Read BORANA BIBLE – KITAABA WAAQA Luka 18 Bible Online

Luka 18 - BORANA BIBLE – KITAABA WAAQA bible

Luka 18

¹Jennaani Yesoni mammaasa kana worrati hime, aka nami guyya ch'ufa Waaqa kad'achu illakimne.

²Inni waan jed'e, Dira toko keesa nama dubbi qoru tokoti jira ka Waaqafi namale insodaanne.

³Ammalle dira suni keesa niiti hiyyeeti tokoti jira, ta guyya ch'ufa gara isaa d'at'e, Nama tokoti na dabse, dubbi tana na ilaali jettuuni.

⁴Guyya heddu dide, ammo eege garaa ufi keesati waan jed'e, Ato anini Waaqafi namale sodaachu, baad'e,

⁵waan niitiini tuni na gaargalchitufi anini dubbi isii inqora, aka isiini hojja ch'ufa d'ufte na ingaargalchine.

⁶Aabbooni waan jed'e, Waan namichi d'artichi dubbi qoru kunini jed'u d'agaya.

⁷Waaqi jara inni fohate, ka halkani guyya isa yaamatu, indubbatufi? Inni hurrise inqarqaaru?

⁸Waan anini isaniini jed'u, Inni hurrise d'uga worraa qora. Ammo Ilmi Nama, yo d'ufe, d'ugefacha lafati arga?

⁹Yesoni mammaasa kana jara gari ka ufi d'ugefate qulqullo ufi sehe biyya tuffatuti hime waan jed'e,

¹⁰Nami lama Mana Waaqa olduude aka Waaqa kad'atu; toko Farisayo, kaani nama damoosa guuru.

¹¹Namichi Farisayo kaani koba ejate garaa ufi keesati Waaqa kad'ate waan jed'e, Ee Waaqa, anini sabdiniti, d'ara indubbad'u, algalooma indeemu, yokhaani aka namicha kana ka damoosa guuru injiru.

¹²Torbaani toko keesa maro lama agaba, waan argad'e ch'ufa keesaa qooda sii baasa.

¹³Ammo namichi damoosa guuru kaani fago ejate, ila lafa buuse lape qabate waan jed'e, Waaqa naa nahi, anini dabdicha.

¹⁴Waan anini isaniini jed'u, Namichi kuni nama kaani ira mana ufiti d'ugaani gale. Wonti akanatiifi nami ufi guddisu indiqaata, ammo ka ufi diqeesu inguddisani.

¹⁵Biyyiti ijoolle didiqo isaatiini d'ufte aka harka ira kaye eebisu. Ammo jari isaa waan kana arginaani d'owe.

¹⁶Ammo Yesoni ufiti yaame waan jed'eeni, Ijoolleeni ha nati d'uftuuti, ind'owiina; wonti akanatiifi Finni Waaqa ka ijoolle akana tana.

¹⁷D'uguma waan anini isaniini jed'u, Nami Finna Waaqa aka ijoolle didiqo imfud'anne haguma jiru inargatu.

¹⁸Jennaani namichi guddinna qabu toko isa gaafate waan jed'eeni Aabbo dansa, anini maani tolchu male aka jireenna hegeri argad'u?

¹⁹Yesoni waan jed'eeni, Maalifi dansa naani jetta? Nami dansaani tokoleeni injiru, Waaqa male.

²⁰ Atini seera imbeeta, d'iirafi nad'eeni wolbarate garayu wolintolfatini inijeesiini; inhatiini; nama tokole d'araani inhimatiini abbeetiifi haateti saalfad'u.

²¹Inni waan jed'eeni, Waan kana ch'ufa haguma ijoollumati ya guute.

²²Yesoni akasi d'ageennaani waan isaani jed'e, Waan toko fitate; waan atini qabdu ch'ufa gurguri, hiyyeeyi qoodi, duuba hori gubba argatta, duuba deebii, na gula kooti.

²³Ammo waan kana d'ageennaani namichi guddo laalefate, waan inni guddo dureesatiifi.

²⁴Yesoni waan kana arginaani waan jed'e, Aka dureeyiini Finna Waaqa argattu guddo jabaatti.

²⁵Gaala qaa lime seenuti ira laaftu, fulla dureesi Finna Waaqa argatu ira.

²⁶Worri d'agaye kaani waan jed'eeni, Eentu baafamu dandaa re?

²⁷Ammo inni waan worraani jed'e, Wonti namaani intaane Waaqaani intaati.

²⁸Petroni waan jed'e, Ilaali, nu yayu waan ch'ufa lakimne si gula yaane.

²⁹Yesoni waan worraani jed'e, D'uguma waan anini isaniini jed'u, Nami mana yokhaani niiti yokhaani oboleyaani yokhaani abbaafi haad'a yokhaani ijoolle ufi, maro Finna Waaqati jed'e lakise,

³⁰ammatitana waan guddo hagasi iraa argata, eege tanale jireenna hegeri argata.

³¹Yesoni jara kud'ani lamaanu yaame waan jed'eeni, Nu Yerusalemuti olqabanna, duuba wonti ch'ufti ta raagooti waan Ilma Nama t'aafte inguutamti.

³²Harka nyaapati isa kennani, goyeesani arabsani, hanch'ufa iti tufani;

³³lichooni d'aanani ijeesani, ammo guyya sadeeso duisa keesaa kaasani.

³⁴Ammo worri waan kana diqoole inhubanne, jecha kana worra d'ossani, waan Yesoni jed'e worri imid'afanne.

³⁵Yesoni Yerikoti d'iaannaani namichi ballaani toko d'aatu kara tae wo kad'ate.

³⁶Gumi guddo dabartu d'ageennaani, Kunini maal? jed'e gaafate.

³⁷Waan jed'aniini, Yeso Nazaretiti kara kana gula deemu jira.

³⁸Jennaani inni lalabe waan jed'e, Yeso, Ilma Daudi, naa nahi.

³⁹Jari isa dura yayu isa d'owe, Ch'allisi jed'aniini. Ammo inni hagasi ira lalabe waan jed'e Ilma Daudi, naa nahi.

⁴⁰Duuba Yesoni miila d'aabate, Natiini koota jed'e, Inni d'umnaani Yesoni waan jed'eeni,

⁴¹Ana maani si tolchu feeta? Inni waan jed'eeni, Aabbo, lafa argu fed'a.

⁴²Yesoni waan jed'eeni, Lafa argi! D'ugefachaani tante la si fayyifte.

⁴³Hojuma suni lafa arge, Yeso gula deeme Waaqa guddise. Nami ch'ufti arginaani Waaqa faarse.