Read BORANA BIBLE – KITAABA WAAQA Luka 15 Bible Online

Luka 15 - BORANA BIBLE – KITAABA WAAQA bible

Luka 15

¹ Duuba jara damoosa guurufi nami dabaleeni ch'ufti Yesoti d'iaate isa ch'aqase.

²Farisayoofi jari Seera beekhu gungumani waan jed'ani, Namichi kunini worra daba yaame sagale woliini nyaata.

³Tanaafi inni mammaasa kana worrati hime:

⁴Isani keesa, nami hooliye d'ibba toko qabu, ka hojja toko keesaa bade sagaltami sagalaani taani d'eedati lakise tokocha bade suni, haga argatuuti, barbaada indeemne eennu?

⁵Yo argate, gammade gurmu ira keyate,

⁶worrati galche, jaalaanifi olla ufi wolti yaame, Koota, na woliini gammada, hoola kiyya ka bade ya argad'e jed'u.

⁷Waan anini isaniini jed'u, Akuma suni gammadi guddaani gubba jira, hojja nami daba toko daba iraa deebie, fulla nama d'uga sagaltami sagali ka waan iraa deebiufi inqamne.

⁸Yokhaani niiti tamiti ta qarsi kud'ani qabdu, hojja toko iraa bade ifsa bobeesite mana harte aka dansa imbarbaanne haga argattuuti?

⁹Yo argatte, jaalaanifi olla ufi wolti yaamte waan jettuuni, Na woliini gammada, waan anini qarsi tiyya ta badde argad'eefi.

¹⁰Waan anini isaniini jed'u, Akasuma malaikaani Waaqa gammaddi, hojja nami toko ka daba qabu daba suni iraa deebiu.

¹¹Ammalle Yesoni waan jed'e, Duri nama tokoti jira ka ijoolle lama qabu.

¹²Maand'ichi waan Abbaani jed'e, Aabbo, hori hand'ura kiyya naa qoodi. Jennaani inni hori worra, lachuyu qoode.

¹³Eegi bulti diqo toko ilmi maand'ichi hand'ura ufi gurgure, ch'ufa beese deebise, kae lafa fago d'aqe; achiti hori ufi kara hamaani maro tokotu nyaate balleese.

¹⁴Ch'ufa hobaamnaani beelti taka inargiini lafa suni d'ufte, inni harka duwa hafe.

¹⁵Duuba inni gara nama toko ka lafa suni huji barbaadachu d'aqe. Booyye tissi jed'aniini.

¹⁶Inni beelae ufi jibbaate jennaani qola booyyeeni nyaattu nyaachu fed'e, ammo taatule namu woma iti inkennine.

¹⁷Badi ufi arginaani waan jed'e, Hojattu Abba kiyya hagamiti sagale quufe hambisa, ka anini armati beelaani duu.

¹⁸Anini kae gara Abba kiyya gale waan jed'uuni, Aabbo, anini yayu wollaale, siifi Waaqa duraleti.

¹⁹Armaa achi ilma kanke naani jechu himmalle; akuma nama sii hojatu na heregi.

²⁰Duuba kae gara abba ufi gale. Ammo ato inni fago jiru, Abbaani isaa isa arge naheefi isati utaale iti jige d'ungate.

²¹Gurbaani kaani waan jed'eeni, Aabbo, anini yayu wollaale, siifi Waaqa duraleti. Armaa achi ilma kanke naani jechu himmalle.

²²Ammo Abbaani waan hojattu ufitiini jed'e, Woya ta ch'ufa ira dansaatiini koota, isati uyisa, qube quba isati kaya, kopele miila isati naqa.

²³Raada gabbooni koota, qala, nyaanne gammanna.

²⁴Wonti akanatiifi ilmi kiyya kunini qara ya due ammo amma la kae; qara ya bade ammo amma la gale jed'e. Duuba gammadaani jila tolfatani.

²⁵Ilmi angafa kaani hojja suni oobru keesa jira. Ato galu manati d'iaannaani, sirbafi taba d'agaye.

²⁶Hojattu toko yaame waan jed'eeni, Wonti kunini maani?

²⁷Duuba inni waan jed'eeni, Oboleesi kanke gallaani abbe raada gabbo taani qale, waan inni nagayaa fayyani galeefi.

²⁸Ammo angafi kaani dalane oli seenu dide. Abbaani isati gadi bahe isa sobate, Oliseeni jed'eeni.

²⁹Ammo inni waan abbaani jed'e, Ilaala ganna heddu kana ch'ufa anini si hojad'e, seera kanke tokole inch'absine, ammo atini taka rupa reele guyya tokole naa inkennine, aka anini jaalaani tiyya woliini gammadu.

³⁰Ammo ilmi kanke kunini ka hori kanke sharmut'a irati hobaase d'umnaani atini raada gabbo taani qalteefi.

³¹Abbaani waan jed'eeni, Gurba, atini hojja ch'ufa na woliini jirta, wonti kiyya ch'ufti keetuma.

³²Aki nu gammada tolchinu fullaa; wonti akanatiifi oboleesi kanke kunini qara ya due ammo amma la kae, qara ya bade ammo amma la gale.