

⁴⁶Yo nama isani jaalatu ch'alla jaalattani, gati maani Waaqa ira argattani? Worri damoosa guuruleeni akasuma tolchaniti?

⁴⁷Yo oboleyaani teesani ch'alla nagaya fuutani, nama d'ibi maaniini ira jirtani? Worri Waaqa imbeenneleeni akasuma tolchaniti?

⁴⁸Isani qit'e tahu maltani, akuma abbaani keesani ka gubba qit'e.