Read BORANA BIBLE – KITAABA WAAQA 1 Samueli 30 Bible Online

1 Samueli 30 - BORANA BIBLE – KITAABA WAAQA bible

1 Samueli 30

¹Guyya sadeeso Daudifi jari isaa Ziklagini bahe. Worri Amaleki qara lafa Yuda gama bitaatifi Ziklagile had'e, ammalle worri qara dira suni gube balleese

²nad'eenile ch'ufa boojie; worri nama tokole inijeefne, ammo gaafa galani, nama ch'ufa, diqafi guddale, boojiani itiini dabatani.

³Daudifi jari isaa achini bahe jennaani, aka dira gubani, nad'eenifi ilmaani worra, ta d'iiratifi ta dubrale, boojiani argani.

⁴Daudifi jari isaa aka male bohani haga dad'abani ufi jibbaataniti lakisu didani.

⁵ Nad'eeni Daudi lachu Ahinoamufi Abigailile ya boojiani.

⁶Daudi amma ya gaargali hamaani qabate, wonti akanatiifi jari isaa ch'ufti maro ilmaani d'abeefi yayu garaani hammate ijeecha isaati malate; ammo AABBO Waaqi garaa isaa jabeese.

⁷Jennaani Daudini waan qaallicha Abiathari ka ilma Ahimelekitini jed'e, Woya aka korba hid'atani taani natiini kooti, duuba Abiatharini itiini d'ufe.

⁸Daudini AABBO Waaqa gaafate waan jed'e, Nyaapa kana reebe ind'aqaba? Inni waan jed'eeni, Reebi, atini d'aqabde worra boojianile ch'ufa iraa buufta.

⁹Jennaani Daudifi worri isaa nami d'ibba jaa kaani reebu iti d'aabatani laga Besoritini bahani jennaani nami gari achiti jalaa hafe.

¹⁰Nami artiti hafe suni nama d'ibba lama ka dad'abii laga suni taaku dad'abe. Ammo Daudini worra nama d'ibba afuri woliini reebu iti d'aabate.

¹¹Duuba worri ato yau gurba Misiri toko arge Dauditini d'ufe. Bisaanifi sagaleefi

¹²mid'aani ejersatifi dame d'unkururtu mid'aani zabibule kennanifi inni waan suni nyaate jennaani jajabaate; inni haga guyya sadi taka bisaanifi sagalele inarganne.

¹³Daudini waan jed'eeni, Atini eenu hojata? Eesaa baate? Inni waan jed'eeni, Anini nama Misiriti, ammo tisse namicha Amaleki toko, anini fayya d'abe jennaani abbaani kiyya guyya sadi ka dabre kae na biraa deeme.

¹⁴Nu lafa worra Kerethi ta lafa Yuda bitaatifi lafa worra Kalebu haane dira Ziklagile gumne.

¹⁵Daudini waan jed'eeni, Atini dandeete fulla worra nama had'e suni na geesita? Inni waan jed'eeni, Maqa Waaqatini kakhad'i, aka atini na iniijeemne yokhaani aka atini harka abba kiyya suniti na indeebimne, duuba si geesa.

¹⁶Jennaani inni Daudi fulla worraa geese, ato worri fulla ch'ufati garagari bahe sagale soorate wod'uge gammadu, maro waan heddu lafa Filistitifi ta Yuda keesa boojianifi.

¹⁷Boriyyaate ganama Daudini iti ch'abse haga aduuni d'iituti worra had'e. Nama kaima ka d'ibba afuri ka gaala yaabate baqate male nami kaani tokoleeni infiinne.

¹⁸Daudini namafi waan worri Amaleki boojie ch'ufa nad'eeni isaa lamaani woliini,

¹⁹tokole inhambimne ch'ufa iraa buuse, inni ilmaani d'iiratifi ta dubra ta jari isaa, ta worri Amaleki boojie ch'ufafi waan worri boojie d'ibile ch'ufuma iraa buuse.

²⁰Ammalle inni loonifi reele ch'ufa iraa buuse; duuba jari isaa hori suni ufi dura oofe waan jed'e, Horini kunini ka Dauditi.

²¹Jennaani Daudini fulla nami isaa, ka d'ibba lama yau dad'abe iti hafe ta laga Besoritini bahe. Jennaani worri Daudifi jara isaa fuula keesaa d'ufe, Daudileni worrati gad'ufe nagaya fuud'e.

²²Ammo nami gari ka qot'e male woma inqamne, ka Daudini woliini jiru, waan jed'e, Worri kunini nu woliini iyyaane, tanaafi worri namu ha nad'eenifi ijoolle worraa ch'alla fud'ate yauti, waan nu iraa buufne kana worri tokole woma inargatu.

²³Ammo Daudini waan jed'eeni, Isani waan AABBO Waaqi nuu kenne kana akana tolchu himmalle. Isati nu qorqorate nyaapa keenna kana nu dabsachiise.

²⁴Nami dubbi teesani ch'aqasu injiru. Nami ch'ufti qooda taka argachu male: nami miha birati hafeleeni haguma nama nyaapa had'e argachu male.

²⁵Daudini seera kana baase arti asi Israeli keesa seera sunini aada namaa tahtahe.

²⁶Daudini Ziklagiti gale jennaani inni waan boojie suni haga toko jaarole Yuda ta jaalani isaati erge waan jed'e, Tunini waan nu nyaapa AABBO Waaqaa iraa boojine, fud'ad'a.

²⁷Inni waan suni worra Bethelitifi ka Raama ka bitaa lafa Yuda

²⁸taufi worra dira Yatiritifi

²⁹ka Aroeritifi ka Sifmothitifi ka Eshtemoatifi

³⁰ka Rakatifi ka Yerameelitifi ka Kennitifi

³¹ka Hebronile, waan kana ch'ufa lafa isaafi jari isaa qara keesaa godaane erge.