Read BORANA BIBLE – KITAABA WAAQA Mariko 2 Bible Online

Mariko 2 - BORANA BIBLE – KITAABA WAAQA bible

Mariko 2

¹Eegi bulti diqo, Yesoni Kapernaumuti gallaani, biyyiti aka inni gale d'ageete.

²Nami hedduuni wolti bahe, afaani balbalale fulla bahaniini d'abani. Inni dubbi Waaqa worrati hasae.

³Jennaani nami afuri nama toko ka kokotae baate isatiini d'ufe.

⁴Ammo maro gumitiifi Yesoti d'iaachu dad'abani. Jennaani gubba mana saaqani gararo isaa, afaani iti tolchani, wosaasa namichi ira ch'iisu gadi buusani.

⁵Yesoni d'ugefacha jara kana arginaani, waan nama kokotae kaaniini jed'e, Gurba, daba kanke ya si araaramani.

⁶Jari Seera beekhu ka achi jiru garaa ufi keesati waan jed'e,

⁷Namichi kuni akami akana dubbata? Waaqa arabsayu? Eentu dandae daba nama araarama, Waaqa male?

⁸Jennaani Yesoni aka worri garaa ufi keesati waan kana heregu beennaani waan jed'eeni, Isani maafi waan akana kana garaa keesani keesati hereddani?

⁹Tamiti ira laaftu, aka nama kokotae kanaani, Daba kanke la si araaramani jed'ani mo, Kai, wosaasa tante fud'ad'u, gali jecha?

¹⁰Ammo aka Ilmi Nama lafa tana irati jabeenna daba nama araaramuuni qabu argitani,

¹¹inni namicha kokotae kaaniini waan jed'e, Kai, wosaasa tante fud'ad'u, gali jed'e.

¹²Inni kae, wosaasa ufi fud'ate, nama ch'ufa durati iti d'aabate. Tanaafi nami ch'ufti mame, Waaqa guddisani waan jed'ani, Nu waan akana kana taka ingarre.

¹³Yesoni ammalle gara galaana d'aqe, gumiini isati d'umnaani barsiise.

¹⁴Ato inni deemu, Lawi, ilma Alfayo, ka mana damoosa keesa tau arge waan jed'eeni, Na gula kooti. Inni kae, Yeso gula deeme.

¹⁵Eegi suni Yesoni mana Lawi keesati sagale nyaate. Jara damoosa guurufi nami daba qabu hedduuni, ka Yeso gula yau, Yesofi jara isaa woliini tatae sagale nyaate.

¹⁶Jari Seera beekhu ka Farisayo, isa nama daba qabuufi jara damoosa guuru woliini sagale nyaatu arginaani, waan jara isatiini jed'e, Inni maafi jara damoosa guurufi nama daba qabu woliini sagale nyaata? jed'ani gaafatani.

¹⁷Yesoni waan kana d'ageennaani waan jed'eeni, Nami fayyaa qabu ch'ireesa imbarbaadu, ammo ka fayya inqamneti barbaadata. Anini nama d'uga yaamu ind'umne, ammo maro nama dabaatiifi d'ufe.

¹⁸Jari Yohanatiifi ka Farisayo gaafasi ufi agabsa. Biyyiti isati d'ufte waan jetteeni, Jari Yohanatiifi ka Farisayo maafi ufi agabsa, ka jari kanke ufi inagabsine?

¹⁹Yesoni waan jed'eeni, Keessumaani fuud'a dandeete agabdi? Hiyyo. Haga abbaani fuud'a worra woliini jiru dandaani ufi inagabsani.

²⁰Ammo hojjaani ind'ufti, ta abba fuud'a worra biraa fuud'ani, yoosi guyya suni ufi agabsani.

²¹Nami woya hareeti kooti dullatiti inerbu. Yo akasi tolche, woyaani hareetiini woya dullati tarsaafte tarsaani guddatti.

²²Nami daad'i hareeti gorjo dullatiti naqu injiru. Yo akasi tolche, daad'iini gorjo tarsaafte, daad'iifi gorjoleeni imbaddi. Ammo daad'iini hareetiini gorjo hareeti malte.

²³Guyya Sabato toko, ato Yesoni oobru dargaye keesa deemu, jari isaa dargaye t'ururate nyaate.

²⁴Farisayooni waan isaani jette, Me ilaali, worri maafi waan fulla intahiini guyya Sabato tolcha?

²⁵Yesoni waan worraani jed'e, Isani waan Daudini duri gaafa isaafi jari isaa sagale d'abe beelae jennaani tolche insoomne?

²⁶Inni bara Abiatharini qaallicha gudda, Mana Waaqa seene qit'a Waaqa baasani nyaate, ka sila Seera gula qaalole male nami d'ibiini nyaachu himmalini; ammalle jara isa woliini jirule qoode.

²⁷Inni waan worraani jed'e, Sabato maro namatiifi mid'aasani male, nama maro Sabatotiifi inuumne.

²⁸Tanaafi Ilmi Nama abba Sabatooti.