Read BORANA BIBLE – KITAABA WAAQA 1 Korintho 3 Bible Online

1 Korintho 3 - BORANA BIBLE – KITAABA WAAQA bible

1 Korintho 3

¹Taatule oboleyaani, anini qara aka nama Lubbu Waaqa qabuti dubbad'u isaniti dubbachu dad'abe; ammo aka nama nafa gula deemu isaniti dubbad'e, aka ijoolle Kristo keesa.

² Anini aanani isani obaase male sagale jajabdu isani inyaachiimne; wonti akanatiifi isani waan kanaa kurfo intaane. Ammatanale isani kurfo intaane,

³waan isani ammalle aka nama nafa gula deemu jirtaniifi. Hojja isani wolqot'iiftani woldiddani, wonti kunini aka isani nama lafa ka aada lafa gula fidamu ingarsiiftu?

⁴ Hojja nami toko, Anini goli Pauloti jed'u, ka d'ibiini, Anini goli Apoloti jed'u, wonti kunini aka isani nama lafa agarsiiftiyu?

⁵Apolooni eennu? Pauloni eennu? Nuuni lachu hojattu Waaqaati ka isani d'ugefachiise. Nuuni ch'ufti huji ta Aabbooni nuu kenne tolchina:

⁶ Anini sanyi oobre, Apolooni bisaani iti nanaqe, ammo Waaqati mid'aani suni baase.

⁷Nami oobrufi ka bisaani iti naquleeni woma keesa injiru. Waaqi woi keesa jira, waan inni mid'aani baasuufi.

⁸Nami oobrufi ka bisaani iti naqu waan taka; Waaqi nama ch'ufayu huji inni tolche gula wo kennaafi.

⁹Wonti akasitiifi nu hojattu Waaqa woliini hojattu, isani oobru Waaqaati. Isanileeni Mana Waaqaati.

¹⁰Eeba Waaqi naa kenneeni anini akuma ijaartu manaa yayaba manaa kaye, yayaba suni gubbati nami d'ibiini mana ijaaru jira. Ammo nami ch'ufti aka ijaaru ilaalu male.

¹¹Wonti akanatiifi Waaqi ya qara Yeso Kristo yayaba tokocha tolche, dandaani yayaba d'ibi inkayani.

¹²Nami gari worqiini ijaara, ka gari qarsi, ka gari d'akha gati guddo qabu, ka gari mukha, ka gari buuyofi aalaani ijaara.

¹³Hujiini nama ch'ufa Guyya Kristoni d'ufu mullatti. Ibidi Guyya suni huji nama ch'ufa imullisa. Ibidi ilaaleti jabeenna isii agarsiisa.

¹⁴Yo waan nami yayaba gubbati ijaare ibidi ingumne, nami suni wo argata.

¹⁵Ammo yo isiini gubatte, nami sunini woma inargatu; ammo inni imbaha, akuma nama ibida keesaa bahe.

¹⁶ Isani aka mana Waaqa ufi imbeetani? Ammalle aka Lubbuuni Waaqa isani keesa teetu ufi imbeetani?

¹⁷Tanaafi nama Mana Waaqa balleesu, Waaqileeni imballeesa. Wonti akanatiifi mani Waaqa qulqullo, isanileeni mana isaa suni.

¹⁸Nami tokoleeni ufi insobini. Nami waan guddo qalbi qabu ufi sehu, herega nama gula, ha ufi daalleesuuti, aka qaroomu.

¹⁹ Wonti akanatiifi wonti nami lafa qarooma sehu fuula Waaqa durati woma imbaatu. Akuma t'aafiini jettu, Waaqi nama qaro qarooma isaa keesati t'urura keesa kaya.

²⁰ T'aafiini d'ibileeni waan jettu, Aabbooni aka heregi worra qaro woma imbaane imbeekha.

²¹Tanaafi nami tokoleeni maro waan nami tolchu ufi inguddisiini. Wonti ch'ufti teesani:

²²Paulofi Apolofi Petrofi lafa tanaafi jireennafi duisafi waan ammatiifi ka hegerileeni ch'ufti teesani;

²³isani ka Kristoti, Kristoleeni ka Waaqaati.