Read BORANA BIBLE – KITAABA WAAQA Mariko 8 Bible Online

Mariko 8 - BORANA BIBLE – KITAABA WAAQA bible

Mariko 8

¹Eegi suni, hojja gumiini guddooni ta sagale inqamne wolti baate, Yesoni jara ufi yaame waan jed'eeni,

²Anini gumi tanaa naha, waan isiini guyya sadi na woliini oolte, ammalle amma waan nyaattu inqamneefi.

³Yo anini beelaani galche, karaati gagabani, wonti akanatiifi nami gari fago d'ufe.

⁴Jari isa waan jed'e, Isi nami dandae lafa aloo tana keesati gumi hagana geetu tana inqufsa?

⁵Inni, Qit'a hagami qabdani? jed'e gaafate. Torba jed'ani.

⁶Jennaani gumi teteesise qit'a torbaanu fuud'e galata Waaqa deebise, qit'a ch'ach'abse jara isaati kenne, biyya gololcha jed'eeni. Jennaani jari biyya gololche.

⁷Worri qurt'umi didiqo toko qaba. Yesoni eebimnaani, jara isatiini, Tanale biyyaa kenna jed'e.

⁸Nyaatani quufani, hamba dadu torba guutani.

⁹Nami nyaate kunki afurifa. Jennaani Yesoni biyya ufira galche,

¹⁰hobolo seene, jara isaa woliini lafa Dalmanutha jed'ani d'aqe.

¹¹Farisayooni d'ufte, Yesoni woi mormite, akheekha gubba isa iraa barbaade aka isa ilaalattu.

¹²Inni maadefate waan jed'e, D'alooti kuni maafi akheekha barbaada? D'uguma wonti anini jed'u akheekha tokole d'aloota kanaa inkennani.

¹³Worra biraa deeme, hobolo keesa seene, gama kaaniti taake.

¹⁴Jari isaa qit'a woreega ka isaani gahu fud'achu ded'ee, qit'a toko ch'allati hobolo keesa jira.

¹⁵Yesoni waan Jara isatiini jed'e, Bukho Farisayootiifi ta Herode ira ufi eega.

¹⁶Worri waan woliini jed'e, Isii inni waan qit'a inqamneefi akasi jed'e.

¹⁷Yesoni waan worri jed'e, Beennaani waan worraani jed'e Maafi waan qit'a inqamneefi dubbattani? Ammalle imbeetani yokhaani inhubatani? Qalbiini teesani guddo wo inhubattu.

¹⁸Isani ila qabdani ammo woma inagartani? Gurra qabdani ammo ind'ageetani? Isani woma inqaabatani?

¹⁹Gaafa anini qit'a shani ch'ach'abse nama kunki shani nyaachise, isani hamba dadu hagami guurtani? Worri waan jed'e kud'ani lama!

²⁰Ammalle gaafa anini qit'a torba ch'ach'abse nama kunki afuri nyaachise, isani hamba dadu hagami guurtani? Worri! Torba jed'e.

²¹Inni waan worraani jed'e, Isani ammalle inhubanne re?

²²Yesofi jari isaa Bethsaida d'ufani. Biyyiti nama balla isatiini d'ufte, aka inni isa tuqu kad'atte.

²³Namicha balla harka qabe, olla keesaa alati baase, ila isaa hanch'ufa iti tufe, harka ira kaye, Woma garta? jed'e gaafate.

²⁴Ilti banamnaani, inni millate waan jed'e, Anini nama arga, ammo aka mukha yau fakaatani.

²⁵Ammalle Yesoni harka ufi ila isaa ira kaye. Duuba namichi millate fayye, waan ch'ufa aka dansa arge.

²⁶Yesoni iti d'aame waan jed'eeni, beeni gali ammo olla sunti indeebiini.

²⁷Yesoni jara ufi woliini ollowaani lafa Kaisaria Filipi jed'ani d'ufe. Kara keesati inni jara ufi gaafate waan jed'e, Biyyiti eennu naani jetti? jed'e.

²⁸Worri waan jed'e, Nami gari Yohana nama batisu jed'a, ka gari Eliya jed'a, ammo ka gari raaga duri toko jed'a.

²⁹Inni worra gaafate waan jed'e, Isani ufi eennu naani jettani? Petroni waan jed'eeni, Atini Kristo.

³⁰Jennaani inni worraa seere, aka nama tokoleti inhimne.

³¹Jennaani inni worra barsiise waan jed'e, Ilmi Nama guddo gaargalu male, jaarolefi qaalole gugurdofi jari Seera beekhuleeni isa mormachu male. Isa ijeesani, ammo inni guyya sadeeso inkaa jed'e.

³²Inni jecha kana diideese dubbate. Petroni isa koba fuud'e, Jecha kana injed'ini! jed'e d'owe.

³³Ammo Yesoni garagale, jara ufi ilaale, Petro d'owe waan jed'e, Nara fagaad'u, Sheet'ana! Atini waan Waaqa inhereddu, waan nama ch'alla heredda.

³⁴Jennaani Yesoni jara ufi wolti yaame waan worraani jed'e, Yo nami na gula deemu fed'e, ha ufi mormate, maskali ufi baate na gula deemuti.

³⁵Wonti akanatiifi nami jireenna ufi baasu fed'u ch'ufti ind'aba, ammo nami maro kiyyafi maro Odu Dansaatiifi jireenna ufi balleesu inargata.

³⁶Maal namaa baati, yo nami waan lafa tana ch'ufa argate, ammo jireenna ufi d'abe? Woma tokole imbaatu.

³⁷Nami dandae woma tokole imbaasu, aka jireenna ufi argatu.

³⁸Yo nami tokoleeni anaafi dubbi tiyya dide, d'aloota hama Waaqa didu kana keesati, Ilmi Namaleeni isa indida, gaafa inni guddinna Abba ufitiini d'ufu, malaika qulqullo woliini.