Read BORANA BIBLE – KITAABA WAAQA Galatia 6 Bible Online

Galatia 6 - BORANA BIBLE – KITAABA WAAQA bible

Galatia 6

¹Oboleyaani tiyya, yo nami ato imbeekhiini wollaala seene, isani worri Lubbu Waaqa qabu ha isa qajeelchuuti; ammo kara laanatiini tolchu malani. Ufi tissi, aka atileeni ilaalacha keesa inseenne.

²Ulfinna woli baad'a, kara kanaani seera Kristo guuttani.

³Yo nami woma intahiini wo ufi sehe, inni ufi daalleesu jira.

⁴Nami ch'ufti huji ufi laalu male. Yo dansa taate, ha waan tolcheeni ufi guddisuuti, ato waan nami d'ibiini tolcheeni wolbira inqamne.

⁵Wonti akanatiifi nami ch'ufti baa ufi baachu male.

⁶Nami dubbi Waaqa barsiisani ha waan dansa qabu ch'ufa nama isa barsiiseeni gahuuti.

⁷Ufi insobina: nami tokoleeni dandae Waaqa indaalleefatu. Nami ch'ufti waan oobre murata.

⁸Yo inni waan nafi isaa fed'u ch'alla oobrate, duisa murata. Yo inni waan Lubbuuni feetu ch'alla oobrate, Lubbu suni ira jireenna hegeri argata.

⁹Tanaafi waan dansa tolchu dad'abu himmalle; wonti akanatiifi yo nu indad'amne, hojjaani nu murannu ind'ufti.

¹⁰Tanaafi haga qoomni qamnu nama ch'ufaa waan dansa tolchu malle, keesuma worra d'ugefacha aka teenna qabu.

¹¹Aka anini harka kiyyaani gugurdise t'aafu ilaala!

¹²Worra ufi guddisu fed'u, ka waan mullatatiini kiyyibuuti, qabanqaba isanii qabu fed'a. Wonti worri akasi tolchuufi aka maskali Kristotiifi ingaargalle.

¹³Worri qabanqaba qabatule seera gula iyau, worri aka isani aada q qabanqaba tana qabattani fed'a, aka akasiini aada nafa ta isani tolfatani tanaani, ufi korsu.

¹⁴Ammo, anini waan maskali Aabbo Yeso Kristo ch'alla saada; maskali tanaafi lafti gara kiyyaani doote, anileeni gara lafaatiini due.

¹⁵Qabanqaba woma keesa injirtu. Wonti fed'ani uumama haraa.

¹⁶Worri aada tana gula yau, nagayafi naasuuni ha worra woliini teetu, worraafi gumi Waaqa ch'ufale!

¹⁷Armaa achi, nami tokoleeni na ingaargalchiini; wonti akanatiifi gadaanisi nafa kiyya aka anini tisse Yeso agarsiisa.

¹⁸Eebiti Aabbo keenna Yeso Kristo isani ch'ufa woliini jiraatinna, oboleyaani tiyya. Amini.