Read BORANA BIBLE – KITAABA WAAQA Yohana 18 Bible Online

Yohana 18 - BORANA BIBLE – KITAABA WAAQA bible

Yohana 18

¹Yesoni dubbi tana dubbannaani kae, jara ufi woliini laga Kedroni jed'ani taake. Oobruti achi jira, Yesofi jari isaa achi d'aqani.

²Yudani, ka isa gurguruleeni fulla suni imbeekha, waan Yesoni maro heddu jara ufi woliini fulla suni d'aqeefi.

³Tanaafi Yudani askartiifi hojattu Mana Waaqa ta qaalole gugurdofi Farisayooni ergite, ta ifse heddufi miha lolatiini yaatu, guure gara oobru suni d'aqe.

⁴Yesoni waan isati d'ufa ch'ufa beennaani, worrati d'ufe waan jed'eeni, Eennu barbaaddani?

⁵Worri waan jed'eeni, Yeso Nazareti barbaanna. Yesoni, Ana jed'e. Yudaleeni ka isa gurguru worra woliini jira.

⁶Yesoni, Ana jennaani rifatani lafati jigani.

⁷Yesoni ammalle waan worraani jed'e, Isani eennu barbaaddani? Worri waan jed'e, Yeso Nazareti.

⁸Yesoni waan jed'e, Anini layu, Ana jed'e. Yo na barbaaddani, worri kuni ha yauti.

⁹Wonti inni akana jed'eefi aka dubbini inni duri jed'e, ta Aabbo, jara atini naa kennite keesaa tokole imballeesine jettu guutamtu.

¹⁰Jennaani Simoni Petroni goraade qalqala ufi keesa luqise, tisse qaallicha gudda d'ae, gurra mirgicha iraa kute. Maqaani tisse suni Malko.

¹¹ Yesoni waan Petroni jed'e, Goraade tante qalqalati deefad'u, mala keti, muudunu gaargala ta Aabbooni naa kenne anini ind'ugu? jed'e gaafate.

¹²Jennaani askartiifi namicha gudda worraatiifi hojattuuni Yahudiini ergite Yeso qabde hiite.

¹³Qara gara Anasi geesani. Inni abba niiti Kayafa, ka ganna suni qaallicha gudda tahe.

¹⁴ Kayafani sunini kauma, Nami toko biyyaafi duu male jed'e Yahuditi hime.

¹⁵Simoni Petrofi nami Yeso toko Yeso gula yaani. Qaallichi guddaani namicha suni guddo fuula beekha, tanaafi inni Yeso woliini ch'icha qaallicha gudda gahe.

¹⁶Ammo Petroni karra dura ala eje. Namichi kaani ka qaallichi guddaani fuula beekhu gabahe, intala karra eeddu tokooni dubbate Petro olseensise.

¹⁷Intalti balbala eeddu taani waan Petroni jette, Atini nama nama kanatiyu? Inni waan jed'eeni, Hiyyo, ani nama isatiiniti.

¹⁸Hojattufi askartiini waan lafti d'aamoteefi ch'ile bobeesite d'aatu ejaanjite qanqamachuti jirti. Petroleeni worra woliini eje qanqamate.

¹⁹Jennaani qaallichi guddaani waan Yesoni jed'e, waan jara keetifi ka barsiisa teeti nati himi.

²⁰Yesoni waan jed'eeni, Anini diideese nama ch'ufaati dubbad'e, anini guyya ch'ufa maneeni Waaqa iti kad'ataniifi Mana Waaqa gudda keesaleti fulla Yahudiini iti wolwoldeetuti barsiise, d'ossaani woma indubbanne.

²¹Maafi na gaafatta? Nama waan anini namaani jed'e d'agaye gaafad'u; worri waan ani jed'e imbeekha.

²²Akasi jennaani askartiini isa bira ejitu toko Yeso d'abanaafte waan jetteeni, Ati akami qaallicha guddati akana dubbatta?

²³Yesoni waan jed'eeni, Yo anini waan hamtu dubbad'e, waan hamtu suni d'ugeesi; ammo yo anini waan dansa dubbad'e maafi na d'abanaafta?

²⁴Duuba Anasini Yeso ka hid'aansa qabu Kayafa qaallicha guddati erge.

²⁵Ammalle Simoni Petroni akuma kaani oleje ibida qanqamate. Duuba, Atileeni nama isaatiiyu? jed'ani gaafatani. Inni mormate, Hiyyo, ani nama isatiiniti jed'e.

²⁶Tisseeni qaallicha gudda toko, ka fiit'a nama Petroni gurra iraa kute kaani, waan jed'eeni, Ani oobru keesati isa woliini si ingarre?

²⁷Petroni ammalle mormate, hojuma suni kormi lukuu iye.

²⁸Jennaani ganama Yeso fulla Kayafati fuud'ani, gara mana Praitorio jed'ani geesani. Tatule worri ufi mana Praitorio oliinduunne, aka akasiini aada ufi dura yakani sagale Pasaka ind'amne.

²⁹Pilatoni worrati gabahe waan jed'eeni, Nama kana maani isa himattani?

³⁰Waan isaani jed'ani, Yo sila namichi kunini nama hama intahiini sitiini ind'umnu.

³¹Pilatoni waan jed'e, Isanumaani fuud'a, aada teesani gula qora. Yahudiini waan jetteeni, Aki nu nama ijeemnu fullaaniti.

³² Tunini aka dubbini Yeso guutamtu, ta inni waan duisa ufi hime.

³³Pilatoni mana Praitorio jed'ani ammalle seene Yeso yaame waan jed'eeni, Atini hayyu Yahuditi?

³⁴Yesoni waan jed'eeni, Atini ufiini beete jette mo nama d'ibiti waan kiyya siti hime? jed'e gaafate.

³⁵Pilatoni waan jed'eeni, Anini gosa Yahuditi? Gosa tantetiifi qaalole gugurdoti si natiini d'ufe, atini maani yakite?

³⁶Yesoni waan jed'eeni, Hayyumti tiyya ta lafa tanaatiiniti; yo sila hayyumti tiyya ta lafa tanaa taate, hojattuuni tiyya naa kalchiti, aka anini harka Yahudi keesa inseene. Ammo hayyumti tiyya ta armatiiniti.

³⁷Tanaafi Pilatoni, Atini hayyu re? jed'e gaafate. Yesoni waan jed'eeni, Atu hayyu ya naani jette. Maro waan kanatifi d'alad'e, maro waan kanatifi lafati d'ufe, aka waan kana d'ugeesu. Nami d'ugaa ch'ufti dubbi tiyya d'agaya.

³⁸Pilatoni waan jed'e, D'ugaani waan akamiti kana? Akasi jennaani inni ammalle Yahuditi gadibahe waan jed'eeni, Anini waan hamtu isa irati tokole ingarre.

³⁹Ammo isani aada toko qabdani, aka anini nama toko guyya Pasaka isanii hiikhu. Tanaafi aka anini hayyu Yahudi isanii hiikhu feetu? jed'e gaafate.

⁴⁰Worri ammalle gohe waan jed'e, Isaaniti, ammo Baraba nu hiikhi. (Barabani suni shifta.)