Read BORANA BIBLE – KITAABA WAAQA Mariko 16 Bible Online

Mariko 16 - BORANA BIBLE – KITAABA WAAQA bible

Mariko 16

¹Guyyaani Sabato dabarraani, Mariamu Magdalenefi Mariamu haad'a Yakobotiifi Salomeni waan urgooftu bitani, aka d'aqani nafa Yeso dibani.

²Duuba ganama guyya qara ka torbaani suni, eegi aduuni baate, fulla awaala d'aqani.

³Waan woliini jed'ani, Eentu d'akha afaani awaalati nuu gangalcha?

⁴Millannaani, d'akha guddo gudda kaani ka dudduubati gangalchani argani.

⁵Awaala seenani, gurba kaima toko, ka woya adi uyifate gama mirgaa tau argani, guddo mamani.

⁶Inni waan jed'e, Himamiina; isani Yeso Nazareti ka fannisani barbaaddani. Inni la kae, arma injiru! Ilaala, kuno, fulla isa qara kayani.

⁷Ammo beena, jara isatiifi Petroti hima, Inni isani durati Galilaya d'aqa, achiti isa argitani jed'aani, akuma duri inni isaniti hime.

⁸Nad'eeni taani sodaatte holatte kaate, fulla awaalati baqatte. Namunu womale injenne, maro sodaatteefi. [

⁹Yesoni ganama guyya qara ka torbaani duisa keesaa kae. Jennaani qara Mariamu Magdalene, ta inni jinni torba keesaa baase iti mullate.

¹⁰Isiini d'at'e jara duri isa woliini jiruti himte, ato worri iye bohu.

¹¹Ammo aka inni duisa keesaa kae, ammalle aka isiini isa argite d'ageennaani, d'ugefachu didani.

¹²Eegi suni, Yesoni nama lamati bifa d'ibiini mullate, ato worri gara lafa oobru yau.

¹³Worri deebie, jara kaaniti hime, ammo d'ugefachu didani.

¹⁴Eegi suni, Yesoni jara kud'ani tokoti mullate, ato worri sagale nyaatu. Inni worraani lole waan worri d'ugefacha d'abe, nama eegi inni duisa keesaa kae isa arge, worrati hime d'ugefachu dideefi.

¹⁵Inni waan worraani jed'e, Lafa ch'ufa keesa yaa, Odu Dansa nama ch'ufati odeesa.

¹⁶Nami d'ugefate batifamu imbaafama, ammo ka ind'ugefanne wollaala iti murani.

¹⁷Ammalle akheekhi kuni worra d'ugefatu keesa mullata: maqa kiyyaani jinni nama keesaa baasani; afaani d'ibiini dubbatani;

¹⁸yo bofa harkaani qabani olfuud'ani, yokhaani had'ale d'ugani woma intahani; nama fayya inqamne harka ira kayani fayyisani.

¹⁹Eegi Aabbo bo Yesoni jara ufiti dubbate, inni gubbati oldeebie, harka Waaqa mirgaani tae.

²⁰Jari isaa yae, fulla ch'ufati dubbi Waaqa hasae; Aabboleeni worra woliini hojate dubbi jabeese, maro akheekha ka worri tolcheefi.]