Read BORANA BIBLE – KITAABA WAAQA Efeso 4 Bible Online

Efeso 4 - BORANA BIBLE – KITAABA WAAQA bible

Efeso 4

¹Anini ka maro anini Aabbo hojad'uufi na hid'ani, isani kad'ad'a yaamicha Waaqi isani yaame gula yaa.

² Ufi olimfuud'ina, laana yaa, waan ch'ufa obsa. Jaalala teesani wolqarqaarsaani agarsiisa.

³Takaa tahiti Lubbuuni namaa kennitu jabeesa qorqorad'a, nagaya takaa isani tolchu suniini.

⁴Nafa tokofi Lubbu toko ch'allati jira, akuma abdiini toko, ta Waaqi iti isani yaame.

⁵Aabbo tokofi d'ugefacha tokofi batiso toko ch'allati jira;

⁶Waaqa toko ch'allati jira ka Abba nama ch'ufaa; inni waan ch'ufa ira jira, waan ch'ufa keesa hojate waan ch'ufa keesa jira.

⁷Nu nami ch'ufti yayu herega Kristo gula eeba arganne.

⁸ Akuma t'aafiini jettu, gaafa inni gubba olkore worra hid'ani heddu ufi gula fuud'e, namale wo kenne.

⁹Duuba, Inni gubbaa olkore jechuuni maani? Qaraa fiit'e inni gadi bue jetti lafa jalati.

¹⁰Namuma gadi bue suniti ammalle achi gubbati oldeebie, aka waan ch'ufa guutu.

¹¹Isati wo namaa kenne; nama gari ergattu tolche, ka gari raaga tolche, ka gari odeesitu dubbi tolche, ka gari tissitu tolche, ka gari barsiiftu tolche.

¹²Wonti inni waan kana tolcheefi aka gumi Waaqa ch'ufa huji Waaqaati kurfeesu, aka nafa Kristo jaarani.

¹³Duuba nuuni ch'ufti garaa tokooni, d'ugefacha teennafi beekhuma teenna ta Ilma Waaqaatiini wolti d'umna; nama gugurda taane, haga Kristoni gahu geenna.

¹⁴Iti deebine ijoolle d'awaani galaana d'od'ooftu intaanu yokhaani ta barsiisaani nama d'ara ch'ufti chochooftu intaanu, ka malteeni nama d'ibi kara ira gorsu.

¹⁵Ammo jaalalaani d'uga dubbanne kara ch'ufaani Kristo, ka mata keenna, keesa guddachu malle.

¹⁶ Jabeenna isaatiini nafi keenna ch'ufti taka, ammalle nafi ch'ufti mita ufitiini wolti eja. Tanaafi yo mitaani ch'ufti garaa ufitiini hojate, nafi ch'ufti guddate jaalalaani jabaata.

¹⁷Maqa Aabbootiini anini waan kana jabeese jed'a: aka worra Waaqa imbeenne, ka qalbiini worraa woma imbaanne,

¹⁸ka qalbiini ammalle dukana keesa jirtu intahiina. Worri jireenna Waaqi kennu keesa qooda inqabu; wonti akanatiifi worri daalle woma imbeekhu.

¹⁹Ch'eera inqabu huji dabati ufi kenne, waan ch'eera ka aka ch'ufa ka ira ufi ind'owine taha.

²⁰Wonti isani waan Kristo barattani akasiiniti!

²¹Isani ya waan isaa d'ageetani, ammalle aka nama isa gula yau ya d'uga Yeso keesa jirtu barattani.

²² Tanaafi jireenna keesani dullacha duri, ka waan isani duri taatani isani tolche — jireenna duri ka d'araani hamtuuni balleesite baafad'a.

²³Garaafi qalbi teesani hareesa tolchu malani.

²⁴ Jireenna hareesa aka woya fud'ad'a, ka fakeenna Waaqa gula mid'aasani, ammalle ka finna d'uga ka qajeelumafi qulqulloomaani mullatu.

²⁵ Iti deebitani inkiyyibiina duuba! Nami ch'ufti ha oboleesa ufiti d'uga dubbatuuti; wonti akanatiifi nuuni ch'ufti nafa Kristo keesati mita.

²⁶Yo dalantani, dalansuuni teesani daba keesa isani inseensisiini; dalansuuni aduuni isaniti ind'iini.

²⁷Sheet'ani qoomni inargatiini.

²⁸Nami duri wo hatu ha hanna lakise hojatuuti, aka harka ufitiini ufi bulche hiyyeeyile qarqaaru.

²⁹Hasaa keesati dubbi hamtu injed'ina. Dubbi dansa, ta nama qarqaarte jabeesitu ch'alla jed'a, aka worri d'agayu eeba argatu.

³⁰Lubbu Qulqullo Waaqa ilaalefachiisiina; Lubbuuni tunini beesisa Waaqa ka isani gubba jiru, ka aka guyyaani isani balchoomsani d'ufu agarsiisu.

³¹Garaa hameennafi, d'araafi dalansu ch'ufa lakisa. Iti deebitani woli loltani woli inarabsina! Ammalle wolinjibiina!

³² Ammo arja taha, woli naha, woli araarama, akuma Waaqi maro Kristotiifi isani araarame.