Read BORANA BIBLE – KITAABA WAAQA Waan Yohanati Mullisani 5 Bible Online

Waan Yohanati Mullisani 5 - BORANA BIBLE – KITAABA WAAQA bible

Waan Yohanati Mullisani 5

¹ Anini harka nama barch'uma guddinna gubba tau kaani keesati woraqata toko ka duraafi duubale t'aafani, ka beesisa torbaani ch'ufani arge.

²Malaika guddo toko ta qonqo guddooni, Eentu beesisa ch'abse woraqata kana banu male? jettu d'agaye.

³Ammo gubbafi lafafi lafa jala keesaleti nama woraqata suni bane keesa ilaalu d'abani.

⁴Anini guddo bohe, waan nama woraqata suni bane keesa ilaalu d'abaniifi.

⁵ Jennaani jaarsi toko waan naani jed'e, Imbohiini, ilaali! Nyeench'i gosa Yuda, ka d'aloota Daudi, ya dabsate, inni beesisa torbaani ch'abse woraqata banu indandaa.

⁶ Jennaani anini Ilme Hoola, ta jiddu barch'uma guddinna ejitu arge ta waan lubbu qaba afraanifi jaaroleeni marsite. Ilmeeni Hoola waan ijeesani fakaatti. Gaafa torbaafi ila torba qabdi; isileeni lubbu Waaqa torbaani ta lafa ch'ufati ergani.

⁷Ilmeeni Hoola taani d'at'e woraqata harka mirga nama barch'uma guddinna gubba tau keesaa fuute.

⁸ Isiini akasi tolchinaani wonti lubbu qaba afraani kaanifi, jaaroleeni diddami afuri taani Ilme Hoola durati jidde. Worri ch'ufti kiraarifi qori hit'aana ta kad'acha gumi Waaqa harka qaba.

⁹ Sirba haraa sirbani, waan jed'ani: Aki atini woraqata fud'atte beesisa isi ch'absitu sii malte. Wonti akanatiifi si ijeesani, atini dua teetiini nama Waaqa bitte, gosa ch'ufaafi afaani ch'ufaafi lafa ch'ufa keesa.

¹⁰Atini ya hayyootafi qaalole worra tolchite, aka Waaqa kenna hojatani lafa fidani.

¹¹ Ammalle anini millannaani malaika kunki heddu d'agaye, ta aka kunki kunki! Barch'uma guddinnatiifi waan Lubbu qaba afraanifi jaarole marsite,

¹²qonqo guddooni sirbite waan jette: Ilmeeni Hoola ta ijeesani, jabeennaafi duroomafi qaroomafi irreefi ulfinnafi guddinnaafi faaru argachu malte!

¹³Jennaani anini waan gubba jiratiifi, ka lafa jiratiifi ka lafa jala jiratiifi, ka bisaani keesa jirale waan lafa tana keesa jira ch'ufa, ka sirba d'agaye; gara nama barch'uma guddinna gubba taufi gara Ilme Hoola. Faarufi guddinnaafi ulfinnafi jabeenni ha tahu. Haga hegeri! jed'ani.

¹⁴Wonti Lubbu qaba afraani kaani, Amini! jette, jaaroleeni lafati jidde Waaqa kad'atte.