Read BORANA BIBLE – KITAABA WAAQA Luka 3 Bible Online

Luka 3 - BORANA BIBLE – KITAABA WAAQA bible

Luka 3

¹Ganna kud'ani shaneeso ka Kaisari Tiberioni lafa fide, gaafa Pontio Pilatoni lafa Yahudi fide, ka Herodeni hayyu Galilaya, ka oboleesi isaa Filiponi hayyu lafa Itureafi Trakoniti, Lisanialeeni hayyu lafa Abilene,

²gaafa Anasifi Kayafani qaalole gugurdo tahani, gaafasi dubbini Waaqa lafa alooti Yohana ilma Zekariati d'ufte.

³Tanaafi inni lafa ch'ufa ta d'aawatu galaana Yordani d'aqe namati odeese waan jed'e, Daba iraa deebia, batifama, aka daba isani araaramani.

⁴Akuma kitaaba raaga Isaya keesati t'aafani: Qonqooni nama lafa alooti iyu waan jettu: Kara Aabbo mid'aasa, daandi isaa qajeelcha!

⁵Baleeni ch'ufti inguutamti, gaareenifi goro ch'ufa indirirsani; fulla dabdu ch'ufa qajeelchani, kara quqaa ch'ufa wolqit'eesani.

⁶Nami ch'ufti baafama Waaqaa ila ufitiini arga.

⁷Duuba Yohanani waan gumi batifamu d'ufteeni jed'e, Isani ilmaani bofa! Eentu aka dalansu d'uftu duraa baqattani isaniti hime?

⁸Huji nami daba iraa deebiu tolchu tolcha. Abbaani keenna Abrahamu ufiini injed'ina. Waan anini jed'u, Waaqi d'akha kana keesa ilmaani Abrahamu mid'aasu indandaa.

⁹Ammaa tana d'agara ya hidda mukha jala kayani; tanaafi mukha mid'aani dansa imbaamne ch'ufa muraniti ibida keesa buusani.

¹⁰Duuba gumiini waan isaani jette, Nu maani taana re?

¹¹Inni waan jed'eeni, Abbaani kooti lama qabu nama tokole inqamne ha kennu, ammalle ka sagale qabuleeni akasuma ha tolchu.

¹²Jari gibira guruleeni batifamu d'umnaani waan jed'e, Aabbo, nu maal tahu malle?

¹³Inni waan worraani jed'e, Haga damoosa guura jed'ani indabarsiina.

¹⁴Askartileeni waan jette, Nu ammo maal tolchu malle? Inni waan jed'eeni, Nama tokole irreeni yokhaani kara d'aratiini hori ira imfud'atiina; ammo hori isani kennanii sifefad'a.

¹⁵Ato biyyiti waan d'ufa eedde waan Yohana heredde Kristo isa seetu,

¹⁶inni waan worra ch'ufaani jed'e, D'uguma anini bisaaniini isani batisa, ammo nama nara gudda tokoti d'ufa ka seemsa kope isaa anini hiikhu himmalini. Inni Lubbu Qulqulloofi ibidaani isani batisa.

¹⁷Inni hafare harkaa qaba, aka fulla dargaye iti hafarsani qulqulleese dargaye khod'oti galfatu; ammo qoola isii fulla ibidi ind'aamneti guba.

¹⁸Duuba Yohanani dubbi hedduuni nama gorse Odu Dansale namati odeese.

¹⁹Ammo inni waan hayyu Herode odeese, maro Herodeni wosila ufi Herodia barateefi, ammalle maro inni daba d'ibi heddu tolcheefi.

²⁰Jennaani Herodeni haga qara ira hamaate Yohanale hid'e.

²¹Duuba eegi nami ch'ufti batifame Yesoleeni batiso argate. Ato inni kad'atu, gubbaani banamte,

²²Lubbuuni Qulqullooni ta bifa sabaliisa qabdu isa ira buute, qonqooni gubba d'ufte waan jette, Atini Ilma kiyya, ka anini jaalad'u, guddo na gammachiifta.

²³Gaafa Yesoni huji ufi iti keyate ganni isaa sodomafa; nami ilma Yusufu isa sehe, Yusufuni ilma Eli.

²⁴Elini ka Mathati, Mathatini ka Lawi, Lawini ka Melki, Melkini ka Yana, Yanani ka Yusufu,

²⁵Yusufuni ka Maatathia, Maatathiani ka Amosi, Amosini ka Nahumu, Nahumuni ka Esli, Eslini ka Nagai,

²⁶Nagaini ka Maathi, Maathini ka Matathia, Matathiani ka Semei, Semeini ka Yusufu, Yusufuni ka Yuda,

²⁷Yudani ka Yoana, Yoanani ka Resa, Resani ka Zerubabeli, Zerubabelini ka Shealtieli, Shealtielini ka Neri,

²⁸Nerini ka Melki, Melkini ka Adi, Adiini ka Kosamu, Kosamuni ka Elmadamu, Elmadamuni ka Eri,

²⁹Erini ka Yoshua, Yoshuani ka Eliezeri, Eliezerini ka Yorimu, Yorimuni ka Mathati, Mathatini ka Lawi,

³⁰Lawini ka Simeoni, Simeonini ka Yuda, Yudani ka Yusufu, Yusufuni ka Yonamu, Yonamuni ka Eliakimu,

³¹Eliakimuni ka Melea, Mealani ka Mena, Menani ka Matatha, Matathani ka Nathani, Nathanini ka Daudi,

³²Daudini ka Yese, Yeseni ka Obedi, Obedini ka Boazi, Boazini ka Salmoni, Salmonini ka Nashoni,

³³Nashonini ka Aminadabu, Aminadabuni ka Aramu, Aramuni ka Hesroni, Hesronini ka Peresi, Peresini ka Yuda,

³⁴Yudani ka Yakobo, Yakoboni ka Isaaqo, Isaaqoni ka Abrahamu, Abrahamuuni ka Tera, Terani ka Nahori,

³⁵Nahorini ka Serugi, Serugini ka Ragau, Ragauni ka Pelegi, Pelegini ka Eberi, Eberini ka Sala,

³⁶Salani ka Kennani, Kennanini ka Arfaksadi, Arfaksadini ka Shemu, Shemuni ka Nuhu, Nuhuni ka Lameki,

³⁷Lamekini ka Methusela, Methuselani ka Henoko, Henokoni ka Yaredi, Yaredini ka Mahalaleli, Mahalalelini ka Kennani,

³⁸Kennanini ka Enoshi, Enoshini ka Sethi, Sethini ka Adamu, Adamuni ka Waaqa.