Read BORANA BIBLE – KITAABA WAAQA Luka 22 Bible Online

Luka 22 - BORANA BIBLE – KITAABA WAAQA bible

Luka 22

¹Jilti Qit'a bukho inqamne, ta Pasaka jed'ani, d'iaate.

²Jennaani qaalole gugurdofi jari Seera beekhu kara Yesoni ijeesani barbaadani, waan biyya sodaataniifi.

³Jennaani Sheet'ani Yuda ka Iskariote jed'ani, ka jara kud'ani lama kaani keesa jiru, seene.

⁴Inni deeme, jaarole gugurdofi worra gugurda askartiti dubbate aka Yeso harka worrati kennu.

⁵Worri gammade, aka hori isaa kennani wold'aqani.

⁶Yudani, Ee jed'e, aka d'ossaani Yeso harka worrati kennu herege.

⁷Guyyaani Qit'a bukho inqamne, ka hoola Pasaka qalani, gahe.

⁸Yesoni Petrofi Yohana erge waan jed'eeni, Beena, sagale Pasaka nu mid'aasa aka nuleeni nyaannu.

⁹Worri waan jed'eeni, Nu eesati mid'aasinu feeta?

¹⁰Inni waan jed'eeni, Hojja dira duuddani nama d'iira ka bute bisaani baatuuni baatani, isa gula yaa, haga mana inni seenu.

¹¹Waan abba manatiini jettani, Aabbooni waan siini jed'u, Mani keessuma me, ka anini Pasaka jara kiyya woliini keesati nyaad'u?

¹²Nami suni mana gubba aanu ka miha qabu isani agarsiisa, achiti mid'aasa.

¹³Deemani akuma inni jed'e argani, Pasaka mid'aasani.

¹⁴Hojjaani golola geennaani, Yesoni jara isaa woliini tae.

¹⁵Inni waan jed'eeni, Anini guddo d'arraa qaba, aka Pasaka tana isani woliini nyaad'u, ato ingaargaliini.

¹⁶Waan anini jed'u, anini deebie inyaad'u haga Pasakaani Finna Waaqa keesati qit'ooftuuti.

¹⁷Jennaani inni mudunu fuud'e eebise waan jed'e, Kana fud'ad'a qoodad'a;

¹⁸wonti akanatiifi waan anini isaniini jed'u, Anini deebie bisaani zabibu, ind'ugu, haga Finni Waaqa d'ufuuti.

¹⁹Jennaani inni qit'a fuud'e, eebimnaani ch'ach'abse, worrati kenne waan jed'eeni, Kunini nafa kiyya [ka maro keesaniifi kennani. Waan kana tolcha na qaabad'a.

²⁰ Akasuma eegi gololfatani mudunu fuud'e waan jed'eeni, Mudunuuni tunini ta d'iiga kiyya, ka isanii jissani, ka wold'aqisa haraa.]

²¹ Ammo ilaala! Harki nama na gurguru ana woliini jira mesa kana gubba!

²²Wonti akanatiifi Ilmi Nama akuma duri hereganiifi deema; ammo gaargala nama isa gurguruti.

²³Worri wolgaafate, Nu kana keesa eentu waan kana tolcha? jed'ani.

²⁴ Worri wolmorme, Nu kana eennuti gudda? jed'e wolgaafate.

²⁵ Yesoni waan worraani jed'e, Aada lafa gula, hayyooti biyya mohatti, ammalle jaallaba worraatiini, Worra guddo nama qarqaaru jed'ani.

²⁶ Ammo isani akasiiniti; nami isani keesa nama ch'ufa ira gudda akuma maand'a ha tahu, ammalle nami nama dura deemu akuma hojattu ha tahu.

²⁷ Eentu ira jira, nami sagale nyaataa tau mo ka gololchu? Nami sagale nyaataa tauniti? Ammo anini jiddu teesani keesati aka nama nama gololchu jira.

²⁸Isani yayu na woliini teetani ilaalacha tiyya ch'ufa keesa.

²⁹Akuma abbaani kiyya hayyuma naa qoode, anileeni isanii qooda.

³⁰Isani mesa kiyya gubbati nyaattani d'uddani, barch'uma guddinna ira teetani gosa kud'ani lama ta Israeli qortani.

³¹Simoni, Simoni, ilaali, Sheet'ani, akuma dargaye hafarsani ya aka isani hafarsu kad'ate argate.

³²Ammo anini yayu sii kad'ad'e aka d'ugefachaani tante inhanqanne. Ammalle atini eegi nati deebite, oboleyaani tante jabeesi.

³³Petroni waan jed'eeni, Aabbo, anini kurfo jira aka si woliini deemu fulla hid'aansatiifi duisale.

³⁴Yesoni waan jed'e, Waan anini siini jed'u, Petro, arra kormi luku iniyu, haga atini maro sadi aka na beetu mormatu.

³⁵ Jennaani Yeso waan worraani jed'e, Gaafa anini subbafi gorjofi kope male isani erge woma d'abdani? Waan jed'aniini, Hiyyo.

³⁶Yesoni waan jed'eeni, Ammo ammatana, nami subba qabu ha fud'atu, ka gorjo qabuleeni ha fud'atu; ammalle nami sheefti inqamne ha woya ufi gurgure bitatu.

³⁷ Wonti akanatiifi, waan anini isaniini jed'u, T'aafiini inni worra ch'ubbu woliini dua jettu, anaani guutamu malte. Wonti akanatiifi wonti waan kiyya t'aafani inguutamti.

³⁸Worri waan jed'eeni, Aabbo, ilaali, sheefti lamati arma jira! Inni waan jed'eeni, Ingeeti.

³⁹Yesoni achii deeme, akuma aada isaa gara Gaara Ejersa jed'ani d'aqe; jari isaleeni isa gula yae.

⁴⁰Arti gahe jennaani waan worraani jed'e, Kad'ad'a aka ilaalacha keesa inseenne.

⁴¹Haga darba d'akha worra bira deeme, jilbifate kad'ate waan jed'e,

⁴²Aabbo, yo feete, mudunu tana nara fuud'i; tatule fed'i tiyyaniti, ammo tante ha taatu. [

⁴³Malaikaani gubba isati mullatte garaa isaa jabeesite.

⁴⁴Waan inni guddo gaargala qabuufi guddise kad'ate; damfi isaa lafati ch'och'obe d'iiga fakaate.]

⁴⁵Kad'achaa kaanaani, jara ufiti d'ufe, worra maro lalefachatiifi rafu arge

⁴⁶waan jed'eeni, Maafi raftani? Kakaa, kad'ad'a, aka ilaalacha keesa inseenne.

⁴⁷Ato inni ammalle dubbatu gumiini d'ufte; Yudani, ka jara kud'ani lama keesa jiru, worra dura deeme. Inni Yesoti hiiqe aka isa d'ungatu.

⁴⁸Ammo Yesoni waan jed'eeni, Yuda, atini d'ungooni Ilma Nama gurguratta?

⁴⁹Jari isa woliini jiru waan kana arginaani waan jed'eeni, Aabbo, sheeftini d'oomna?

⁵⁰Nami toko worra keesa garbicha qaallicha gudda d'ae, gurra mirgicha iraa kute.

⁵¹Ammo Yesoni waan jed'eeni. Ingeeti! Lakisa! Duuba gurra isaa tuqe fayyise.

⁵²Jennaani Yesoni qaalole gugurdofi gugurda askarti Mana Waaqatiifi jaarole isati d'ufteeni waan jed'e, Aka waan hattu qabdani sheeftifi bokuuni d'uftani?

⁵³Guyya ch'ufa nu Mana Waaqa keesa woliini jirra, harkaani na intunne. Ammo hojjaani tuni teesani, ammalle ta jabeenna dukanaati.

⁵⁴Jennaani Yeso qabani gara mana qaallicha gudda geesani, ammo Petroni fago hordofe.

⁵⁵Ibida ch'icha durati bobeesani qanqamatani, Petroni jiddu worra keesa tae.

⁵⁶Intalti toko, ato inni fulla ifsa ibida tau, isa agarte ila iti qabde waan biyyaani jette, Namichi kunileeni isa woliini jira.

⁵⁷Ammo inni mormate waan jed'e, Intala, anini isa imbeekhu.

⁵⁸Diqo eege, nami d'ibileeni isa arge waan jed'eeni, Atileeni nama isaatiiyu! Ammo Petroni waan jed'eeni, Laki, abbo, ananiti.

⁵⁹Haga saa toko teennaani nami d'ibiini ammalle dubbi tana quufu dide waan jed'e, D'uguma namichi kuni isa woliini jira; inni nama Galilayati.

⁶⁰Ammo Petroni waan jed'eeni, Abbo, waan atini jettu anini imbeekhu. Hojuma suni, ato inni dubbatu, kormi luku iye.

⁶¹Aabbooni garagale Petro millate; duuba Petroni dubbi Aabbo qaabate ta inni isaani jed'e, Arra, ato kormi luku iniyiini, atini maro sadi na mormatta.

⁶²Alati gadi bahe laalefate guddo bohe.

⁶³Jari Yeso qabe kaani isa goyeese d'aane.

⁶⁴Ila hid'ani isa gaafatani waan jed'aniini, Fagi! Eentu si d'ae?

⁶⁵Waan, heddu iti dubbatani arabsani.

⁶⁶Lafti bariinaani, jaarole Yahuditiifi qaalole gugurdofi jari Seera beekhuleeni wolwoldaani, Yeso kora geesani waan jed'aniini,

⁶⁷Yo atini Kristo taate, nuti himi. Ammo inni waan worraani jed'e, Yo anini isaniti himele ind'ugefattani.

⁶⁸Yo anini isani gaafad'ele nati inhimtani.

⁶⁹Ammo armaa achi Ilmi Nama jabeenna Waaqa keesa harka mirgaa taa.

⁷⁰Worri ch'ufti waan jed'e, Atini Ilma Waaqati re? Inni waan jed'eeni, Isanu ya akasi naani jettani.

⁷¹Worri waan jed'e, D'uga d'ibi maani iraa feena? Nu yayu d'ageenne waan inni afaani ufitiini jed'e.