Read BORANA BIBLE – KITAABA WAAQA Luka 8 Bible Online

Luka 8 - BORANA BIBLE – KITAABA WAAQA bible

Luka 8

¹Eegi waan kana Yesoni diraafi ollowaani ch'ufa keesa dedeeme Odu Dansa ta Finna Waaqa odeese. Jari kud'ani lamaani kaani isaani woliini yae,

²nad'eeni garileeni ta jinniifi d'ukuba fayyite isa gula yaate Mariamu ta Magdalene jed'ani ta jinni torba keesaa baasani;

³Yoana, niiti Kuza, ka waan mana Herode qorqoratu, ammalle Susanafi nad'eeni d'ibiini heddu, ta hori ufitiini Yesofi jara isaa qarqaartele.

⁴Duuba nami dira ch'ufa keesaa d'ufe, gumiini guddooni wolwoldeete. Jennaani Yesoni mammaasaani waan worraani jed'e:

⁵Nami toko mid'aani fach'aasu d'aqe. Ato inni fach'aasu mid'aani gari daandi keesa jigani, nami ira ejaanjate duuba simpirreeni d'ufte nyaatte hobaafte.

⁶Mid'aani gari lafa d'akha gubba jigani, baanaani gogogani waan jiid'a d'abaniifi.

⁷Mid'aani gari qorati keesa jigani, qoratiini woliini baate qanch'arsite.

⁸Mid'aani gari fulla biyye dansa jigani, baanaani mid'aani d'ibbaa d'alani. Dubbi tana jennaani Yesoni waan jed'e, Nami gurra qabu ha d'agayuuti.

⁹Jari Yeso isa gaafate waan jed'e, Mammaasi kunini maani?

¹⁰Inni waan jed'eeni, Waan Finna Waaqa ka duri nama d'ossani yayu isanii kennani; ammo nami kaani mammaasaani barata, aka ato ilaalanile woma inagarre, ato ch'aqasanile woma ind'ageenne.

¹¹Duuba mammaasi kunini akana; mid'aani dubbi Waaqaati.

¹²Mid'aani daandi keesa jigani suni jara dubbi d'agaye fakaatani, ammo ka eege Sheet'ani d'ufe dubbi garaa isaani keesaa baasu, aka d'ugefatani imbaafamne.

¹³Mid'aani d'akha gubba jigani suni jara dubbi d'ageennaani gammadaani fud'ate, ammo hidda inqamne fakaatani. Bulti diqoti d'ugefatani, gaafa ilaalachaani d'ufte lakisani.

¹⁴Mid'aani qorati keesa jigani suni jara d'ageennaani d'ipufi horifi gammada jireenna lafa tanatiini qanch'are mid'aani aada imbaamne fakaatani.

¹⁵Mid'aani biyye dansa keesa jigani suni jara dubbi d'ageennaani garaa d'ugatiifi dansaani qabate obse mid'aani baasu fakaatani.

¹⁶Nami ifse bobeese ammo okote jalati d'ossu yokhaani sire jala kayu injiru. Ammo inni gubbati fannisa aka nami olseenu ifsa argu.

¹⁷Wonti d'ossani ta imullanne injirtu, yokhaani malileeni ka nami ch'ufti beekhe alati imbaamne injiru.

¹⁸Tanaafi waan d'ageetani ch'ufa keesa ufi eegad'a. Wonti akanatiifi, nama wo qabu hagasi ira iti daraniifi, ammo ka woma inqamne diqo inni qabule iraa fuud'ani.

¹⁹Haad'a Yesotiifi oboleyaani isaa isati d'ufani ammo isa gahu dad'abani, maro gumitiifi.

²⁰Nami toko waan jed'eeni, Haad'a tantetiifi oboleyaani tante ala ejaanjani si argu fed'ani.

²¹Ammo inni waan worraani jed'e, Haad'a tiyyaafi oboleyaani tiyya nama dubbi Waaqa d'agaye tolchu.

²²Gaafa toko Yesoni jara ufi woliini hobolo seene waan worraani jed'e, Gama galaana suniti nu taakisiisa. Tanaafi iti d'aabatani.

²³Ato yaanu Yesoni rafe. Bubbeeni guddo galaana d'oofte, hobolooni bisaaniini guutamu geete, lubbuuni worra d'ufte.

²⁴Gara Yeso d'aqani damasani waan jed'aniini, Aabbo, ya banne. Inni kae bubbeefi gohanna galaana ch'allisiise, lafti qabanoofte.

²⁵Jennaani inni waan worraani jed'e, D'ugefachaani teesani meeti? Worri sodaate, mame waan woliini jed'e, Kunini eennu, ka bubbeefi bisaaleeni sarmaniifi?

²⁶Jennaani lafa Gergesa ta moga galaana lafa Galilaya gahani.

²⁷Yesoni lafa goddu geennaani, nami dira suni toko, ka jinni qabu, isati d'ufe. Inni guyya heddu woya inuyifanne yokhaani manaleti ingalu ammo awaala keesa taa.

²⁸Yeso arginaani iti lalabe durati jige qonqo guddooni iye waan jed'e, Ati maal nara qabda, Yeso Ilma Waaqa Gubba Jiru? Anini si kad'ad'a, na ingaargalchiini.

²⁹Wonti inni akana jed'eefi waan Yesoni jinniini, Namicha keesaa bahi jed'eefi jinniini maro heddu isa qabde; ato harkafi miila haada sibiilatiini hid'anile inni haada sibiila ch'abse, jinniini alati isa arite.

³⁰Yesoni isa gaafate waan jed'eeni, Maqaani kanke eennu? Inni waan jed'eeni, Maqaani kiyya Gumi, waan jinniini hedduuni isa seenteefi.

³¹Jinniini Yeso kad'atte aka inni boola keesa worra imbuumne.

³²Booyye hedduti laaga gaara d'eedu jira. Jinniini aka booyye duudu Yeso kad'atte. Inni, Ee jennaani

³³jinniini nama suni keesaa yaate booyye duude, booyyeeni ch'ufti bale ira gadi orite galaana keesa duude, galaani liqimse.

³⁴Tissituuni waan kana arginaani orite diraafi ardaati odeesite.

³⁵Jennaani beenni waan tahe argu d'aqe, Yesoti d'ufe, nama kaani ka jinniini keesaa baate qalbiini iti deebite woya uyifate fulla miila Yeso tau argani. Duuba guddo sodaatani.

³⁶Jari arge kaani aka namicha jinni qabu kaani fayyisani biyyati odeese.

³⁷Jennaani nami ch'ufti ka arda lafa Gergesa keesa jiru Yesoni, Nu biraa deemi jed'ani, maro worri aka taka inargiini sodaateefi. Tanaafi Yesoni hobolo keesa seene iti d'aabate.

³⁸Namichi kaani, ka jinniini keesaa baate, aka isa gula deemu kad'ate, ammo inni ufi jalaa deebise waan jed'eeni,

³⁹Worra kanketiti gali, aka Waaqi waan guddo sii tolche namati odeesi. Namichi dira ch'ufa keesa dedeeme waan Yesoni isaa tolche odeese.

⁴⁰Yesoni moga galaanati deebinaani, gumiini Waan qara isa eegu jirtuufi isa arginaani gammade.

⁴¹Nama tokoti jira, ka Yairo jed'ani, inni gudda mana Waaqa iti kad'atani. Inni d'ufe miila Yesoti jige, Mana kiyya kooti jed'eeni.

⁴²Wonti inni Yeso yaameefi intala takati inni qabu ta ganna kud'ani lamati diquma induini. Ato Yesoni deemu, gumiini gama ch'ufa iti baafate.

⁴³Niitiini toko ta d'iigi haga ganna kud'ani lama keesaa yae, ta hori ufi ch'ufa ch'ireeyiti hobaafte, ammo fayyu dad'abde,

⁴⁴Yeso gula d'ufte handaara woya isaa tut'e; hojuma suni d'iigi isii ch'ite.

⁴⁵Yesoni waan jed'e, Eentu na tuqe? Nami ch'ufti mormate duuba Petroni waan jed'e, Aabbo, gumiini si marsite si d'id'iibdi.

⁴⁶Ammo Yesoni waan jed'eeni, Namati na tuqe, wonti akanatiifi anini jabeenna na keesaa bahu ufirati arge.

⁴⁷Niitiini taani aka indaane arginaani holachaa d'ufte Yeso durati jidde waan isa tut'eefi nama ch'ufa durati himatte, ammalle aka hojuma suni fayyite himte.

⁴⁸Yesoni waan isiini jed'e, Intala, d'ugefachaani tante ya si fayyifte, beeni, nagayaani gali.

⁴⁹Ato Yesoni tae hasau, nami toko gara mana Yairoti d'ufe waan jed'eeni, Intalti tante yayu doote, laki, Aabbo ingaargalchiini.

⁵⁰Ammo Yeso d'ageennaani waan jed'eeni, Insodaatini, d'ugefachuma d'ugefad'u, isiini imfayiti.

⁵¹Mana geennaani inni nama ch'ufa seenu d'owe, Petrofi Yakobofi Yohanafi abbaafi haad'a intala male.

⁵²Nami ch'ufti laalefate bohe, ammo Yesoni waan jed'eeni, Imbohiina, isiini indoone ammo irrafti.

⁵³Worri guddo isa koble waan aka isiini doote beekhaniifi.

⁵⁴Inni harka isii qabe qonqo olfud'ate waan jed'e, Intala, kai.

⁵⁵Lubbuuni isiti deebite, isiini hojuma suni kaate. Yesoni, Sagale kennaafi worraani jed'e.

⁵⁶Abbaafi haati guddo mamte, ammo inni worrati seere aka waan kana namati inhimne.