Read BORANA BIBLE – KITAABA WAAQA Yohana 13 Bible Online

Yohana 13 - BORANA BIBLE – KITAABA WAAQA bible

Yohana 13

¹Ato jilti Pasaka jed'ani ingahiini, Yesoni aka hojjaani inni lafa keesaa kae gara Abbati galu d'iaatte beekhe. Inni haguma qara jara ufi ka lafa tana gubba woliini tae guddo jaalate, jaalalti sunileeni muumme inqabdu.

²Sheet'ani layu Yuda Iskariote, ilma Simoni, keesa seene, aka inni Yeso gurguru heresiise. Eegi worri sagale nyaataa tatae,

³Yesoni aka Abbaani waan ch'ufa harka isaa keesa kaye, ammalle aka inni gara Waaqaati bahe Waaqati deebiu beennaani,

⁴sagale ira olkae, woya ufi lafa kaye, woya diqo toko mart'ifate.

⁵Jennaani bisaani qoriti buuse, miila jara ufi d'iqisaa kae, woya ufi ta mart'ifateeni miila worraa haaqe.

⁶Inni fulla Simoni Petro gahe jennaani Petroni, Aabbo, atini miila na d'it'a? jed'e gaafate.

⁷Yesoni waan jed'eeni, Waan anini ammatana tolchuu jiru ati imbeetu, ammo eegi tana imbaratta.

⁸Petroni waan jed'eeni, Haga jiru jireennale na ind'it'u! Yesoni waan jed'eeni, Yo anini si d'iqu d'ibaad'e, atini woma nara inqabdu.

⁹Simoni Petroni waan jed'eeni, Miila ch'allaaniti, ammo harkafi matale na d'iqi.

¹⁰Yesoni waan jed'eeni, Nami nafa d'iqate waan iti deebie d'iqatuufi inqabu, miila male, inni ya qulqullae. Isani ch'ufti qulqullo, toko male.

¹¹Wonti inni akana jed'eefi, inni nama isa gurguru imbeekha; tanaafi inni, Isani ch'ufti qulqullo, toko male jed'e.

¹² Duuba eegi miila worraa d'iqe, Yesoni woya ufi fud'ate, deebie tae waan worraani jed'e, Waan anini isanii tolche beetu?

¹³Isani Motichafi Aabbo naani jettani, aka dansa jettanile, anini akasuma.

¹⁴Yo anini Motichafi Aabbo keesani tahe miila keesani d'iqe, isanileeni miila woli d'iqu maltani.

¹⁵Anini ya akheekha isanii kenne aka isanileeni waan anini isani tolche tolchitani.

¹⁶D'uguma, waan anini isaniini jed'u, Tisseeni abba ufi ira injirtu, yokhaani ergattuuni nama isii ergate ira injirtu.

¹⁷Yo isani waan kana beetani tolchitani, ayyaana keesani!

¹⁸ Anini isani ch'ufa imbaanu; nama anini fohad'e imbeekha. Ammo t'aafiini ta, Nami na woliini qit'a nyaatu nati garagala jette guutamu malte.

¹⁹Armaa achi ato wonti kuni intahiini isaniti hima, aka yo isiini taate, aka anini Isuma d'ugefattani.

²⁰ D'uguma, waan anini isaniini jed'u, Nami nama ani ergu fud'ate, nale ya fud'ate; ammalle ka na fud'atu nama na erge fud'ata.

²¹Waan kana jennaani Yesoni guddo lalefate, diideese hime waan jed'e, D'uguma, waan anini isaniini jed'u, Isani keesa, nami toko na gurgurata.

²²Jari isaa woli mimillate, ammo nama inni baane suni imbeekhani.

²³Jara isaa keesa nami toko, ka Yesoni jaalate, bobaa Yesoti hirkate tau jira.

²⁴Simoni Petro harkaani isa yaame waan jed'eeni, Nama inni baanu eennu? Gaafad'u me.

²⁵Inni, ato qoma Yesoti hirkatu, waan jed'eeni, Aabbo, nami ati baantu suni eennu?

²⁶Yesoni waan jed'eeni, Nami anini qit'a kana ch'abse fuutooni tuqe iti kennu sunuma. Duuba inni qit'a fuud'e, fuutooni tuqe Yuda Iskarioteti kenne.

²⁷Akuma Yudani qit'a fud'ateeni, Sheet'ani isa keesa seene. Duuba Yesoni waan jed'eeni, Waan tolchu feetu hurrisi tolchi.

²⁸Nami achi tau tokoleeni waan inni akasi jed'eefi imbeenne.

²⁹Nami gari waan Yudani subba hori harkaa qabatuufi waan Yesoni, Waan nu jilaa feenu nu biti, yokhaani, Hiyyeeyii hori kenni jed'eeni sehe.

³⁰Jennaani inni qit'a suni fud'annaani hojuma suni alati bahe. Yo suni lafti halkani.

³¹Yudani bannaani Yesoni waan jed'e, Amma guddinni Ilma Nama la mullate, guddinni Waaqaleeni la isa keesa mullate.

³²Yo guddinni Waaqa isa keesa mullate, yoosi Waaqumati guddinna Ilma Nama mullisa, ammalle hurrise mullisa.

³³ Ijoolle tiyya, nu haga diqa woliini jira. Isani na barbaadani, ammalle akuma anini qara Yahudiini jed'e amma isanileeni jed'a, fulla anini deemu isani dandeetani ind'uftani.

³⁴ Seera haraa isanii kenna, Woljaalad'a; akuma anini isani jaalad'e, isanileeni akasi woljaalad'a.

³⁵Akanaani yo isani woljaalatani nami ch'ufti aka isani nama kiyya beekha.

³⁶Simoni Petroni waan jed'eeni, Aabbo, eesa deemta re? Yesoni waan jed'eeni, Fulla ani deemu dandeete amma na gula ind'uftu; ammo eegi tana na gula d'ufta.

³⁷Petroni waan jed'eeni, Aabbo, maafi amma si gula d'ufu indandeenne? Maro kanketiifi anini indua.

³⁸Yesoni waan jed'eeni, Maro kiyyafi atini indoota? D'uguma, waan anini siini jed'u, Kormi luku iniyu, haga atini maro sadi na mormatuuti.