Read BORANA BIBLE – KITAABA WAAQA Uumama 13 Bible Online

Uumama 13 - BORANA BIBLE – KITAABA WAAQA bible

Uumama 13

¹Abramuuni lafa Misiri keesaa kae, niiti isaatiifi waan qabu ch'ufa fud'ate, Lutule woliini, lafa Kanaaniti gale.

²Abramuuni guddo dureesa, horifi qarsifi worqile qaba.

³Jennaani inni achii kae gama Betheli gula godaane. Fulla qara qubate taani, ta Bethelifi Ai jiddu,

⁴ta inni fulla sorio iti qalani jaare, gahe achiti AABBO Waaqa yaamate.

⁵Lutuleeni, ka Abramu woliini godaane, reefi loonifi worrale kama ufii qaba.

⁶Tanaafi lafti suni worra lachu wolti fuud'u dad'abde, waan worri hori guddo qabuufi.

⁷Duuba tissituuni Abramutiifi ta Lutu tikha irati woldidde. (Gaafasi worra Kanaanitiifi worri Perizi lafa suni keesa taa.)

⁸Jennaani Abramuuni waan Lutuuni jed'e, Nu fiit'a, wold'abu himmalle, yokhaani tissituuni teennaleeni woldidu himmalle.

⁹Lafa ballo si dura jirtu tana agarta? Naraa godaani. Hojja atini gara bitaa godaante, anini gara mirgaa godaana; hojja atini gara mirgaa godaante anini gara bitaa godaana. Toko filad'u.

¹⁰Lutuuni mirgaafi bitaa millate, gara galaana Yordani haga lafa Zoari ilaale, aka isiini bisaani dansa qabdu arge, akuma oobru AABBO Waaqa yokhaani lafa Misiri. (Gaafasi gaafa AABBO Waaqi Sodomafi Gomora imballeesini.)

¹¹Duuba Lutuuni arda Yordani filate gara ilaboru godaane; akasiini worri gargari bahe.

¹²Abramuuni lafa Kanaaniti qubate, ammo Lutuuni dira bale ke jiru qubate, d'aatu Sodomati waaro d'aabate.

¹³Ammo worri Sodoma worra ch'ubbicha hama, ka Waaqa durati daba tolchu.

¹⁴Eegi gargari bahani, AABBO Waaqi waan Abramuuni jed'e, Fulla jirtu tana mirgaafi bitaa gama ch'ufa ilaali.

¹⁵Lafa ati agarte tana ch'ufa siifi ilmaani teeti kenna, haga jiru jireenna teesani taati.

¹⁶Anini d'aloota kanke daraarse aka biyye tolcha; yo dandaani biyye hedani d'aloota keetile hedani.

¹⁷Kai, lafa tana haguma geetunu ke deemi, ilaalad'u, wonti akanatiifi anini ch'ufa sii kenna.

¹⁸Duuba Abramuuni kae godaane, mukeeni woyyu ta Mamre, d'aatu dira Hebroniti qubate, artiti fulla sorio iti qalani AABBO Waaqaa jaare.