Read BORANA BIBLE – KITAABA WAAQA Jaallaboota 8 Bible Online

Jaallaboota 8 - BORANA BIBLE – KITAABA WAAQA bible

Jaallaboota 8

¹Jennaani jaari Efraimu waan Gideonini jed'e, Atini maanifi gaafa worra Midiani had'u deemte nu d'ossite? Atini maanifi nu iyyaamini? Worri guddo dallane hameenna arge.

²Ammo inni waan jed'e, Waan anini tolchu dandau, waan isani tolchitanini wolbira inqabani. Wonti diqooni isani worri Efraimu tolche, waan balbalti gosa tiyya tolchite ch'ufa ira jirti.

³ Qarale Waaqi hayyoota Midiani Orebufi Zeebu harka keesaniti kenne. Wonti anini tolche, ka sunini wolbira qabani, maani? Inni akasi jed'e jennaani worra dallansuuni iraa galte.

⁴Gideonifi worri isaa, ka d'ibba sadi kaani, galaana d'ufani taakani. Worri ya dad'abe ammo nyaapa reebu illakimne.

⁵Worri dira Sukothitini bahe jennaani, inni waan worra dira sunitini jed'e, D'iiro, nama kiyyaa qit'a keenna, worri ya dad'abe ammalle nu Zebafi Salmuna hayyoota Midiani reebu jira.

⁶Ammo jaaroleeni Sukothi waan jetteeni, Nu maanifi sagale duula kanketi kennina, ka isani Zebafi Salmuna ammalle inqabini?

⁷Duuba Gideonini waan jed'eeni, Haye, eegi AABBO Waaqi Zebafi Salmuna harka? kiyyati kenne anini qoraatifi gora lafa alootini isani d'aana.

⁸Gideonini dura deeme Penieli d'ufe, akasuma qarqaarsa kad'ate, ammo worri Penieli akuma worra Sukothi isani jed'e.

⁹Duuba inni waan jed'e, Hojja anini nagayaani deebie mana keesani d'eera kana ch'abse balleesa!

¹⁰Zebafi Salmunani Karkori jirani, duula ufi woliini. Nami duula, ka worra ilaboru ka hafe, nama kunki kud'ani shani ch'alla; nama kunki d'ibba tokofi diddama ch'ufa yayu ijeesani.

¹¹Gideonini kara d'aatu afaani lafa aloo deemu gula deeme. Nobafi Yogbeha ilaboru, ka worri quba inqamne, nyaapa suni had'e.

¹²Hayyooti Midiani lamaani taani, Zebafi Salmunaleeni, baqatte, ammo inni reebe worra qabe, duula worra ch'ufa mudamsiise.

¹³Ato Gideonini kara kaarra Heresi had'iisaa galu jiru,

¹⁴Inni namicha kaima toko ka Sukothi qabe, odu iraa fuud'e. Namichi sunini maqa jaarole torbatami torba Gideoni t'aafe.

¹⁵Jennaani Gideonini gara worra Sukothi deeme waan jed'eeni, gaafa na qarqaaru didani inqabataniyu isani waan jettani, Haga atini Zebafi Salmuna qabduti sagale nama kanke ka dad'abini ijeefte inkenninu jettani. Amma worri sunini kunooti!

¹⁶Jennaani inni qoraatifi gora inni lafa alooti d'ufeenini jaarole Sukothi d'aane.

¹⁷Ammalle mana d'eera Penieli kaani ch'ach'abse worra d'iira ka dira suni fit'e.

¹⁸Jennaani Gideonini Zebafi Salmuna gaafate waan jed'eeni, Nami isani Taboriti fit'ani me, Eesa jira? Worri waan jed'eeni, worri sunini si fakaata — worri ch'ufti ilma hayyu fakaata.

¹⁹Gideonini waan jed'eeni, Worri sunini oboleyaani tiyya, nu garaa taka. Anini maqa AABBO Waaqatini kakhad'a, ato, isani worra suni fit'u baatani, sila isani inijeesu.

²⁰Jennaani inni ilma isaa ka angafa Yeterini waan jed'e, Kai, worra kana ijeesi. Ammo gurbaani goraade qalqala keesaa imbafanne, ufuma eje, wonti akanatiifi inni ijoolle, insodaate.

²¹Jennaani Zebafi Salmunani waan Gideonini jed'ani, Atumaani kai, nu ijeesi, atini d'iira, d'iirti woma insodaatu. Duuba Gideonini worra hobaase faaya worri morma gaala worrati hid'u ch'ufa iraa ch'irate.

²²Eegi suni worri Israeli waan Gideonini jed'e, Hayyu keenna tahi — Sifi d'alooti kankeleeni ch'ufti. Atini ya harka worra Midiani keesaa nu baafte.

²³Gideonini waan jed'eeni, Anini hayyu keesani intahu, yokhaani ilmi kiyyaleeni hayyu keesani intahu; AABBO Waaqati hayyu keesani tahe.

²⁴Ammalle inni waan jed'e, Waan toko isani kad'ad'a, qube gurra ta boojitani ch'ufa naa keenna. (Worri Ishimaeli aka worra lafa aloo d'ibi qube worqi gurati naqata.)

²⁵Worri waan jed'eeni, Hataatuti, inuma sii kennina. Duuba woya lafati afani, nami ch'ufti qube inni boojie irati jisse.

²⁶Qubeeni worqi ta Gideonini argate biimani jennaani diquma kilo diddama hanqate, faaya mormatiifi faaya d'ibifi woya bule diimtu ta hayyooti Midiani keeyattu, yokhaani koke worri gaala worrati hid'u male.

²⁷Gideonini worqi suni fuud'e, waan aka waaqa kad'atani mid'aase, dira isaa ka Ofra keesa kaye. Worri Israeli ch'ufti waaqa lakise, achi yae woni suni kad'ate. Wonini sunini t'urura Gideoniifi worra isaati taate.

²⁸Akanaani worri Israeli worra Midiani dabsate, worri Midiani deebie worra Israeli ingargalchine. Lafti ganna afurtama, haga Gideonini jiru, nagaya argate.

²⁹Gideonini worra ufiti gale achi tae.

³⁰Inni nad'eeni heddu fuud'e ilmaani d'iira torbatama d'ale.

³¹Ammalle lafa Shekemu keesa jaalto qaba; isiini ilma d'alteefi inni ilma suni maqa Abimeleki baaseefi.

³²Gideonini, ilmi Yoashi, jaare fulla gahe due, awaala abba isaa Yoashi keesati awaalani, fulla dira Ofra ka balbala Abiezeri.

³³Eegi Gideonini due, worri Israeli Waaqa wollaale, garagale Baali kad'ate. Ammalle Baal-Berithi Waaqa tolfatani,

³⁴AABBO Waaqa isaani, ka harka nyaapa isaani ch'ufa keesaa worra baase, hojja ch'ufa didani.

³⁵Worri waan dansa Gideonini worra Israeliti tolche ded'e worra isaa galata d'owe.