Read BORANA BIBLE – KITAABA WAAQA Uumama 35 Bible Online

Uumama 35 - BORANA BIBLE – KITAABA WAAQA bible

Uumama 35

¹Waaqi waan Yakobooni jed'e, Kai, Betheliti godaani, achi qubad'u. Achiti, Waaqa gaafa atini oboleesa kanke Esau baqatte siti mullate, fulla sorio iti qalani mid'aasiifi.

²Duuba Yakobooni waan worra isaatiifi nama isa woliini jiruuni jed'e, waaqoota harkaani boch'ani, ta lafa nyaapati kad'attani taani gata ufi qulqulleesa, woya jijirad'a.

³Koota, Betheli godaane, achiti anini Waaqa ka gaafa anini d'iba qabu na qarqaare fulla anini deeme ch'ufati na wahelche, fulla sorio iti qalani mid'aasaafi.

⁴Jennaani waaqoota baanani taanifi qube gurrale baafatani Yakobooti kennani, inni gadda guddo toko ta Shekemu d'aatu jirtu jalati awaale.

⁵Yakobofi ilmaani isaa godaanaa kaani jennaani nami dira d'aatu suni keesa jiru ch'ufti sodaa reebu dad'abe.

⁶Yakobofi worri isaa ch'ufti lafa Luzu, ta amma tana Betheli jed'ani, ta lafa Kanaani keesa jirtu, d'ufani.

⁷Achiti fulla sorio iti qalani mid'aase, fulla sunii Waaqa Betheli gula El-Betheli jed'e yaame, waan Waaqi achiti isati mullateefi, gaafa inni oboleesa isaa Esau duraa baqate.

⁸Jaaritini Debora jed'ani, ta duri Rebeka guddifte, doonaani gadda d'aatu Betheli ejitu jalati awaalani. Tanaafi Alon-Bakuthi maqa baasani, akasi jechaani Gadda Boha jechu.

⁹Yakobooni Mesopotamia deebie jennaani Waaqi ammalle iti mullate eebiseefi

¹⁰waan jed'eeni, Qara Yakobo siini jed'ani, ammo armaa achi Israeli siini jed'ani. Tanaafi inni maqa Israeli baaseefi.

¹¹Waaqi waan jed'eeni, Anini Waaqa Gudda; daraari, ilmaani heddu d'ali. Gochiti hedduuni siraa uumamte, hayyooti hedduuni si keesaa baati.

¹²Anini lafa Abrahamufi Isaaqoo kenne taani siifi ilmaani teetile kenna.

¹³Duuba akasi jennaani Waaqi kae biraa deeme.

¹⁴Yakobooni fulla Waaqi dubbateeni suni d'aqe akheekha old'aabe daad'ifi d'ad'aani muude

¹⁵fulla suni maqa Betheli baase.

¹⁶Yakobofi worri isaa Betheli kaani, ato worri Efrathi ingahiinu, jii Raheli ala hobae, isii ilmeeni iti ejate, ammo ch'ininuuni turte.

¹⁷Ato ch'ininu ke jirtu, jaartini isii deesiftu waan jetteeni, Insodaatini, obsi, Raheli, ilmi d'ibileeni ya sii d'alate.

¹⁸Ammo isiini laafte ta duaa taate, ato lubbuuni keesaa imbahiinu gurba maqa Benoni baafteefi ch'ichite; ammo abbaani maqa Benjamini baaseefi.

¹⁹Akanaani Raheliini doote d'aatu kara Efrathi, ka amma Bethlehemu jed'aniti, isi awaalani.

²⁰Yakobooni d'akha akheekha achi d'aabe, d'akhaani suni haga arrale awaala Raheli garsiisa.

²¹Yakobooni ammalle godaane doofi Ederiti qajeele achi qubate.

²²Ato Israeliini lafa suni keesa jiru, Reubeniini niiti jaalto abba isaa ta Bilha jed'ani barate; duuba Israeliini waan kana d'agaye aka hama dallane. Yakobooni ilmaani d'iira kud'ani lama qaba.

²³Ilmaani Lea Reubeni (ka angafa Yakobo), Simeoni, Lawi, Yuda, Isakari ammalle Zabuloni.

²⁴Ilmaani Raheli Yusufufi Benjamini.

²⁵Ilmaani hojattu Raheli, ta Bilha jed'ani, Danifi Naftali.

²⁶Ilmaani hojattu Lea, ta Zilpa jed'ani, Gadifi Asheri. Ijoolleeni tunini ch'ufti Mesopotamiati d'alatte.

²⁷Yakobooni gara Mamre, ta d'aatu Hebroni, lafa duri Abrahamufi Isaaqooni taani, gara abba isaa d'aqe.

²⁸Ka jaare fullaa gahe, Isaaqooni ganna d'ibba tokofi saddeetamati dulloome. Ilmaani isaa Esaufi Yakobooni isa awaalte.