Read BORANA BIBLE – KITAABA WAAQA Uumama 15 Bible Online

Uumama 15 - BORANA BIBLE – KITAABA WAAQA bible

Uumama 15

¹Eegi suni Abramuuni qonqo AABBO Waaqa ta daayya keesa iti d'ufte d'agaye. Qonqooni suni waan jette, Abramu, insodaatini, anini wonte sii tahe waan guddo sii tolcha.

²Ammo Abramuuni waan jed'e, Ee AABBO Waaqa, wonti guddooni ati na tolchitu maani naa baati, ka anini ilme inqamne? Ufuftu nami na d'aalu Eliezeri ka gosa Damaski.

³Ati ijoolle tokole naa inkennine, amma nami na d'aaluyu tissuma tiyya.

⁴Jennaani inni qonqo AABBO Waaqa ammalle d'agaye ta, Namichi kunini si ind'aalu, ilmuma kanke ka atini d'altuti si d'aala isaani jette.

⁵AABBO Waaqi isa alati baase waan jed'eeni, Me, gubbaa ilaali, yo dandeete urji tana ch'ufa hedi; ilmaani tante hagasi geeti.

⁶Abramuuni AABBO Waaqa d'ugeefate, maro d'ugefacha isaatiifi AABBO Waaqi isa maache nama d'ugaati isa herege.

⁷Jennaani AABBO Waaqi waan jed'eeni, Anini AABBO Waaqa, ka lafa Uru ta Kaldayo keesaa si baase lafa tana sii kenne.

⁸Jennaani Abramuuni waan jed'eeni, Ee Waaqa Gudda, anini akamiini beekha, aka lafti tuni tiyya taatu?

⁹Inni waan jed'e, Goromsa tokofi reeti tokofi elemo toko, ka ch'ufti ganna sadi, sabaliisa gudda tokofi diqa toko natiini kooti.

¹⁰Abramuuni waan kana ch'ufa Waaqatini d'ufe qale, fooni fulla lama ta haga taka gargari qoode gama gama naqe, ammo fooni simpirre gargari inqoonne.

¹¹Allaatini iti buute, ammo Abramuuni iraa gusse.

¹²Aduuni d'iu geennaani hiribi guddaani Abramu qabate, hiriba suni keesa inni guddo nahe rifate.

¹³ AABBO Waaqi waan jed'eeni, Hubad'u, ilmaani tante lafa imbeenne keesati keessuma taate, tisse tolchani, haga ganna d'ibba afuri aka taka inargini gaargalchani.

¹⁴Ammo anini gosa worra tissele tolchite wollaala iti mure gaargalcha; ilmaani tante, gaafa achii baatu, hori guddaani baati.

¹⁵Atini ammo ganna heddu teete, gaafa dootu awaala dansa argatta.

¹⁶Eegi d'aloota ababoota tanteeti ilmaani tante lafa tanati deebiti, wonti akanatiifi anini gosa Amori lafa tana keesaa imbaasu, haga ch'ubbuuni worraa guddatte guyyaani ani worra gaargalchu gahuuti.

¹⁷Eegi aduuni d'iite lafti dukanoofte, eele ibidaa ta aara qabdufi ifseeni bobeetu mullatte jiddu fooni kaani baate.

¹⁸Hojuma sunii achumati AABBO Waaqi Abramuuni wold'aqani waan jed'eeni, Anini lafa tana ch'ufa d'aloota keeti kenna, galaana Misiriti asi haga galaana gudda ka Frati jed'ani,

¹⁹lafa worra Keni, ta Kenizi, ta Kadmoni,

²⁰ta Hiti, ta Perizi, ta Refai,

²¹ta Amori, ta Kanaani, ta Girgashi, ta Yebusi ch'ufa kennaafi.