Read BORANA BIBLE – KITAABA WAAQA Yakobo 2 Bible Online

Yakobo 2 - BORANA BIBLE – KITAABA WAAQA bible

Yakobo 2

¹Oboleyaani tiyya, yo isani Aabbo keenna Yeso Kristo, Aabbo guddinna, d'ugefattani, nama tuffattani gargari imfiliina.

²Yo sila nami dureesi, ka qube worqitiifi woya dadansa qabuufi hiyyeesi woya ch'ich'ite qabu, woldeenna woliini olduudani,

³duuba isani namicha woya dansa qabu kaani hurriftani fuula ke d'uftani waan jettaniini, Barch'uma dansa kana ira tai, ammo hiyyeesa kaaniini, Achi eji, yokhaani fulla barch'uma kiyya kana d'aatu lafa tai jettaniini,

⁴ya nama herega hameennatiini gargari nama qoodu taatani.

⁵Ch'aqasa oboleyaani tiyya! Waaqi hiyyeeyi lafa tana fohate, aka d'ugefachaani duroomte, finna inni worra isa jaalatu d'aamate argattu.

⁶Ammo isani hiyyeeyi intufattani! Eentu isani gaargalche fulla qorsuma isani geesa, dureeyi male?

⁷Nami maqa dansa, ka Waaqi isanii kenne, hameenna dubbatu worruma suni.

⁸ Yo seera hayyu suni, ka t'aafi qulqullo keesati t'aafani guuttani, ka, nama ch'ufa aka ufi jaalattu jaalad'u jed'u, ya waan dansa tolchitani.

⁹Ammo yo nama gargari filtani, la daba tolchitani, Seera gula wollaala isaniti murani.

¹⁰Wonti akanatiifi yo nami seera ch'ufa guute, ammo toko yake, inni ya seera ch'ufa dabre.

¹¹ Wonti akanatiifi namuma, d'iirafi nad'eeni wolbarate garayu wolintolfatina jed'eti, Nama inijeesiini jed'e. Tanaafi yo atini seera qara kaani guute, ammo nama ijeefte, atini yayu seera ch'absite.

¹²Waan dubbattanifu waan tolchitani keesa, akuma nama seeri nama balchoomsu qoru taha.

¹³Waaqi, yo dubbi nama naasu inqamne qoru, isale inahu; ammo naasuuni qorsuma dabsatti.

¹⁴Oboleyaani tiyya, Maani namaa baati, yo nami, Anini d'ugefacha qaba jed'e, ammo hujiini isaa ingarsiimne? D'ugefachaani suni ch'allaani isa imbaafti?

¹⁵Yo sila oboleesafi oboleetiini daara qabaate, liqimsale d'abde, duuba nami toko isani keesa waan jed'uuni,

¹⁶Waaqi isani eebisinna, woya uyyifad'a, sagale nyaad'a, ammo yo waan nafi sila fed'u inkennineefi maani baati?

¹⁷D'ugefachaani akasi, yo isiini koba jiraate, ka hujiini dansaani bira injirre, la doote.

¹⁸Ammo nami toko waan jed'u, Atini d'ugefacha qabda, ammo anini huji qaba. Ammo anini waan jed'uuni, D'ugefacha ta huji dansa inqamne na agarsiisi; d'ugefacha tiyya anini huji dansaani sii garsiisa jed'aani.

¹⁹Aka Waaqi toko ya d'ugefatte? Guddo dansa. Ilaali, jinnileeni ind'ugefatti, ammalle sodaatte holatti.

²⁰Isii, ati daalle? Aka d'ugefachaani, huji dansa tolchani male, woma imbaanne barachu feeta?

²¹ Ehayi, Abbaani keenna Abrahamuuni, eegi inni ilma isaa Isaaqo sorio Waaqaa baase, maro huji dansaatiifi d'uga argateeyu?

²²Aka d'ugefachaafi hujiini dansaani inni hojate woljabeesite, d'ugefachaani isaa hujiini qit'oofte inargitaayu?

²³ T'aafiini ta, Abrahamuuni Waaqa d'ugefate, duuba maro d'ugefacha isatiifi d'uga isaa heregani jettu ya guutamte. Waaqileeni, Jaala kiyya isaani jed'e.

²⁴Tanaafi, aka isani argitani, nami huji gula d'uga argata, d'ugefachaani ch'allaani woma imbaatu.

²⁵ Sharmut'itiini Rahabu jed'anileeni akasuma taate. Maro huji isitiifi d'uga argatte, waan isiini ergattu Yahudi bulchite, kara d'ibi galchiteefi.

²⁶Akuma nafi lubbu inqamne duu, akasuma d'ugefachaani huji inqamneleeni dooti.