Read BORANA BIBLE – KITAABA WAAQA Huji Ergattu 10 Bible Online

Huji Ergattu 10 - BORANA BIBLE – KITAABA WAAQA bible

Huji Ergattu 10

¹Namicha toko jira, Kaisaria keesa, maqaani isaa Kornelio; gumi askarti d'ibba toko ta Taliana jed'ani guddaani isa.

²Inni nama dansaa ka Waaqa sodaatu, isaafi worri isaaleeni. Inni guddo maro Waaqatiifi wo namaa kenne, guyya ch'ufale Waaqa kad'ata.

³Duuba daayya keesa malaika Waaqa ta isati diideesite d'uftu arge, saa sagali ka guyya. Isiini waan isaani jette, Kornelio!

⁴Inni isi arginaani rifate waan jed'eeni, Maal, Aabbo? Isiini waan jetteeni, Kad'acha teetiifi waan atini maro Waaqatiifi namaa kennitu ya fuula Waaqa durati si qaabatani.

⁵Amma nama gara dira Yafa ergi, nama toko ka Simoni Petro jed'ani yaami.

⁶Inni keessuma nama toko, ka Simoni jed'ani, ka goga machaleesuti; mani isaa afaani galaanati.

⁷Malaikaani Kornelioni dubbatte taani deemnaani, inni hojattu ufi lama yaame, ammalle askarticha dansa toko ka guyya ch'ufa waan isaa ilaalule yaame.

⁸Waan kana ch'ufa worrati hasae jennaani Yafati worra erge.

⁹Boriyya worri dirati d'iaannaani, saa jaa ka guyya Petroni aka Waaqa kad'atu mana gubba kore.

¹⁰Inni beelomnaani waan nyaatu fed'e; ammo ato sagale d'aabanu, daayya arge.

¹¹Ammalle gubba banamtufi waan aka woya ta humbi afraanu hid'ani isa dura lafati gadi buusani arge.

¹²Waan suni keesa bineensa gosa heddu, ka miila afuri qabuti jira, ka garaani lafa ira lohuleeni, allaatileeni.

¹³Qonqooni isati d'ufte waan jetteeni, Petro, kai, waan kana qalad'u nyaad'u.

¹⁴Ammo Petroni waan jed'e, Laki Aabbo, anini haga d'alad'e waan akana kana ka qulqullo intahiini yokhaani waan hamtu akana takale inyaanne.

¹⁵Qonqooni taani ammalle maro lameeso deebite waan jetteeni, Waan Waaqi qulqulleeseeni, Qulqulloniti injed'iini.

¹⁶Wonti kunini maro sadi akasi taate, jennaani woyaani gubbati oldeebite.

¹⁷Ato Petroni waan daayya inni arge suni heregu, jari Kornelioni erge kaani mana Simoni gaafate, balbala dura eje,

¹⁸qonqo olfud'ate aka Simoni ka Petro jed'ani achi jiru gaafatani.

¹⁹Ato Petroni daayya suni heregu, Lubbuuni Qulqullooni waan isaani jette, Ilaali, nami sadi sii barbaadu jira,

²⁰tanaafi kai, gadi bui, worra woliini deemi, insodaatini; anati worra erge.

²¹Tanaafi Petroni gara jara Kornelioni isati erge kaani gadibue waan jed'eeni, Nami isani barbaadani ana; maafi d'uftani?

²²Worri waan jed'e, Kornelio gudda askarti, nama d'uga, ka Waaqa d'ugefatu, ka gochiti Yahudi ch'ufti saadu, afaani malaika qulqullo tokotiini Waaqi gorse, aka inni mana isati si yaame dubbi tante d'agayu.

²³Jennaani Petroni, Olduuda jed'e worra bulche. Boriyya Petroni worra woliini kae deeme, oboleyaani gari ta Yafa isa woliini yaate.

²⁴Iftaani taani worri Kaisaria olduude. Kornelioni worra eeguu jira; inni ya fiit'a ufitiifi jaalaani ufi ch'ufa wolti yaame.

²⁵Ato Petroni mana seenu jiru, Kornelioni gadi bahe miila isati jige isa guddise.

²⁶Ammo Petroni isa olqabe waan jed'eeni, Oljed'i, anileeni akuma kanke namuma.

²⁷Ato Petroni tae isaani hasau, mana olseennaani nama heddu ka woltiwoldae arge.

²⁸Inni waan worraani jed'e, Isani imbeetani, aada keesa Yahudiini nama gosa d'ibi wahela tolfatte woliini inteetu. Ammo Waaqi la na garsiise, aka anini nama tokole tuffad'e yokhaani, Inni qulqulloniti injenneeni.

²⁹Tanaafi hojuma na yaamani suni anini dubbi male isaniti d'ufe; duuba anini isani gaafad'a maafi na yaamtani?

³⁰Kornelioni waan jed'eeni, Saati akana tana guyya afuri ka dabre, ato anini mana kiyya keesa tae Waaqa kad'ad'u nami woya bibilit'u toko qabu na dura eje.

³¹Waan naani jed'e, Kornelio, kad'acha tante ya d'agayani, ammalle aki atini biyya wo kennitu la fuula Waaqa dura gahe, akasiini amma ya si qaabatani.

³²Tanaafi nama gara dira Yafa ergi, nama toko ka Simoni Petro jed'ani yaami, inni keessuma nama Simoni jed'ani toko ka goga machaleesuti, ka afaani galaana tau.

³³Duuba anini maro tokotu si yaame, ammalle ati waan dansa tolchite, ka d'ufte. Ammatana nu ch'ufumaani arma jirra, Waaqa dura, aka waan ch'ufa ka Aabbooni siti hime d'ageennu.

³⁴ Jennaani Petroni waan jed'e, D'uguma anini ya hubad'e aka Waaqi nama tokole wolindabarsine ch'ufa qit'e takati heregu.

³⁵Ammo gosa ch'ufa keesa nama isa d'ugefate waan d'uga tolchu inni injaalata.

³⁶Dubbi suni ta Waaqi gara ijoolle Israeli erge, aka nagaya Yeso Kristo keesa hasaani, inni Abba nama ch'ufaati, isani imbeetani.

³⁷Isani waan jabdu lafa Israeli, arda Galilaya kana keesati eegi Yohanani, waan batiso namati hime asi tahe imbeetani,

³⁸aka Waaqi Yeso Nazareti Lubbu Qulqullofi jabeennaani muude, isani imbeetani. Inni fulla ch'ufa dedeeme waan dansa tolche, nama Sheet'ani gaargalche ch'ufa fayyise, waan Waaqi isa woliini jiruufi.

³⁹Nu d'uga waan inni tolche ch'ufa lafa Yahudi keesafi Yerusalemu keesaleti. Worri isa ijeese, mukha irati fannise.

⁴⁰Ammo guyya sadeeso Waaqi isa kaase, diideese nama agarsiise.

⁴¹Nami ch'ufti isa ingarre, ammo jara d'uga isaa tahe, ka Waaqi qara fohateefi nuleeni ka isa woliini nyaanne d'unne, eegi inni duisa keesa kae, isa agarre.

⁴²Inni nuti d'aame aka nama barsiimne d'ugeesinu, aka nami Waaqi fohate isuma, ka dubbi nama jiruufi ka duele qoru.

⁴³Raagi ch'ufti isa d'ugeesa, aka maro maqa isatiifi nami isa d'ugefatu ch'ufti araarama argatu.

⁴⁴Ato Petroni ammalle dubbi tana dubbatu, Lubbuuni Qulqullooni worra dubbi tana d'agaye ch'ufa ira bute.

⁴⁵Worri Yahudi ka d'ugefate ka Petro woliini d'ufe, waan Waaqi Lubbu ufi Qulqullo gosa d'ibile ira buusefi guddo mame.

⁴⁶Wonti akanatiifi worra afaani d'ibi dubbate Waaqa guddisu d'agayani. Jennaani Petroni waan jed'e,

⁴⁷Eentu dandae bisaaniini worra kana batifamu d'owa, eegi worri akuma keenna Lubbu Qulqullo argate?

⁴⁸Inni worra kana maqa Yeso Kristotiini batisa jed'e, Jennaani worri isa kad'ate aka inni bulti diqo achi tau.