Read BORANA BIBLE – KITAABA WAAQA Luka 24 Bible Online

Luka 24 - BORANA BIBLE – KITAABA WAAQA bible

Luka 24

¹Ammo boriyya guyya qara ka torbaani suni, afaani bari, nad'eeni taani gara awaala d'at'e, waan urgooftu ta mid'aasani geesite.

²D'akha awaala ira gangalchani argite,

³keesa duunnaani reefa Aabbo Yeso d'abde.

⁴Ato isiini waan kana mamtu, nami lama, ka woya bibilit'u qabu, worra bira ejaanje.

⁵Sodaatani, lafa ilaalani jennaani worri kaani waan jed'eeni, Maafi nama jiru awaala keesa barbaaddani?

⁶ Inni arma injiru, ammo la kae. Waan inni isaniini jed'e qaabad'a, gaafa inni Galilaya jiru:

⁷Ilma Nama harka nama dabati kennani fannisani, gaafa sadeeso kau male jed'e.

⁸Worri dubbi isaa qaabate,

⁹awaala biraa yae, waan kana ch'ufu jara kud'ani tokotiifi jara d'ibileti hime.

¹⁰Nad'eeni ergattuti himte Mariamu Magdalenefi Yoanafi Mariamu haad'a Yakobotifi nad'eeni d'ibi ta worra woliini jirtu.

¹¹Ammo jechi kunini odu d'araa worraati fakaate d'ugefachu didani.

¹²Taatule Petroni kae gara awaala utaale, d'aqe gajed'e awaala keesa millate, boofta taani ta koba jirtu arge, kae gale, waan tahe kana maadefate.

¹³Guyyuma suni worra keesa nami lama gara olla toko ka Emmao jed'ani, ka haga maili torba Yerusalemu iraa fago, d'aqe.

¹⁴Duuba waan tahe kana ch'ufa woliini hasaani.

¹⁵Ato wolgaafatani hasaanu, Yesoni worrati d'iaate woliini deeme.

¹⁶Ilti worra sapupoofte, fuula isa wollaalaani.

¹⁷Inni waan worraani jed'e, Dubbini isani ato kara yaatani hasooftanu tuni maani? Miila d'aabatani oodani.

¹⁸Jara keesa namichi toko, ka Kleopa jed'ani, waan jed'eeni, Nami Yerusalemu keesa jiru, ka waan achiti d'io tana tahe ind'agayiini sii ch'alla?

¹⁹Inni, Waan akami? jed'eeni. Worri waan jed'eeni, Waan Yeso Nazareti, ka waan tolchanifi waan dubbatanileeni raaga gudda tahe Waaqafi nama ch'ufa duraleti.

²⁰Qaalole gugurdofi jari gugurdaani keenna, qorsumati geese, duisa itimurani mukha irati fannisani.

²¹Ammo nu qara aka inni Israeli baasu abdanne. Tana male, arriti guyya sadeeso haga wonti kunini taate.

²²Ammalle, nad'eeni gari ta gumi teenna diirama kana gara awaala d'at'e guddo nu mamsiifte.

²³Reefa isaa d'amnaani dachaate waan jette, Malaikaani nuti mullatte, Inni injira nuuni jette, jette.

²⁴Jari gari ka nu woliini jiru gara awaala d'aqe, akuma nad'eeni jette arge, ammo isa d'abani.

²⁵Jennaani Yesoni waan worraani jed'e, Isani ka waan raagi jed'e hurriftani ind'ugefanne guddo daalle!

²⁶Kristoni akana gaargale duuba eege guddinna ufi seenu himmalle?

²⁷Haga Musafi raagi ch'ufati iti keyate, waan isaa ka t'aafi keesati t'aafani ch'ufa worraa diige.

²⁸Olla iti yaaniti d'iaannaani, inni aka waan dabru fed'u tahe;

²⁹ammo worri isa sobate waan jed'ani, Fulla teenna buli, aduuni la d'iu geete, guyyaani amma alati inhamne. Duuba inni worra woliini bulisa tahe.

³⁰Worra woliini sagale nyaatani tataani, jennaani qit'a fuud'e eebise, ch'ach'abse qoode.

³¹Ilti worraa banamte isa beekhani, ammo isa akanumati ufi duraa d'abani.

³²Worri waan woliini jed'e, Hojja kara keesati nuuni hasae waan t'aafani nu diige, garaani nu bobaeyu?

³³Hojuma suni kaani Yerusalemuti dachaani, jara kud'ani tokofi jara worra woliini jiru ka wolti woldae

³⁴d'uguma Aabbooni yayu kae, Simoniti mullate jed'u argani.

³⁵Jennaani worri waan kara keesati tahe odeese, aka inni qit'a ch'abse jennaani worri isa beekhe.

³⁶Ato worri waan kana hasau, Yesoni jiddu worraa ejate waan jed'eeni, Galchuumi isani nagaya?

³⁷Guddo sodaatani nahani, waan ekhera argani sehani.

³⁸Ammo inni waan worraani jed'e, Maafi naatani? Maafi garaa keesani keesati birefattani?

³⁹Harkafi miila kiyya ilaala, aka nami naa. Naa qabad'a ilaala, imbeetani ekheraani aka kiyya kana nafafi lafele inqabdu.

⁴⁰Akasi jennaani harkafi miila agarsiise.

⁴¹Duuba mamani gammadani akanaani d'ugefachu dad'abani, tanaafi inni waan jed'eeni, waan nyaatani arma qabdu.

⁴²Qurt'umi diqo ta wodani iti kennani,

⁴³inni fuud'e worra durati nyaate.

⁴⁴Duuba inni waan worraani jed'e, Tunini dubbi tiyya ta anini isaniini jed'e, ato isani woliini jiru; wonti ti kiyya ta kitaaba Seera Musatifi ka raagootatiifi ka Faaru keesati t'aafani ch'ufti guutamu malte.

⁴⁵Jennaani inni qalbi worraa bane, aka waan t'aafani hubatani,

⁴⁶waan jed'eeni, wonti t'aafani, tana; Kristoni gaargale guyya sadeeso kau male,

⁴⁷aka haga Yerusalemu iti keyatani iraa deebitifi araarama daba maqa isatiini gosa ch'ufati odeesu malani.

⁴⁸Isaniti d'uga waan kanati.

⁴⁹ Ilaala, waan Abbaani kiyya isaniti kakhate anati isanii erga, ammo dira keesati eega, haga jabeenni gubba isanii gad'ufuti.

⁵⁰Jennaani haga Bethania worra geese, harka olfud'ate eebiseefi.

⁵¹Ato inni worra eebisu, biraa deeme gubbati oldeebie.

⁵²Worri isa guddise, Yerusalemuti gammadaani dachaani,

⁵³hojja ch'ufa Mana Waaqa keesati Waaqa faarsani.