Read BORANA BIBLE – KITAABA WAAQA Qaabacha Seera 32 Bible Online

Qaabacha Seera 32 - BORANA BIBLE – KITAABA WAAQA bible

Qaabacha Seera 32

¹Ee gubba, dubbi tiyya d'agayi, ee lafa, aka dansa naa ch'aqasi.

²Barsiisani tiyya aka bokaya roobde, dubbini tiyyaleeni aka fit'eesa woi jiifte; akuma ebele buuyo irati harrifte, aka shaesa marra irati roobdi.

³Anini maqa AABBO Waaqa faarse, gumiini isaaleeni guddinna isaa odeesiti.

⁴AABBO Waaqi jaba aka d'akha, ka wonti inni tolchu ch'ufti d'uga. Inni Waaqa d'uga, ka d'ugeefatani, ka qajeelafi d'ugaa tolchu.

⁵Isani worra dugeefataniiniti, ka gumi isaa tau himmaliini, gosa nama sobdu, ch'ubbiti.

⁶Aki isani AABBO Waaqa tolchitani akana; daawe woma imbeenne tana? Inni AABBO keesani ka isaani uumeeniti? Inni isani daraarse gosa isani intolchine?

⁷Waan duri, ka dabre, qaabad'a, abbooti teesani waan tahe gaafad'a, jaarole odu duri odeefad'a.

⁸Gaafa ka waan ch'ufa ira jiru lafa gosaa qoode, gaafa inni ilmaani namaa gargari baase, inni gosa ch'ufa lafa kenneefi, gumi Waaqa gula.

⁹Ammo qoodi AABBO Waaqaa gumi isaati, Yakobooni d'aala isaati.

¹⁰Inni lafa alooti isa arge, lafa bubbiftu gamoojiti fuud'e qorqorate, akuma ufi jabeesu jabeese.

¹¹Akuma risaani ilmaani ufi barisu barsiise, koola ballise jala ch'ee qabu, AABBO Waaqi Israeli qaba.

¹²AABBO Waaqa ch'allati gumi ufiitini deeme, ka qarqaarsa waaqa d'ibi inqamne.

¹³Inni lafa dirre quubsise, mid'aani oobru nyaachise. Inni d'akha keesaa damma worra quubse qarsa keesaa d'ad'a kenneefi.

¹⁴Looni keesaa ititu kenneefi, ree keesaa aanani kenneefi, ammalle hooliyefi laleesafi looni keesaa gabbinna kenneefi, dargaye dansaafi daad'i qullo zabibu obaase.

¹⁵Gumiini Waaqa horte gabbatte, ammo AABBO Waaqa didde; worri lafa ira dabre ch'ufti gabbate, moora baase. Duuba Waaqa worra uume wollaalani. D'akha worra baase didani.

¹⁶Worri Waaqa d'ibi kad'ate, AABBO Waaqa obsa d'owe, wonti hamtuni worri tolche isa dallansiifte.

¹⁷Waan waaqa intahini, jinni, sorio baasanifi waaqa worri duri imbeenne, hareesa kale d'ufe, ka ababooti worraa taka insodaatini.

¹⁸Isani Waaqa keesani ka isani uume wollaaltani Waaqa isani d'ale ch'aqasu diddani.

¹⁹AABBO Waaqi akasi arge jennaani dallane, ilmaani isaa ta d'iiratifi dubrale dide.

²⁰Waan jed'e, Anini deebie worra kana inqarqaaru, ammalle muumme waan worri iti deemu laala; wonti akanatiifi worri kunini worra mata jajaba, ka dubbi nama ind'ageenne.

²¹Worri kunini ya waan waaqa intahini kad'ate obsa na d'owe, waan boch'ani kad'ataniini na dallansiise, tanaafi anini gosa gosa intahini fuud'e, akasiini isani obsa d'owe, gosa daalle fuud'e isani dallansiisa.

²²Dallansuuni tiyya aka ibida bobeete, boola fulla Ekherani jirtuleti woi gubdi: Dallansuuni suni lafafi waan isiini baaftule ch'ufa balleesite, gaarale ch'ufa ibidaani gubdi.

²³Anini waan hamtu ch'ufa worra irati tuule, t'iya tiyya ch'ufaani worra had'a.

²⁴Worri beelafi qand'ooni hobae, d'ukuba hamaani raawata. Anini bineensa ala, ka worra nyaatu, iti erge bofi had'aa qabu worra idda.

²⁵Woraani kara keesati nama balleese, gaargali taka inargini worra keesati nama qabata; kaimi ka d'iiratifi ka uwaleeni raawate, daimafi jaaroleleeni hafto d'abdi.

²⁶Anini sila worra hobaase aka nami tokoleeni worra inqaabanne.

²⁷Ammo anini kiyyiba nyaapa worra sodaad'a, worri hegeri ufi d'aade, AABBO Waaqaniti, nuti worra harka keennaani hobaase jed'a.

²⁸Israeliini gosa woma imbeenne, ta qalbi womatu inqamne.

²⁹Worri waan worra dabsatanifi inhubatu, ammalle waan tahe inargu.

³⁰Nami toko akami nama kuma toko dabsata? Yokhaani nami lama akami nama kuma kud'ani dabsata? Yo AABBO Waaqi worraa worra lakise, Waaqi guddaani worra yalabahe male.

³¹Nyaapi worraa imbeekha aka waaqi worraa laafa, ammalle waaqi worraa, haga Waaqa Israeli irre inqamne.

³²Daad'iini nyaapa worraa Sodoma keesa d'ufte, oobru Gomora keesaa baate: zabibuni worraa had'ooftu, ta mid'aani had'aa qaba baaftu,

³³akuma daad'i had'aa bofaa ira mid'aasani.

³⁴AABBO Waaqi waan nyaapa worra tolche qaabate, guyya worra gaargalchani eegata.

³⁵Inni haalo baafate worra gaargalcha; guyyaani worri baddu ya d'iaate; guyyaani worri d'umatu ya ala hobae.

³⁶AABBO Waaqi hojja aka irreeni gumi isaa laafte argu worra baasa; ammalle hojja laafinna worra isaa hojattu argu innahaafi.

³⁷Duuba AABBO Waaqi gumi isaatini waan jed'u, me, waaqi hedduuni irre qabu, ka isani d'aabbatani?

³⁸Ka gabbinna sorio teesanitiini quubsitani, daad'i sorio teesani obaaftani? Waaqi sunini ch'ufti ha amma tana d'ufe isani qarqaaruti! Ha orie d'ufe isani jabeesuti!

³⁹Me amma ilaala, Waaqi d'uga ana, ka d'ibiini injiru. Anini ijeese jireesa, madeese fayyisa, nami tokoleeni na indabsatu.

⁴⁰Anini harka kiyya olfuud'e kakhad'a, aka anini Waaqa jiru,

⁴¹ka woraana kiyya qare, d'ugaani tissu. Anini nyaapa haalo baafad'e, nama na jibbule balleesa.

⁴²Anini t'iya tiyya d'iiga worra quubse, goraadeeni tiyya fooni worraa nyaattee hobaafti. anini nama na had'u tokole illakisu, ka madeesanifi ka qabanile infit'a.

⁴³Isani gochiti ch'ufti, gumi AABBO Waaqa faarsa; wonti akanatiifi inni nama worra ijeesu gaargalcha. Inni nyaapa ufi haalo baafate, daba gumi isaa ch'ufa araaramaafi.

⁴⁴Musafi Yoshuani, ilmi Nuni, sirba kana, ka nami ch'ufti d'agayu, biyyaa sirbani.

⁴⁵Musani dubbi gosa Israeli barsiisu ch'ufa buufate jennaani

⁴⁶waan jed'e, Dubbi anini isani arra barsiisu tana jabeesa, garaati qabad'a, ilmaani teesanile ch'ufa barsiisa, aka isiini dubbi seera kana ch'ufa jabeesite guutu.

⁴⁷Dubbini tunini dubbi tabaatiiniti, waan jireenna keesaniti. Yo jabeesitani guuttani, lafa galaana Yordanitini gama ta isaani amma iti qubachu geetani tana keesati, guyyaani keesani d'eerata.

⁴⁸Guyyuma suni AABBO Waaqi waan Musani jed'e,

⁴⁹Gaara Nebo, ka fulla gareeni Abarimu, lafa Moabu keesa, dira Yeriko gama ilaboru; jiru d'aqi kori, lafa Kanaani, ta anini worra Israeliti kennu, aka dansaa daawad'i.

⁵⁰Atini akuma oboleesi kanke Harunini gaara Hori irati due gaara suni irati doota;

⁵¹wonti akanatiifi isaani lachu gumi Israeli durati na ch'eersitani. Gaafa isani fulla bisaani Meriba jirtani, d'aatu dira Kadeshi, lafa aloo ta Sini keesati, gumi Israeli durati na saalfachu diddani.

⁵²Atini lafa anini worra Israeli kennu suni fago daawata, male, inseentu.