Read BORANA BIBLE – KITAABA WAAQA Uumama 25 Bible Online

Uumama 25 - BORANA BIBLE – KITAABA WAAQA bible

Uumama 25

¹Abrahamuuni niiti d'ibi ta Ketura jed'ani fuud'e.

²Ijoolleeni isiini d'alteefi Zimrani, Yokshani, Medani, Midiani, Ishbaki ammalle Sua.

³Yokshaniini abba Shebafi Dedani; ijoolleeni Dedani gosa Shuriti, gosa Letushitiifi gosa Leumi.

⁴Ijoolleeni Midiani Efa, Eferi, Hanoki, Abida, ammalle Eldaa. Tuni ch'uftinu haguma geetunu ijoolle Ketura.

⁵Abrahamuuni waan qabu ch'ufa Isaaqoo lakise;

⁶ammo gaafa jiru ijoolle isaa ta nad'eeni isaa d'ibiini, Sara male, d'alteefi hand'ura naqeefi. Duuba eegi suni ijoolle isaa taani ch'ufa, Isaaqo male, ilaboruti ufiraa godaanise.

⁷Abrahamuuni eegi jaare hobae, ganni isaa d'ibba tokofi torbatami shani gahe jennaani dulloome.

⁹Ijoolleeni isaa Isaaqofi Ishmaeliini goda Makpela ka diida Mamre ilaboru jiru, keesati awaalte. Diida suni duri ka Efroni ilma Sohari, ka gosa Hiti.

¹⁰Diidi suni ka Abrahamuuni duri worra gosa Hiti iraa bite; Abrahamufi Sarale achumati awaalani.

¹¹Abrahamuuni due jennaani Waaqi guddo ilma isaa Isaaqo, ka gaafasi worri isaa fulla Eela Beer-Lahai-Roi jiru eebise.

¹²Ishmaeliini, ka Hajiriini tisseeni Sara ta gosa Misiri Abrahamuu d'alte,

¹³ijoolle tana d'ale. Maqaani worra, ka aka worri wolgula d'alateeni t'aafani, kana: Nebayothi, Kedari, Adbeeli, Mibsamu,

¹⁴Mishma, Duma, Masa,

¹⁵Hadadi, Tema, Yeturi, Nafishi, Kedema.

¹⁶Ijoolleeni tunini abbooti gosa kud'ani lama, ta ollafi arda worrale ch'ufa maqa worraa gula yaamani.

¹⁷Ishmaeliini, gaafa inni due, ganni isaa d'ibba tokofi sodomi torba.

¹⁸Ilmaani Ishmaeli lafa Havilafi Shuri jiddu, d'aatu kara Ashuru, ka Misiriini ilaboru, teete. Worri ilmaani Abrahamu taani d'ibi hanqate qofa godaane.

¹⁹Oduuni tuni ta Isaaqo, ilma Abrahamu.

²⁰Isaaqooni, gaafa inni Rebeka fuud'e ganni isaa afurtama. Isiini dubra Bethueli, ka gosa Aramu, ka lafa Mesopotamia, maqaani oboleesa isiileeni Labani.

²¹Isiini ato ijoolle ind'aliini guddo deemte jennaani Isaaqooni guddo Waaqa kad'ateefi. Waaqi kad'a isaa d'agaye, Rebekaani garaachoofte.

²²Isiini lakoole garaa qabdi, ammo ato isiini ind'aliinu ijoolleeni garaa keesati wolwolaante. Rebekaani waan jette, Bada, wonti akana ka nati bue kunini maani? Duuba d'iba isii suni Waaqa gaafatte.

²³AABBO Waaqi waan jed'eeni, Gosa lamati garaa kanke keesa jira; atini ijoolle lama ta wolimfeene d'alta, toko kaani ira jaba, guddaani hojattu diqa taha.

²⁴Guyyaani ala hobae jennaani Rebekaani ijoolle lakoole lama d'alte.

²⁵Ka qara d'alate diima d'iiga, nafi dabassa, tanaafi maqa Esau baasanifi.

²⁶Ka lameeso hirba Esauti qanch'oorfate d'alate, tanaafi maqa isaa Yakobo baasani. Gaafa ijoolleeni tuni lamaani d'alatte, ganni Isaaqo jaatama.

²⁷Ijoolleeni lachu gugurdatte, Esauuni nama adamo dansa ka waan ala jaalatu tahe, ammo Yakobooni nama ch'allisa worra imbaane tahe.

²⁸Isaaqooni, ka fooni bineensa ala guddo jaalatu, Esau jaalate, ammo Rebekaani Yakobo ira jaalatte.

²⁹Guyya toko ato Yakobooni sagale d'aabachu jiru, Esauuni, ka beela qabu, adamo gale

³⁰waan Yakobooni jed'e, Anini beelaa injiru, waan diimtu d'aabu jirtu suni naa kenni. (Suni gula Esauuni Edomu jed'ani.)

³¹Yakobooni waan jed'eeni, Hojja atini angafooma kanke naa gurgurte, sii kenna.

³²Esauuni waan jed'eeni, Hayye dansa, anini ufuftu diquma beelaani induiini, angafoomi kiyya maani na bahaniti?

³³Yakobooni waan jed'eeni, Qara ato anini sagale sii inkennine kakhad'i, aka angafooma naa kennitu. Esauuni aka angafooma Yakoboo kennu kakhate.

³⁴Jennaani Yakobooni qit'afi fuutole kenneefi. Esauuni fuuto d'uge, qit'a ufii nyaate kae iti d'aabate. Akanaani Esauuni angafooma isaa tufi gula d'abe.