Read BORANA BIBLE – KITAABA WAAQA Yohana 5 Bible Online

Yohana 5 - BORANA BIBLE – KITAABA WAAQA bible

Yohana 5

¹Eegi waan kana jila Yahuditi jira, duuba Yesoni Yerusalemu d'aqe.

²Yerusalemu keesa, d'aatu Fullo Ree jed'ani, haro tokoti jira, ta daargula shani qabdu, ta afaani Ebraniatiini Bethzatha jed'ani.

³Achi keesa gumi nama fayya d'abeefi ballafi naafafi ka kokotaeti ch'iisa. [Aka bisaani woch'ani eegani,

⁴waan maro gari malaikaani Aabbo haro suni keesa seente bisaani woch'isifitufi, nami fayya inqamne ka eegi bisaani woch'ani qara haro suni seene d'ukuba taatefu infaya.]

⁵Nama tokoti jira ka ganna sodomi saddeeti fayyad'abaani ch'iise.

⁶Yesoni isa arge, aka inni guyya heddu achi ch'iise beennaani, Fayyu feeta? jed'e gaafate.

⁷Namichi fayya inqamne kaani waan jed'eeni, Aabbo, anini nama yo bisaani woch'ani keesa na buusu inqabu; ato anini iti hirkifad'u, nami d'ibiini na durati seena.

⁸Yesoni waan jed'eeni, Kai, itille tante fud'ad'u, deemi.

⁹Namichi kaani hojuma suni fayye, itille ufi fud'ate iti d'aabate. Guyyaani suni guyya Sabatooti.

¹⁰ Duuba Yahudiini waan namicha kaaniini jette, Guyyaani kuni guyya Sabatooti, aki atini itille tante baate deemtu fullaaniti jette.

¹¹Ammo inni waan jed'eeni, Namichi na fayyise waan naani jed'e, Itille tante fud'ad'u, deemi, naani jed'e.

¹²Worri waan jed'eeni, Nami, Itille tante fud'ad'u deemi siini jed'e suni eennu?

¹³Namichi fayyisani kaani nama isa fayyise imbeekhu, wonti akanatiifi maro gumiini achiti baateefi Yesoni yayu deeme.

¹⁴Eegi suni Yesoni namicha kaani Mana Waaqa keesati arge waan jed'eeni, Me ilaali, la fayyite. Iti deebite daba intolchiini, aka waan hagana ira hamtu inarganne.

¹⁵Namichi kaani deeme Yahuditi hime, aka nami isa fayyise Yeso.

¹⁶Waan kanaafi Yahudiini Yeso gaargalchite, maro inni waan kana guyya Sabato tolcheefi.

¹⁷Ammo Yesoni waan worraani jed'e, Abbaani kiyya hojja ch'ufa hojata, anileeni hojja ch'ufa hojachu male.

¹⁸Waan kanaafi Yahudiini haga qarale ira isa ijeesu feete, waan inni seera Sabato ch'alla ch'abseniti ammo Waaqi Abba kiyya jed'eefi, akanaani qit'e Waaqa ufi tolcheefi.

¹⁹Duuba Yesoni waan worraani jed'e, D'uguma, waan anini isaniini jed'u, Ilmi dandae ufiini woma intolchu, yo waan Abbaani tolchu argu male. Ilmi waan Abbaani tolchu ch'alla tolcha.

²⁰Wonti akanatiifi Abbaani ilma jaalata, waan ufi tolchu ch'ufa isa agarsiisa, ammalle huji guddo ta tana ira garsiisa, aka isani mamtani.

²¹Akuma Abbaani nama due kaase jiraachisu, Ilmileeni akasuma nama fed'u jiraachisa.

²²Abbaaleeni nama tokole inqoru, ammo waan qorsuma ch'ufa yayu Ilmati kenne,

²³aka nami ch'ufti Ilma guddisu akuma Abba guddisani. Nami Ilma inguddimne Abba isa erge eesaa fuud'e guddisa?

²⁴D'uguma waan anini isaniini jed'u, Nami dubbi tiyya d'agaye ka na erge d'ugefate, jireenna hegeri qaba. Isa wollaala iti imurani, ammo ya duisa keesa bahe jireenna argate.

²⁵D'uguma, waan anini isaniini jed'u, Hojjaani ind'ufti, amma ya d'ufte, ta worri due qonqo Ilma Waaqa d'agayu, duuba ka d'agayu injiraata.

²⁶Akuma Abbaani jireenna ufi keesaa qabu, akasuma inni Ilmale tolche aka jireenna ufi keesaa qabaatu.

²⁷Inni yayu jabeenna qorsuma kenneefi, waan inni Ilma Nama taheefi.

²⁸Waan kana himmamiina; guyyaani ind'ufa ka nami awaala keesa jiru ch'ufti qonqo isaa d'agaye

²⁹ awaala keesaa yau, nama waan dansa tolche kaasani jireenna kennaniifi, ka waan hamtu tolche kaasaniti wollaala iti murani.

³⁰Anini dandae ufiti woma intolchu: aka Waaqi nati himu gula qora; qorsumaani tiyya ta d'ugaati; wonti akanatiifi anini fed'i tiyya inbarbaadu ammo fed'i abba na erge barbaada.

³¹Yo anini ufi d'ugeese, dubbini tiyya d'ugaaniti.

³²Ammo nama na d'ugeesu toko jira, d'ugeesani inni na d'ugeesu tama d'ugaati, anini imbeekha.

³³ Nami isani nama iti ergitani Yohana; innileeni d'uga suni la d'ugeese.

³⁴D'ugeesani nami na d'ugeesu woma keesa injirtu, ammo aka isani baafamtaniifi, anini waan kana dubbad'a.

³⁵Yohanani ifse bobeete ifsitu, isani haga bulti diqo ifsa isatiini gammadu feetani.

³⁶Anini d'uga ta haga Yohana ira jirtu qaba: hujiini anini tolchu ta Abbaani Tolchi naani jed'e, isiini naa dubbatte, aka Abbaani na erge agarsiifti.

³⁷Abbaani na erge naa d'ugeesa. Isani qonqo isaa taka ind'ageenne yokhaani bifa isaa taka inagarre;

³⁸ammalle waan nama inni erge d'ugefachu diddaniifi, dubbi isaa ta garaa keesani keesa teetu inqabdani.

³⁹Isani T'aafi keesa barbaaddani waan isi keesa jireenna hegeri argattani ufi seetani. Ammo T'aafinu naa d'ugeesiti!

⁴⁰Taatule isani, aka jireenna argattani, nati d'ufu diddani.

⁴¹Anini guddinna nama iraa imbarbaadu.

⁴²Ammo anini isani beekha, aka isani jaalala Waaqa garaa keesani keesa inqamne.

⁴³Anini maqa Abba kiyyatiini d'ufe, ammo isani na fud'achu diddani; hojja nami d'ibiini maqa ufiitini d'ufu inuma fud'attani.

⁴⁴Isani akami dandeetani d'ugefattani, ka guddinna wolira argattani, ammalle guddinna Waaqa tokocha iraa d'ufu barbaadu diddani?

⁴⁵Waan anini Aabbooti isani himad'u insehiina; nami isani himatu toko jira, Musa, ka isani abdattani.

⁴⁶Yo Musa d'ugefattani, sila dubbi tiyyale d'ugefattani, waan inni odu tiyya t'aafeefi.

⁴⁷Ammo yo isani waan inni t'aafe d'ugefachu baatani, akami dubbi tiyya d'ugefattani re?