Read BORANA BIBLE – KITAABA WAAQA Huji Ergattu 20 Bible Online

Huji Ergattu 20 - BORANA BIBLE – KITAABA WAAQA bible

Huji Ergattu 20

¹Eegi gohanti ch'aamte, Pauloni gumi Yeso wolti yaame gorse nagaya d'aamate kae Makedonia d'aqe.

²Lafa suni keesa dedeeme gumi guddo gorse lafa Griki d'aqe.

³Jia sadii achi tae. Shamu hobolooni d'aqisa kaanaani, aka Yahudiini d'ossaani isa eedu d'agaye; duuba aka kara Makedoniatiini galu kutate.

⁴Sopatroni ilmi Piro ka dira Beroya d'ufe isa gula deeme ammalle jari kunileeni isa gula yae; Aristakofi Sekundo, worra lafa Thesaloniketifi Gayo lafa Derbetifi Timotheofi Tikikofi Trofimo, worra Asia.

⁵Jari kunini nu dura dabre lafa Troati nu eege.

⁶Guyyaani Qit'a bukho inqamne dabarraani nu Filipi hobolooni kaane, eegi bulti shani Troati worra d'aqamne, haga bulti torba achi teenne.

⁷Guyya qara ka torbaani nu woli woldeenne qit'a ch'absine. Pauloni worrati hasae, aka kaisa boriyyaati kurfefatu haga saa jaa ka halkani hasae.

⁸Fulla nu wolti woldeenne ta mana gubba suni keesa ifse hedduti jira.

⁹Nami kaima toko ka Eutiko jed'ani fulla dirisha tae; waan Pauloni guddo hasaeefi inni muge, haga mana sadeeso ka gubbati d'aqate lafa d'ae, isa due lafaa fuud'ani.

¹⁰Pauloni gadibue isati gadijed'e, iti mamarate waan jed'e, Inahiina, inni indoone.

¹¹Eegi inni oldeebie qit'a ch'abse nyaate, haga baraaqa d'eereese hasae, duuba kae deeme.

¹²Worri kaani kaima kaani ka jiru fuud'ani garaa jabaatani.

¹³Pauloni haga Aso miilaani deemaa kanaani, Hobolooni koota arti na fuud'a nuuni jed'e, duuba nu hobolooni dabare Aso yaane.

¹⁴Inni Asoti nuuni baanaani, hobolo keesa isa keenne Mitilene deemne.

¹⁵Hobolooni achi kaane boriyya Kio d'umne. Iftaani Samo d'umne, iftaani achaantu Mileto geenne.

¹⁶Pauloni aka hobolooni Efeso biraa dabru kutate, maro Asia keesati turu imfeeneefi. Inni arifate aka yo dandae, ato guyyaani Pentekoste ingahiini Yerusalemu gahu.

¹⁷Ato Mileto jiru, inni nama gara Efeso erge jaarole gumi Waaqaa yaame.

¹⁸Worri gara Paulo d'ufe duuba inni waan worraani jed'e: Haga guyya qara ka anini Asia d'ufe, aka anini oole bule imbeetani.

¹⁹Gaafa Yahudiini na gaargalchite na ijeesu feete, ufi diqeese imimaani bohe huji Aabbo hojad'e.

²⁰Ammalle waan isani olaana tokole inhambimne, ato isanii agarsiise barsiisu, nama duraafi maneeni teesani keesaleti.

²¹Anini Yahudifi gosa d'ibileti layu hime, aka daba lakisani Waaqati deebiani Aabbo Yeso d'ugefatani.

²²Amma anini gara Yerusalemu d'aquu jira, waan Lubbuuni Qulqullooni na deemsifteefi; ammo waan achiti tahu imbeekhu.

²³Anini imbeekha, Lubbuuni Qulqullooni ya nati himte, dira ch'ufa keesa hid'aansafi gaargalati na eegata.

²⁴ Ammo anini jireenna kiyya inheregu, waan dansale insehu, aka anini deema tiyya gammadaani hobaase huji tiyya ta Aabbo Yesoni naa kenne, ta Odu Dansa ta eeba Waaqa d'ugeesu guutu.

²⁵Anini imbeekha, aka isaaniini ch'ufti, ka anini jiddu teesaniti Finna Waaqa hasae, fuula kiyya deebitani ingarre.

²⁶Tanaafi anini guyya kana isani durati hima, aka d'iigi nama tokoleeni na gubbaa injirre.

²⁷Anini fed'i Waaqa tokole isani ind'ossine.

²⁸Tanaafi ufiifi hooliye Lubbuuni Qulqullooni isaniti kennitele qorqorad'a, aka gumi Aabbo ta inni d'iiga ufitiini bitate nyaachiftani.

²⁹Anini imbeekha aka eegi anini deeme, yeyiini hamtuuni jiddu teesani d'ufte hooliye fit'u.

³⁰Ammalle jiddu teesani keesa namati d'ufa, ka waan hamtu dubbatu, aka gumi Yeso ufi gula deebisu.

³¹Tanaafi eegad'a, qaabad'a, aka anini haga ganna sadi halkaniifi guyya nama ch'ufa imimaaniini gorse.

³²Ammatana harka Waaqatiifi dubbi eeba isaati isani lakisa. Isiini dandeete isani jabeesite worra qulqullo woliini d'aala isani kenniti.

³³Anini maldaa yokhaani worqi yokhaani woya nama tokole ind'araane.

³⁴Ee, isanileeni imbeetani, aka anini harka kiyyaani waan anini fed'ufi waan waheli kiyya fed'u ch'ufa hojad'e argad'e.

³⁵Anini ya waan ch'ufa isani agarsiise, aka nu akasi hojanne nama lalaafa qarqaaru malle. Ammalle dubbi Aabbo Yesoni jed'e qaabad'a, ta inni, Wonti kennani waan fud'atani ira eeba qabdi jed'e.

³⁶Eegi akasi dubbate, inni jilbifate worra ch'ufa woliini Waaqa kad'ate.

³⁷Worri guddo bohe qach'eera Pauloti jigani isa d'ungatani.

³⁸Maro dubbi inni dubbate, Isani deebitani fuula kiyya inargitani jed'eefi guddo lalefatani. Duuba haga hobolo isa gegeesani.