Read BORANA BIBLE – KITAABA WAAQA Yohana 16 Bible Online

Yohana 16 - BORANA BIBLE – KITAABA WAAQA bible

Yohana 16

¹Anini waan kana yayu isaniti hime aka d'ugefachaani teesani laafte isaani kara iraa ingorre.

²Maneeni Waaqa iti kad'atani keesaa isani yaasani. Tana male, hojjaani ind'ufti ta nami isani ijeesu waan Waaqaa hojatu ufi sehu.

³Waan kana maro naafi Abba imbeenneefi isani tolchani.

⁴Ammo waan kana qara ya isaniti hime, aka yo guyyaani suni gahe, waan anini duri isaniti hime qaabattani. Waan kana anini gaafa qara isaniti inhimne, waan nu woliini jiruufi.

⁵Ammo amma gara nama na erge gala; isani keesa tokoleeni ka, Garami deemta? jed'e na gaafatu injiru.

⁶Taatule waan anini waan kana isaniini jed'eefi, la guddo lalefattani.

⁷Anini ammo dubbi d'uga isaniti hima: aka anini deemuti ira isani jira. Wonti akanatiifi yo anini indeemini, Qarqaarsi kaani isanii ind'ufu. Ammo yo anini deeme, anini isa isanii erga.

⁸Inni gaafa d'ufu, aka dabi jiruufi aka d'ugaani jirtuufi aka Waaqi wollaala namaati muru nama garsiise hubachiisa.

⁹Aka dabi jiru, waan worri d'ugefachu diduufi;

¹⁰aka d'ugaani jirtu, waan anini gara Abba d'aquufi, duuba isani iti deebitani na inargitani;

¹¹aka Waaqi wollaala namati muru, waan hayyu lafa tana wollaala iti muraniifi.

¹²Anini ammalle waan heddu ta isaniini jed'u qaba, ammo amma dandeetani imfud'attani.

¹³Taatule hojja Lubbuuni d'ugaa d'uftu, isiiti waan d'ugaa iti isani qajeelcha. Isiini waan ufi indubbatu, ammo waan d'ageete ch'ufa dubbatti, waan eegi tana d'ufale isaniti himti.

¹⁴Isiini na guddifte waan kiyya fuute isani agarsiifti.

¹⁵Wonti Aabbooni qabu ch'ufti tiyya; tanaafi anini, isiini waan kiyya fuute isani agarsiifti isaniini jed'a.

¹⁶Eegi bulti diqo deebitani na inargitani; ammalle eegi bulti diqo deebitani na agartani.

¹⁷Jennaani jari isaa ka gari waan woliini jed'e, Wonti inni nuuni jed'u kunini maani? Inni, eegi bulti diqo na inargitani jed'a ammalle eegi bulti diqo deebitani na agartani nuuni jed'a, inni ammalle, waan anini gara Abbaa d'aqa jed'eefi akasi jed'e?

¹⁸Worri duuba waan jed'e, Wonti inni, Eegi buti diqo jed'e tunini maani? Waan inni jed'eefi imid'aafanne jed'ani.

¹⁹Yesoni aka worri isa gaafachu fed'u beennaani waan jed'eeni, Waan anini jed'e suni wolgaafattani? Ta, Eegi bulti diqo na inargitani, ammalle, Eegi bulti diqo deebitani na agartani jed'e suni?

²⁰D'uguma, waan anini isaniini jed'u, Isani laalefattani bootani, ammo nami lafa igammada; isani ilaalefattani, ammo lalalti teesani garagalte gammada taati.

²¹Nad'eeni yo ch'ininfattu ilaalefatti, maro guyyaani isiini deetu gaheefi. Ammo eegi isiini ilme deete, deebite lalala suni inqaabattu, maro gammada daima lafati d'alteefi.

²²Tanaafi isani amma lalala qabdani, ammo anini deebieti isani arga, garaani keesani ingammada, gammada keesani kana nami dandae isani ira imfud'atu.

²³Guyya suni woma na ingaafattani. D'uguma, waan anini isaniini jed'u, Waan isani maqa kiyyaani Abba kad'attani ch'ufa inni isanii kenna.

²⁴Arra durati taka maqa kiyyaani woma inkad'anne; kad'ad'a, inargattani, aka gammadi keesani qit'au.

²⁵Waan kana anini mammaasaani isaniti hime. Guyyaani anini dandae mammaasaani isaniti indubbanne ind'ufa, ammo diideese waan Abba isani agarsiisa.

²⁶Gaafasi maqa kiyyaani kad'attani; ammalle anini, Abba isanii kad'ad'a injed'u;

²⁷wonti akanatiifi Abbaani ufiyu isani jaalata. Inni isani jaalata, waan isani na jaalattani aka anini gara Waaqaati d'ufe d'ugefattaniifi.

²⁸Anini gara Abbati bahe lafati d'ufe; ammalle anini gara lafaati bahe Abbati deebia jed'e.

²⁹Jari isaa waan jed'eeni, Ilaali, ati amma mammaasaani indubbattu ammo diideesite dubbatta.

³⁰Ammatana aka ati waan ch'ufa beetu nu la hubanne; waan nami wo si gaafatuufi inqabdu. Waan kanaafi aka atini gara Waaqaati d'ufte d'ugefanna.

³¹Yesoni waan jed'eeni, Isani ammatana d'ugefattani?

³²Ilaala, guyyaani isani gargari firfirfamtani ind'ufa, amma ya d'ufe; nami ch'ufti gargari firfirfame, koba na lakiftani. Ammo anini koba injiru; Abba wolumaani jirra.

³³Waan kana anini ya isaniti hime, aka na keesa nagaya argattani. Lafa keesa d'ipu argattani, ammo garaa jabaad'a! Anini ya lafa dabsad'e.