Read BORANA BIBLE – KITAABA WAAQA Uumama 12 Bible Online

Uumama 12 - BORANA BIBLE – KITAABA WAAQA bible

Uumama 12

¹AABBO Waaqi waan Abramuuni jed'e, Lafa iti d'alattefi fiit'a tanteetiifi worra abbeetile lakisi, haga lafa anini si agarsiisu deemi.

²Anini ilmaani guddo sii kenna, ta gosa guddo taatu. Anini si eebise maqa dansa sii kenna, aka maqa kanketiini namaa eebisani.

³Nama si eebisu anini eeba kennaafi, ammo nama si abaaru anileeni inabaara. Si gula anini gosa ch'ufaa eeba kennaa.

⁴Ganni isaa torbatami shani gahe jennaani Abramuuni Harani keesaa godaane, akuma Waaqi jed'eeni, Lutuuni isa woliini godaane.

⁵Abramuuni niiti isaa Sarai fud'ate, Lutu ilma oboleesa isaale fud'ate, horifi tissele Harani keesati horate ch'ufa fud'ate, lafa Kanaaniti godaanaa kae. Lafa Kanaanitiini baannaani,

⁶Abramuuni godaanuma godaane, mukha woyyu ka lafa More, fulla qulqullo Shekemutiini bahe. (Gaafasi gochiti Kanaani jed'ani lafa suni keesa jirti.)

⁷AABBO Waaqi Abramuti mullate waan jed'eeni, Lafti anini ilmaani teeti kennu kuno tana. Jennaani Abramuuni artiti fulla sorio iti qalani AABBO Waaqaa, ka qara isati mullate, jaare.

⁸Eegi suni inni achii kae, lafa gaareeni ta dira Betheli moga ilaboru jirtuti qubate; fulla inni qubate suni ira Betheliini gara ila galchuuti; diri Aileeni gara ilaboruti. Achileti fulla sorio iti qalani ijaare AABBO Waaqa yaamate.

⁹Jennaani achii kae gara bitaa dabre.

¹⁰Beelti lafa Kanaani suni seente guddo hammaatte, jennaani Abramuuni lafa Misiriti godaane, aka achi tau.

¹¹Ato diquma seera Misiri intaakiinu, Abramuuni waan niiti isaa Saraiini jed'e, Atini niiti mid'aadu.

¹²Hojja worri Misiri si arge, tunini niiti isaa jed'ani, duuba na ijeesani si lakisani.

¹³ Atini, anini oboleeti isaa jed'i; duuba worri sii jed'e na lakise waan dansa naa tolcha.

¹⁴Inni seera Misiri taake jennaani worri Misiri aka niitiini isaa mid'aadu arge.

¹⁵Worri gari ka hayyu Farao jala hojatu, gara isaa d'aqe mid'aaguma isii saade; duuba isi fuud'ani worra Faraoti galchani.

¹⁶Isii jed'e hayyuuni Abramu waan dansaa tolche, reefa, loonifa, harrefa, tisseleefi gaalale kenneefi.

¹⁷Waan hayyuuni Sarai fud'ateefi AABBO Waaqi d'ukuba hama isaafi worra isaatini d'ufe.

¹⁸Jennaani hayyuuni Abramu yaame wa gaafate waan jed'eeni, Atini maani na tolchite? Maafi aka isiini niiti tanteeti nati inhimini?

¹⁹Maafi, isiini oboleeti tiyya naani jette, aka ani isi fuud'u iti na lakifte? Niitiini tante tana, fud'ad'i, na biraa deemi!

²⁰Hayyuuni nama ufii yaame waan jed'eeni, Abramufi niiti isaatiifi waan inni qabu ch'ufa lafa teenna keesaa galcha jed'e.