Read BORANA BIBLE – KITAABA WAAQA Mariko 1 Bible Online

Mariko 1 - BORANA BIBLE – KITAABA WAAQA bible

Mariko 1

¹Oduuni Dansaani ta Yeso Kristo Ilma Waaqa tana.

²Isiini akuma raagi Isayani duri t'aafe jirti: Kuno, anini ergattu tiyya si dura erga, aka kara sii mid'aasitu.

³Qonqooni nama lafa alooti iyu waan jettu: Kara Aabbo kurfeesa, daandi isaa qajeelcha!

⁴Yohanani lafa gamooji d'ufe, aada batiso jed'ani biyya kenne waan jed'e, Daba iraa deebia, aada batiso fud'ad'a, aka Waaqi daba keesani isanii araaramu.

⁵Nami Yudeatiifi ka Yerusalemu keesa jiruleeni ch'ufti d'aqe Yohana ch'aqase. Daba ufi himatani jennaani inni galaana Yordani keesati worraa batiso kenne.

⁶Woyaani Yohana rifeensa galati, gurda hid'aanati hid'ate, awaanisafi damma nyaate.

⁷Inni odeese waan jed'e, Eegi tiyya, ka nara jiruti d'ufa, ka seemsa kobe isaa anini gajed'e hiikhu himmalini.

⁸Anini bisaaniini isani batisa, ammo inni Lubbu Qulqullooni isani batisa.

⁹Bara suni Yesoni Nazareti ta lafa Galilaya jirtu bahe, Yordani d'aqe, aka Yohanani isa batisu.

¹⁰Akuma Yesoni bisaani keesaa baheeni, inni gubba banamte, Lubbu bifa sabaliisa qabdu, ta isa gubba buutu, arge.

¹¹Qonqooni gubba baate waan jette, Atini Ilma kiyya tokocha, ka guddo na gammachiisu.

¹²Jennaani Lubbuuni diidati isa baafte.

¹³Inni bulti afurtama diida keesa tae, Sheet'ani isa ilaalate. Inni bineensa ala jiddu tae, malaikaani d'ufte isa qorqoratte.

¹⁴Eegi Yohana qabani, Yesoni Galilaya d'aqe, Odu Dansa ta gara Waaqaati d'ufte odeese,

¹⁵waan jed'e, Hojjaani yayu geete, Finni Waaqa la d'iaate, daba iraa deebia, Odu Dansa d'ugefad'a jed'e.

¹⁶Ato inni d'aatu galaana Galilaya deemu, Simonifi oboleesa isaa Andarea, ka t'urura qurt'umi galaana keesa buusani, arge; worri guurtu qurt'umiiti.

¹⁷Yesoni waan worraani jed'e, Na gula koota, anini guurtu nama isani tolcha.

¹⁸T'urura ufi achumati lakisani hurrisani isa gula yaani.

¹⁹Diqo deemnaani, inni Yakobo ilma Zebedayotiifi Yohana oboleesa isaa arge. Worri hobolo keesati t'urura qurt'umi mid'aafachu jira.

²⁰Inni akuma argeeni yaame, duuba abbaafi hojattu isaani hobolo keesati lakisani isa gula yaani.

²¹Yesofi jari isaa dira Kapernaumu d'umnaani, guyya Sabato Yesoni Mana Waaqa iti kad'atani seene biyya barsiise.

²²Biyyiti waan inni barsiise guddo maadefatte, waan inni aka jara Seera beekhu imbarsiimne, ammo aka nama humna qabu barsiiseefi.

²³Hojja suni nami toko ka jinni qabu Mana Waaqa suni keesa seene

²⁴iye waan jed'e, Atini maani nura qabda, Yeso Nazareti? Nu balleesu d'ufte? Anini si beekha, atini Qulqullo Waaqaati.

²⁵Yesoni jinni d'owe, Ch'allisi, isa keesaa bahi jed'eeni.

²⁶Jinniini taani isa hargufte, lalabde, iyite baate.

²⁷Biyyiti ch'ufti guddo maadefatte waan woliini jette, Taka agartani d'ageetani? Barsiisaani hareetiini tuni maal? Nami kunini guddo jabeenna qaba. Yo inni dubbatu jinnileeni insarmitifi.

²⁸Maro tokotu gurri isaa arda lafa Galilaya ch'ufa gahe.

²⁹Mana Waaqa keesaa bahani, jennaani Yakobofi Yohana woliini, mana Simonifi Andarea d'aqani.

³⁰Jaartiini soda Petro, qanno fuute ch'iifti, akuma Yesoni achiini baheeni iti himani.

³¹Inni gara isi d'aqe, harka qabe olkaase. Qannooni isi iraa galte, isiini worra gololchite.

³²Lafti galgaloomnaani, nama fayya inqamneefi ka jinni qabu ch'ufa isatiini d'ufani.

³³Nami dira ch'ufti balbala durati wolti bahe.

³⁴Inni nama d'ukuba gosa ch'ufa qabu fayyise, jinni heddule nama keesaa baase, isi dubbachu d'owe, waan isiini isa beetuufi.

³⁵Boriyya, afaani bari, Yesoni kae, fulla nami injirre d'aqe Waaqa kad'ate.

³⁶Ammo Simonifi waheli isaa Yeso barbaadani;

³⁷isa arginaani waan jed'aniini, Nami ch'uftumaani si barbaaduu jira.

³⁸Inni waan jed'eeni, Koota, dira iti aanu yaana, aka achileti hasau; anini waan kanaafi d'ufe.

³⁹Jennaani inni lafa Galilaya ch'ufa keesa dedeeme, maneeni Waaqa iti kad'atani keesati hasae, jinni nama keesaa yaase.

⁴⁰Nami toko ka qomaat'a qabu isati d'ufe, miilati jige waan jed'eeni, Yo sila atini na fayyisu feete, indandeeta jed'e.

⁴¹Yesoni naheefi, harka d'eerefate, isa qabate waan jed'e, Imfed'a, fayyi.

⁴²Maro tokotu qomaat'aani isa iraa bade, inni fayye.

⁴³Jennaani Yesoni aka jaba isa gorse, ufi biraa deemsise,

⁴⁴waan jed'eeni, Eegad'u, nama tokoleti inhimini. Ammo deemi, qaallicha gudda ufi agarsiisi, sorio Musa iraa d'ufte qali, aka nami fayya te argu.

⁴⁵Ammo namichi kaani achi deemnaani akuma arge fulluma ch'ufati hasae. Waan kanaafi Yesoni d'ossa male dira tokole seenu dad'abe, ammo ala tae biyyiti fulluma ch'ufa isati d'ufte.