Read BORANA BIBLE – KITAABA WAAQA Uumama 29 Bible Online

Uumama 29 - BORANA BIBLE – KITAABA WAAQA bible

Uumama 29

¹Yakobooni imaltu isaa dabre, lafa worra ilaborutiini bahe.

²Ato deemu, eela diida keesa ka reeni karra sadi itiisa ch'iiftuuni bahe. Reeni eela suni, ka d'akha guddaani afaani ch'ufani, keesaa bisaani d'uddi.

³Hojja reeni ch'ufti achiti wolti d'ufte, tissituuni d'akha suni afaani iraa gangalchite ree bisaani obaafti. Eegi reeni bisaani d'udde, d'akha suni afaanti deebisani.

⁴Yakobooni waan tissitu ree taanini jed'e, D'iiro, isani worra eesaati? Nu worra Harani jed'aniini.

⁵Inni waan jed'eeni, D'iiro, isani Labani ilma Nahori fuula beetu? Ee, nu imbeenna jed'ani.

⁶Inni fayyuma? Ee, fayyuma, intalti isaa Raheliini ta ree gadi ooftu suni jed'ani.

⁷Yakobooni waan tissitu taanini jed'e, Lafti ammalle guyya gudda, galchumi ingeenne, ree maafi bisaani obaaftani marrati inkaamne?

⁸Tissituuni waan jetteeni, Reeni bisaani d'ugisa intaatu, haga ch'ufti wolgula d'ufte d'akha afaani eela iraa gangalchaniiti.

⁹Ato worri tae haasau, Raheliini ree abba isiitiini d'ufte.

¹⁰Yakobooni Raheli, intala abuyya isaa Labani, ta ree gadi ooftu arge jennaani kae d'akha afaani eelati gangalche ree bisaani obaaseefi.

¹¹Duuba Yakobooni isi d'ungate gammachuufi bohe.

¹²Jennaani waan jed'eeni, Anini fiit'a abbeeti, haati tiyyaleeni Rebeka. Tana d'ageennaani isiini ch'eete abbaati himte.

¹³Labaniini, aka gurbaani oboleeti isaa d'ufe, d'agaye jennaani fuula keesa yoyo ch'ee iti mamarate d'ungate mana isaatini d'aqe. Yakobooni waan kana ch'ufa iti haasae jennaani

¹⁴Labaniini waan jed'eeni, D'uguma nu worra, ammalle fooni taka. Duuba Yakobooni haga bulti sodoma worra isaa tae.

¹⁵Labaniini waan Yakobooni jed'e, Ato fiit'ale taane, akanumati na injohattu ana maani sii heregu feeta?

¹⁶Labaniini ijoolle dubra lama qaba; ta angafa maqaani Lea, maand'itiini Raheli.

¹⁷Leani guma ilaa keesa hamtu, ammo Raheliini aka taka inargini mid'aadu.

¹⁸Yakobooni guddo Raheli jaalate waan abbaani jed'e, Yo atini Raheli naa kennite, isii jed'e ganna torba si hojad'a.

¹⁹Labaniini waan jed'eeni, Fulla nama d'ibii kennu hojja sii kennu ira naa jirti, na woliini tai.

²⁰Yakobooni Raheli jed'e, ganna torba isaa hojate, ammo ganni suni womale iti infakaanne waan inni guddo isi jaalateefi.

²¹Yakobooni waan Labaniini jed'e, Anini waan atini feetu ya sii guute, fuud'a naa tolchi.

²²Jennaani Labaniini nama ch'ufa wolti yaama jila guddo tolche.

²³Ammo halkani suni Labaniini fulla Raheli Lea fuud'a Yakobootiini d'ufe, duuba Yakobooni niiti tolfate.

²⁴(Labaniini intala hojattu isaa, ta Zilpa jed'ani, Leaa kenne, aka isiini isii hojattu.)

²⁵Yo Yakobooni lafti bariinaani ufi bira millate, kuno, Leani d'aatu ch'iifti. Inni lafaa ch'ee gara Labani d'aqe waan jed'eeni, Wonti atini akana na tolchiteefi maani? Anini Raheli jed'e hojad'e, ati maafi akana na sobde?

²⁶Labaniini waan jed'eeni, Aada teenna keesa maand'a angafa durati dandaani imfuud'ani.

²⁷Haga torbaani jila kunini hobaaniti eegi, duuba intala tanale imfuuta, ammo ganna torba d'ibi naa hojatta, akasi beekad'i.

²⁸Yakobooni ee jed'e, torbaani jilaa hobaanaani Labaniini Rahelile kenneefi.

²⁹(Labaniini intala hojattu isaa ta Bilha jed'ani intala ufii Rahelii kenne, aka isiini hojattu isii taatu.)

³⁰Yakobooni Raheli niiti tolfate Lea ira isi jaalate. Ammalle ganna torba d'ibi Labani hojate.

³¹AABBO Waaqi aka Lea jibbani arginaani naheefi ilma kenneefi, ammo Raheliini ilmaani male teete.

³²Leani garaachoofte ilma deete waan jette. AABBO Waaqi ya gaargala kiyya arge naa nahe, amma d'iirsi kiyyaleeni na jaalata; tanaafi gurba maqa Reubeni baafteefi.

³³Ammalle garaachoofte ilma d'ibi deete waan jette, AABBO Waaqi ya aka na jibbani arge ilmaani d'ibile naa kenne; tanaafi maqa isaa Simeoni baafte.

³⁴Ammalle garaachoofte ilma d'ibile deete waan jette, Amma d'iirsi kiyya naraa imbahu, waan anini ilmaani sadi d'aleefi; tanaafi isiini maqa isaa Lawi baafte.

³⁵Eegele garaachoofte ilma deete, Amma anini maqa AABBO Waaqaa faarsa jette, maqa Yuda baafte. Duuba suni d'alte jennaani jidduti deemte.