Read BORANA BIBLE – KITAABA WAAQA Yohana 4 Bible Online

Yohana 4 - BORANA BIBLE – KITAABA WAAQA bible

Yohana 4

¹Farisayooni aka Yesoni Yohana ira nama heddu ufiti yaame batise d'ageete.

²(Ammo Yesoni harka ufiitini nama imbatimne, jara isati nama batise male.)

³Yesoni waan biyyiti jettu d'ageennaani Yudea bahe Galilaya d'aqe.

⁴Inni yo sila lafa suni d'aqu, lafa Samaria keesa dabru male.

⁵ Duuba dira Samaria toko, ka Sikari jed'ani gahe, ka oobru toko ta qara Yakoboni ilma ufi Yusufuu kenne d'aatu jiru.

⁶Eela Yakobo tokoti arti jira. Tanaafi Yesoni kara deeme dad'amnaani, eela bira tae. Hojjaani suni guyya gudda.

⁷Niitiini Samaria toko bisaani woraabachu d'umnaani Yesoni, Bisaani na obaasi jed'eeni.

⁸(Jari isaa yayu dira d'aqe, aka sagale bitani.)

⁹ Niitiini Samaria suni waan isaani jette, Atini gosa Yahuditi; anini niiti gosa Samariati; atini akami jette bisaani na kad'atta? (Wonti isiini akasi jetteefi Yahudiini gosa Samariatiini wolimbeetu.)

¹⁰Yesoni waan jed'eeni, Yo sila atini galata Waaqaa beete ammalle nama bisaani si kad'atu kana beete, bisaani jireenna isa kad'atta.

¹¹Niitiini taani waan jetteeni, Aabbo, atini waan woraabduuni inqabdu, eelileeni guddo gadi qile, eesa bisaani jireenna suni argatta re?

¹²Atini abba keenna Yakobo, ka eela kana ufi d'uge nule kenne, ilmaaniifi hori ufi obaase ira jirta? jette gaafate.

¹³Yesoni waan jed'eeni, Nami bisaani kana d'ugu deebie d'eebota,

¹⁴ammo nami bisaani anini kennu d'ugu haga jiru jireennale deebie ind'eebotu. Wonti akanatiifi bisaani anini kennu suni isa keesa maddani burqa tahani, haga jiru jireennale deebie ind'eebotu.

¹⁵Niitiini suni waan jetteeni, Aabbo, bisaani kana naa kenni, aka ind'eebonne, yokhaani aka deebie arma d'ufe bisaani iworaamne.

¹⁶Yesoni waan isiini jed'e, Beeni, d'aqi, d'iirsa ke yaami, armaani kooti.

¹⁷Niitiini taani waan jetteeni, Anini d'iirsa inqabu. Yesoni waan jed'eeni, Atini d'uguma, Anini d'iirsa inqabu jette.

¹⁸Maro shani ya si fuud'ani, namichi atini amma woliini jirtu sunileeni d'iirsa keetiiniti, tana d'uguma baante.

¹⁹Niitiini taani waan jetteeni, Aabbo, anini aka atini raaga yayu arge.

²⁰Ababooti teenna gaara kana irati Waaqa kad'atte, ammo isani, Fullaani Waaqa iti kad'achu malani Yerusalemu jettani.

²¹Yesoni waan jed'eeni, niiti tana, na d'ugefad'u, guyyaani ind'ufa ka gaara kanaafi Yerusalemu keesaleti! Abba inkad'anne.

²²Isani waan imbeenne kad'attani, ammo nu waan beennu kad'anna; wonti akanatiifi baafami gara Yahuditi d'ufa.

²³Ammo guyyaani ind'ufa, ammalle arma jira, ka nami aka d'uga kad'atu lubbufi d'ugaani Abba kad'atu. Nama akana kana Abbaani barbaada aka isa kad'atu.

²⁴Waaqi Lubbu, nami isa kad'atu lubbufi d'ugaani kad'achu male.

²⁵Niitiini taani waan jetteeni, Aka Masihi, ka Kristo jed'ani d'ufu, anini imbeekha. Inni gaafa d'ufu waan ch'ufa nu barsiisa.

²⁶Yesoni waan isiini jed'e, Ka siini dubbatu kunini isuma.

²⁷Hojuma suni jari isaa d'ufe, waan inni niiti taaniini dubbateefi mamani. Ammo nami tokoleeni, Atini maani barbaada? yokhaani, Maafi isiini dubbatta? injenne.

²⁸Tanaafi niitiini taani bute ufi lakifte, dirati deebite waan biyyaani jette,

²⁹Koota, nama waan anini duri tolche ch'ufa nati hime ilaala. Kunini Kristo taha? jette gaafate.

³⁰Worri diraa yae Yesoti d'ufe.

³¹Hojja suni jari isaa isa kad'ate waan jed'eeni, Aabbo, sagale nyaad'u.

³²Ammo inni waan worraani jed'e, Anini sagale isani imbeenne qaba.

³³Tanaafi jari isaa waan woliini jed'e, Isii, namati sagale isaa d'ufeeni?

³⁴Yesoni waan jed'eeni, Sagaleeni tiyya aka anini fed'i nama na erge tolche huji isaa hobaasu.

³⁵Eegi jia afuri mid'aani murra jettaniyu? Waan anini isaniini jed'u, Olmillad'a, aka oobruuni mura geete bilchatte ilaala.

³⁶Nama muru gati baasaniifi, ammalle inni mid'aani jireenna hegeri woltiguura; aka nami oobrufi ka muruleeni woliini gammadu.

³⁷Mammaasi, Toko imfach'aasa, kad'ibiini imura jed'ani armati fulla.

³⁸Anini aka mid'aani isani inobriini murtani isani erge; nama d'ibiini qote ammo isani tirfi argattani.

³⁹Nami dira Samaria hedduuni maro niitiini, Inni waan anini duri tolche ch'ufa nati hime jette suniifi Yeso d'ugefate.

⁴⁰Tanaafi nami Samaria hedduuni isati d'ufe, aka inni worra woliini tau kad'atani; Yesoni guyya lama worra woliini tae.

⁴¹Worra suni male, nami hedduuni, maro dubbi isaatiifi isa d'ugefate,

⁴²waan niiti taaniini jed'e, Maro dubbi tantetiifi ind'ugefanne, ammo maro nu gurra keennaani d'ageenneefi d'ugefanna, akasiini aka inni d'uguma Qarqaarsa lafa ch'ufa beena.

⁴³Guyya lama achi keesa ollaani, Yesoni achii deeme Galilaya d'aqe.

⁴⁴ Wonti akanatiifi Yesoni qara waan jed'e, Raagi lafa ufi keesati ulfinna inqabu.

⁴⁵ Inni Galilaya geennaani jari Galilaya isa d'ugefate; wonti akanatiifi worri jila Pasaka gara Yerusalemu d'annaani, waan inni achiti tolche ch'ufa arge.

⁴⁶Jennaani Yesoni dira Kana ka Galilayati deebie, fulla inni bisaani iti daad'i tolche. Jaallaba tokoti jira, ka ilmi isaa fayya d'abe, Kapernaumu keesa.

⁴⁷Aka Yesoni Yudeaa bahe Galilaya d'ufe d'ageennaani, inni gara isaa d'aqe aka inni d'ufe ilma isaa ka diquma induiini fayyisu kad'ate.

⁴⁸Jennaani Yesoni waan jed'eeni, Yo isani akheekhafi waan mama argitani male, diqole ind'ugefattani.

⁴⁹Jaallabi kaani waan jed'eeni, Aabbo, kooti, ato gurbaani kiyya induiini.

⁵⁰Yesoni waan jed'eeni, Beeni, ilmi kanke imfaya! Namichi suni dubbi Yesoni isaani jed'e d'ugefate, kae gale.

⁵¹Ato inni galu jiru, hojattuuni isaa fuula keesa isa d'ufte waan jetteeni, Gurbaani kanke miira qaba.

⁵²Jennaani inni hojja gurbaani miire gaafate. Worri waan jed'eeni, Kale, hojja saa torba, qannooni isa iraa galte.

⁵³Duuba abbaani suni aka hojja Yesoni, Ilmi kanke imfaya isaani jed'e beekhe, isaafi worri isaa ch'ufti d'ugefatani.

⁵⁴Kunini duuba akheekha lameeso ka Yesoni tolche, eegi Yudea bahe Galilaya d'ufe.