Read BORANA BIBLE – KITAABA WAAQA Uumama 41 Bible Online

Uumama 41 - BORANA BIBLE – KITAABA WAAQA bible

Uumama 41

¹Eegi ganni lama dabre, Faraoni oobjate, oobju suni keesati aka d'aatu galaana Nile eju ufi arge.

²Duuba looni gagabbooni mimid'aagooni torba galaana keesaa bahani d'aatu d'eedani.

³Jennaani looni torba d'ibileeni haaluuni goblooli, galaana keesaa bahani looni gagabbo kaani bira afaani galaana ejaanjani.

⁴Looni haaluuni suni looni gagabbo kaani nyaatani hobaasani. Eegi suni Faraoni damaqe.

⁵Ammalle iriibati deebie maro lameeso oobjate mid'aani toko ka mata torba qaba, ka ch'ufti mid'aani ilaa bilchaato qaba arge.

⁶Jennaani mataani torba d'ibiini qaqallaani, ka bubbeeni owituuni lafa alooti d'ufte d'oofte gubde gadi bahe;

⁷mataani qaqallaani kaani, ka ila qabu, mimid'aago kaani liqimse. Hayyuuni damaqe, aka wonti sunini ch'ufti oobju arge.

⁸Lafti bariinaani waan oobjate kaani d'ind'ise, worra wa himufi worra qaqaro, ka lafa Misiri keesa jiru, ch'ufa wolti yaame waan oobju ufii iti haasae, ammo nama waan isii himu d'abani.

⁹Jennaani gololchituuni daad'i kaani waan Faraoni jed'e, Arra wollaala kiyya ya qaabad'e.

¹⁰Gaafa atini naafi d'aabdu qit'ati dallante mana gudda askarti keesati nu hite,

¹¹halkani toko nu lachu oobjanne, oobjuuni teenna waan waan himte.

¹²Gurba kaima tokoti, ka gosa Ebrania, ka hojattu gudda askarti, gaafasi nu woliini jira; duuba oobju teenna iti himne jennaani waan isiini d'ooftu nuti hime.

¹³Akuma inni hime suni taate; na huji tiyyati na deebisani, ammo d'aabdu qit'aa kaani mukhati fannisani.

¹⁴Jennaani Faraoni nama erge, Yusufu hurrisa boola hid'aansa suni keesaa fuud'a, kootaani jed'e. Yusufuuni areeda haadate woya jijirate Farao dura d'ufe.

¹⁵Jennaani Faraoni waan jed'eeni, Anini oobju oobjad'e, ammo nama waan isiini d'ooftu nati himu d'abe; aka atini waan oobju himtu ya d'agaye, tanaafi si yaame.

¹⁶Yusufuuni waan jed'eeni, Aabbo kiyya, anini himu indandau, ammo Waaqumati himaansa dansa sii kenna.

¹⁷Duuba Faraoni waan jed'eeni, Ani oobjad'e, oobju tiyya keesa d'aatu galaana Nile eja.

¹⁸Yo ani jed'e, looni torba gagabbooni mimid'aagooni galaana keesaa bahani afaani galaana d'eedani.

¹⁹Jennaani looni torba d'ibiini haaluuni goblooli, ka ani taka lafa Misiri keesati inargini, faana kaani d'ufani.

²⁰Looni haaluuni kaani looni gagabbo kaani nyaatani hobaasani;

²¹yo ani jed'e, akuma qara kaani huqo, woma iraa inhiinne, nami tokoleeni dandae, Looni kaani ya nyaatani injed'u. Jennaani damaqe.

²²Ammalle iriibati deebie maro lameeso oobjad'e, mid'aani toko ka mata torba qaba, ka ch'ufti mid'aani ilaa bilchaato qaba arge.

²³Jennaani mataani torba d'ibiini qaqallaani, ka bubbeeni owituuni lafa alooti d'ufte d'oofte gubde, mid'aanuma kaani iraa bahe,

²⁴mataani qaqallaani kaani mid'aani ilaa bilchaato kaani liqimse. Oobju tana lachu worra wo himuti haasae, ammo tokoleeni waan isi nati himu dad'abe.

²⁵Yusufuuni waan Faraoni jed'e, Oobjuuni tante lachu waan taka himti; Waaqi ya waan tolchu fed'u si beesise.

²⁶Looni gagabbooni kaani torbaani ganna torba, mataani mid'aani ilaa torbaani kaanileeni ganna torba. Oobjuuni tunini woma taka.

²⁷Looni haaluuni torbaani kaani, ka faana looni kaani d'ufanifi mataani qaqallaani torbaani bubbeeni owituuni lafa alooti d'ufte d'oofte gubde kaani ganna torba ka beela.

²⁸Akuma anini siini jed'e kaani, Waaqi waan tolchu fed'u la si garsiise.

²⁹Lafa Misiri keesa ganna torba ka quufa guddati d'ufa.

³⁰Eegi suni ganna torba d'ibi ka beela, ka quufa sule ch'ufa nama deesisuti d'ufa. Beelti suni lafa balleesite

³¹ganna quufa suni nama deesifti, waan beelti faana d'uftu sunini guddo hamtutiifi.

³²Wonti oobjuuni tante lama taateefi, Waaqi ya waan kana mure buufate, d'iotu tolcha.

³³Amma duuba nama qaro malticha fohad'i, finna lafa Misiri ch'ufa harka isaati deebisi.

³⁴Jara d'ibi ka isa jala hojatule tolchi, haga ganna torba ka lafti quufa qabdu, mid'aani argatani keesa, kintaala shani keesaa, toko olkayi jed'iini.

³⁵Mid'aani ganna quufa ka gad'ufu kana dira ch'ufa keesati wolti guura, fulla tokoti jabeesa olkaya, badi d'owa jed'iini.

³⁶Sagaleeni olkayani suni, gaafa ganni torbaani beela ka lafa Misiriti d'ufu, nama ch'ufa geete, akanaani biyya sila beelaani dootu duu d'owarti.

³⁷Mali Yusufuuni d'aefi kunini Faraofi hojattu isaa quubse.

³⁸Faraoni waan jed'eeni, D'iiro, nama Yusufu ira jiru, ka lubbuuni Waaqaa ke jirtu, inarganna?

³⁹Duuba Faraoni waan Yusufuuni jed'e, Eegi Waaqi waan kana ch'ufa si garsiise, nami tokoleeni ka aka kanke malafi qaroomale qabu injiru.

⁴⁰Anini gudda lafa tiyya ch'ufa sii tolche, nami kiyya ch'ufti si ch'aqasa. Ana male nami tokoleeni si dura injiru.

⁴¹Amma tana gudda lafa Misiri ch'ufa la si tolche.

⁴²Duuba Faraoni qube baafate quba Yusufuti kaye, woya boofta uyiseefi, looti worqi mormati kayeefi.

⁴³Gaari fardi hirkisu ka mid'aaguma ka hayyuti aanu kenneefi, nama isa dura yae lalabe, Duraa gora! Dura gora! jed'u tolcheefi. Akanaani Yusufuuni gudda lafa Misiri ch'ufa tolchani.

⁴⁴Faraoni waan jed'eeni, Anini hayyu lafa Misiri; nami tokoleeni waan atini inquufiini intolchu.

⁴⁵Inni Yusufu maqa afaani Misiri Safenath-Panea baaseefi, ammalle intala Asenathi jed'ani, ta dubra Potifa qaallicha dira Oni, fuusise. Gaafa Yusufuuni huji Farao seene ganni isaa sodoma. Duuba Farao biraa deeme arda Misiri ch'ufa keesa imaltu d'aqe.

⁴⁶

⁴⁷Gaafa ganna torbaani quufaa kaani, lafti aka taka inargini mid'aani baafte;

⁴⁸duuba Yusufuuni mid'aani suni ch'ufa wolti guure dira lafa suni ch'ufa keesati olkaye. Dira suni ch'ufa keesa inni mid'aani d'aatuti bahe olkaye.

⁴⁹Yusufuuni mid'aani haga inqamne, ka aka biyye tana, wolti guure, eegee hedule dad'abani.

⁵⁰Ato ganni beela ingahiinu niitiini Yusufu, ta Asenathi jed'ani taani, ijoolle lama d'alteefi.

⁵¹Inni much'a angafa maqa Manase baase waan jed'e, Waaqi ya gaargala kiyyafi worra kiyya na deesise.

⁵²Ka maand'a maqa Efraimu baaseefi waan jed'e, Waaqi ya lafa anini keesa gaargale keesati na daraarse.

⁵³Lafa Misiri keesati ganni torbaani quufaa kaani dabre,

⁵⁴akuma Yusufuuni jed'e ganni torbaani beelaa kaani d'ufe. Lafa Misiri male lafti d'aatu taani ch'ufti beelaani badde.

⁵⁵Eegee lafa Misirile beelti seente, duuba Farao d'aqani, Sagale nuu kenna jed'ani. Faraoni waan jed'eeni. Beena, gara Yusufu d'aqa, waan inni isani tolchu taha.

⁵⁶Beelti hammaatte lafa ch'ufa qabatte jennaani Yusufuuni mana mid'aani keesa olkayani kaani ch'ufa bane worra lafa Misiriti mid'aani gurgure.

⁵⁷Maro beelti guddo jabaatteefi, nami lafa ch'ufa keesa lafa Misirii d'ufe, aka sagale Yusufu iraa bitatu.