Read BORANA BIBLE – KITAABA WAAQA Luka 13 Bible Online

Luka 13 - BORANA BIBLE – KITAABA WAAQA bible

Luka 13

¹Hojuma suni jari toko Yesoti d'ufe waan jed'eeni, Pilatoni yayu worra Galilaya toko ka sorio qalatu fit'e, d'iiga worraatiifi ka sorio wolti makhe jed'ani jed'e.

²Yesoni waan jed'eeni, Waan jari Galilaya suni nama Galilaya ch'ufa ira dabe seetani, waan worri akasi gaargala argateefi?

³Waan anini isaniini jed'u, Hiyyo, akasiiniti. Ammo yo isanileeni daba iraa deebiu baatani akasuma baddani.

⁴Yokhaani worra kud'ani saddeeti kaani, ka mani Siloamu irati jige fit'e, waan worri nama ch'ufa ka Yerusalemu keesa jiru ira dabe seetani?

⁵Waan anini isaniini jed'u, Hiyyo, akasiiniti. Ammo yo daba iraa deebiu baatani isanileeni akasuma baddani.

⁶Jennaani Yesoni mammaasa kana worrati hime waan jed'e, Nami toko mukha odaa oobru ufi keesati oobre; d'ufe mid'aani ira barbaade d'abe.

⁷Waan inni nama oobru eeguuni jed'e Ilaali, ganna sadi mid'aani mukha odaa kana iraa fed'ad'e d'abe. Muri; maafi lafa d'owata?

⁸Ammo inni waan jed'eeni, Aabbo, ganna kanale laki, haga anini qote kossi jalati naquuti.

⁹Duuba yo mid'aani ganna d'ufu baase dansa; ammo yo imbaasiini imurta.

¹⁰Guyya Sabato Yesoni mana Waaqa iti kad'atani toko keesati nama barsiisu jira.

¹¹Niitiini toko ta jinniini haga ganna kud'ani saddeeti fayya d'owarte achi jirti; isiini gajette dandeete aka dansa olinqajeltu.

¹²Yesoni isi arginaani yaame waan jed'eeni, Aato, atini fayyad'aba kanke ya fayyite!

¹³Harka isi ira kaye, isiini hojuma suni olejatte Waaqa faarsite.

¹⁴ Ammo guddaani mana Waaqa iti kad'atani aka Yesoni guyya Sabato nama fayyisu arginaani dalane waan gumiini jed'e, Guyya jaati jira ka huji tolchani; tanaafi guyya suni koota aka fayyitani, ammo guyya Sabato ind'ufiina.

¹⁵Jennaani Aabbooni waan jed'eeni, Isani kiyyibdoole, isani ch'ufti guyya Sabato loonifi harre teesani bobbaaftani oba ind'ooftani?

¹⁶Jaartiini tuni, ta dubra Abrahamu, ta Sheet'ani ganna kud'ani saddeeti hid'e, guyya Sabato hid'aansa kana keesa bahu himmalle?

¹⁷Akasi jennaani nyaapi isaa ch'ufti ch'eere; gumiini ch'ufti waan dansa inni tolcheefi gammadde.

¹⁸Inni duuba waan jed'e, Finni Waaqa maani fakaata? Maani woli fakeesa?

¹⁹Guma dambi toko fakaata, ta nami fuud'e oobru ufiti fach'aasu; late bahe, mukha gudda tahe, simpirreeni dame isaa gubbaa mana jaaratte.

²⁰Ammalle Yesoni waan jed'e, Finna Waaqa maani wolfakeesa?

²¹Bukho fakaata, ta nad'eeni fuute mid'aani guddo ka daakhaniti nat'u, haga ch'ufti bukhaaniti.

²²Yesoni ato Yerusalemuti deemu diraafi ollowaani keesa dedeeme barsiise.

²³Nami toko waan jed'eeni, Aabbo, nami baafamu diqa? Inni waan worraani jed'e,

²⁴Mit'it'ama aka balbala d'ipooni olseentani; wonti akanatiifi, waan anini jed'u, nama hedduti seenu fed'a ammo indandaani.

²⁵Hojja abbaani mana kae balbala ch'ufe, isani ala ejaanjitani balbala d'od'ooftani waan jettani, Aabbo, nu bani, Inni waan isaniini jed'u, Anini fulla isani baataniifi imbeekhu.

²⁶Duuba isani waan jettani, Nu woliini teteenne nyaanne d'unne, atini dira keenna keesati barsiifte.

²⁷ Ammo inni waan jed'u, Anini fulla isani baataniifi imbeekhu. Fuula kiyya dura fagaad'a, isani ch'ufti worra dabaati.

²⁸ Achiti bootani ilkaani qartani hojja Abrahamufi Isaaqofi Yakobofi raaga ch'ufa Finna Waaqa keesati agartani; ammo isani alati gatani.

²⁹Nami mirga bitaa d'ufe, oli gadi d'ufe, Finna Waaqa keesati sagale nyaatani.

³⁰Guyya gaafasi nami eege ka qara taha, nami qara ka eege taha.

³¹Hojuma suni Farisayooni d'ufte waan jetteeni, Arma baqad'u, Herodeni si ijeesu fed'a.

³²Yesoni waan worraani jed'e, Beena, waan geedala suniini jettani, Anini arrafi bori jinni baase nama fayyisa, guyya sadeeso huji tiyya inhobaafad'a.

³³Ammo kara kiyya qabachu male arrafi borifi iftaanile; wonti akanatiifi raagi Yerusalemu male fulla d'ibiti duu himmalle.

³⁴Ee Yerusalemu, Yerusalemu, atini raagoota fitt'e, jara siti ergani d'akhaani d'aante! Maro hagami sila ijoolle tante ufi jalati guura, aka lukuuni ilmoole ufi koola ufi jalati guurtu, ammo atini indidde.

³⁵ Me ilaala, Mani kanke ona taha. Waan anini isaniini jed'u, Na inargitani haga, Waaqi nama maqa Aabbootiini d'ufu ha eebisu jettaniti.