Read BORANA BIBLE – KITAABA WAAQA Huji Ergattu 8 Bible Online

Huji Ergattu 8 - BORANA BIBLE – KITAABA WAAQA bible

Huji Ergattu 8

¹Sauloni ijeecha isaa Ee jed'e. Guyyuma suni gumi Waaqa ta Yerusalemu jirtu guddo gaargalchani. Duuba ergattu male gumiini taani ch'ufti lafa Yudeatiifi Samaria keesa gargari firfirfamte.

²Jari d'ugaa toko Stefano guddo bohe awaale.

³ Ammo Sauloni gumi Waaqa guddo gaargalche, mana ch'ufa seene, d'iirafi nad'eenile hid'aansati guure.

⁴Duuba worri gargari firfirfame kaani fulluma ch'ufa yae dubbi Waaqa odeese.

⁵Jennaani Filiponi gara dira Samaria d'aqe waan Kristo worrati hasae.

⁶Gumiini garaa tokooni waan Filiponi jed'e ch'aqafte, waan mama ka inni tolche d'ageete argite.

⁷Jinniini hamtuuni qonqo olfud'atte iyite nama heddu keesaa yaate; nami hedduuni ka kokotaefi ka naafate fayye.

⁸Akanaani gammadi guddaani dira suni d'ufe.

⁹Ammo namicha tokoti jira, ka Simoni jed'ani, ka duri dira suni keesati huji yuuba tolche, worra dira Samaria, sobe, jabeenna ufi odeese.

¹⁰Nami ch'ufti dubbi isaa ch'aqase, diqaafi guddaleeni waan jed'e, Namichi kunini humna Waaqa ta Humna Guddo jed'aniini.

¹¹Worri ch'ufti isa ch'aqase waan inni huji yuuboomatiini guyya heddu worra sobeefi.

¹²Ammo worri Filipo Odu Dansa ta Finna Waaqatiifi maqa Yeso Kristo hasau d'ageennaani d'ugefate, d'iirafi nad'eenileeni batifamte.

¹³Jennaani Simonileeni d'ugefate; eegi batifame, Filipo gula deeme, waan mamiisatiifi akheekha inni tolche arginaani guddo mame.

¹⁴Ergattuuni ta Yerusalemu keesa teetu aka gumiini Samaria dubbi Waaqa d'ugefatte d'ageennaani, Petrofi Yohana iti ergite.

¹⁵Worri d'ufe, Waaqa worraa kad'ate, aka Lubbu Qulqullo argatani.

¹⁶Lubbuuni Qulqullooni qara worra ira imbuune, ammo maqa Aabbo Yeso ch'allaani batifamani male.

¹⁷Petrofi Yohanani harka isaani worra ira keennaani Lubbu Qulqullo argatani.

¹⁸Simonini aka eegi ergattuuni harka worra ira keete Lubbu Qulqullo argatani arginaani, hori worraa kennu fed'e

¹⁹waan jed'e, Humna tana nale kenna, aka nami anini harka ira kayu Lubbu Qulqullo argatu.

²⁰Ammo Petroni waan isaani jed'e, Hori kanke woliini bada, waan atini kenna Waaqa waan horiini bitatu seetefi.

²¹Atini waan kana keesa diqole qooda inqabdu, garaani kanke fuula Waaqa durati dansaniti.

²²Tanaafi ch'ubbu tante tana iraa deebii, Waaqa kad'ad'u, aka herega garaa keti si araaramani.

²³Wonti akanatiifi anini ya arge, atini had'aa had'ooftu qabda, ammalle hid'aansa ch'ubbuu ke jirta.

²⁴Jennaani Simonini waan jed'eeni, Waaqa na kad'ad'a, aka wonti isani baantani kunini tokoleeni nati ind'umne.

²⁵Worri eegi dubbi Aabbo odeese, Yerusalemuti gale, Odu Dansa tana olla Samaria heddu keesati hasae.

²⁶Malaikaani Aabbo Filipoti dubbate waan jetteeni, kai bita deemi fulla kara Yerusalemu bahe Gaza d'aqu (karaani sunini amma injiru).

²⁷Jennaani inni kae deeme. Namicha sangisisani toko jira, ka lafa Sidaama. Inni nama gudda ka hayyiti Sidaama ta Kandake jed'ani jala hojatu, ka hori isii qorqoratuufi. Inni Yerusalemu d'ufe, aka Waaqa kad'atu.

²⁸Ato galu, gaari ufi keesa tae, kitaaba raaga Isaya soome.

²⁹Jennaani Lubbuuni Qulqullooni waan Filiponi jette, Beeni, gaari sunti d'iaad'u.

³⁰Tanaafi Filiponi gara isaa utaale, isa kitaaba raaga Isaya soomu d'agaye waan jed'eeni, Waan soomtu kana mid'aafatta?

³¹Inni waan jed'eeni, Akamiini dandae mid'aafad'a, yo nami na qajeelche male? Duuba inni Filipo kad'ate aka inni gaari yaabate isa woliini tau.

³² Fullaani inni t'aafi keesa soomu tana, Akuma hoola qalani ijeechati isa geesani, ammalle akuma ilmeeni hoola ta abbaani rifeensa iraa ch'iru ch'alliftu, akasuma ch'allise.

³³Isa diqeesani, qorsuma d'uga iraa d'owani. Eenuti waan d'aloota isaa hasaa? Jireenni isaa lafa keesaa la hobae.

³⁴Namichi kaani waan Filiponi jed'e, Raagi eennu baana? Ufi baana mo nama d'ibi?

³⁵Jennaani Filiponi fulluma t'aafi suni iti keyate waan Yeso isati hasae.

³⁶Ammalle ato worri yau, fulla bisaani toko d'ufani; namichi kaani waan jed'e, Me ilaali, bisaaniti arma jira, malti batiso argachu naa d'owa? [

³⁷Filiponi waan jed'eeni, Yo atini garaa kanke ch'ufaani d'ugefatte si batisani, Inni waan Filiponi jed'e, Ind'ugefad'a aka Yeso Kristo Ilma Waaqa.]

³⁸Gaari d'aabachiise, worri lachu bisaani keesa duude Filiponi isa batise.

³⁹Bisaani keesa baanaani, Lubbuuni Aabbo Filipo fuute. Namichi kaani lafaa isa d'abe, ammo gammadaani kara ufii iti d'aabate.

⁴⁰Ammo Filipo lafa Azototi argani; inni keesa deeme, dira ch'ufa keesati Odu Dansa odeese, Kaisarini bahe.