Read BORANA BIBLE – KITAABA WAAQA Uumama 42 Bible Online

Uumama 42 - BORANA BIBLE – KITAABA WAAQA bible

Uumama 42

¹Yakobooni aka mid'aani Misiri jirani d'agaye jennaani waan ilmaani isaatini jed'e, Isani maani ufumaa ch'iiftani woli laaltani?

²Lafti Misiri mid'aani qabdi d'agaye, achi d'aqa nu bita, aka nu garaachaani inhobaane.

³Duuba oboleyaani Yusufu kud'ani lafa Misiri mid'aani bitachu d'at'e.

⁴Ammo Yakobooni Benjamini, ka Yusufuuni garaa, Nagayaani nati ingalu karaati wo taha jed'e, oboleyaani isaa gula ergu dide.

⁵Akanaani ilmaani Yakobo, waan lafa Kanaanile beelti seenteefi, biyya d'ibi woliini mid'aani bitachu d'ufte.

⁶Yusufuuni, ka gudda lafa Misiri nama lafa ch'ufa keesaa d'ufe mid'aani iti gurgure. Jennaani oboleyaani isaa d'ufte durati lafaa gajejette.

⁷Yusufuuni oboleyaani isaa arge beekhe, ammo nama imbeenne ufi tolche, dubbini woworaane, Isani eesaa d'uftani? jed'e. Nu lafa Kanaaniti lafa tana sagale bitachu d'umne, jed'aniini.

⁸Ato Yusufuuni oboleyaani isaa fuula beekhele, worri isa fuula imbeenne.

⁹Yusufuuni oobju waan worra oobjate taani qaabate waan jed'eeni, Isani lafa tana dooya d'uftani, aka lafti teenna woma inqamne laalu d'uftani?

¹⁰Aabbo, akananiti, nu hojattu tanteeti, sagale bitachu d'umne.

¹¹Nuuni ch'ufti oboleyaani, nu nama d'ugaati, hameenna womaatifu ind'umne jed'aniini.

¹²Inni waan jed'eeni, Lakisa, akasiniti, isani akuma lafti woma inqamne laalu d'uftani.

¹³Worri waan jed'eeni, Nu oboleyaani kud'ani lamaati, Aabbo, ilmaani abba toko, lafa Kanaani keesati. Maand'ichi aabbo birati hafe, ammo toko injiru.

¹⁴Yusufuuni waan jed'eeni, Akuma ani qara jed'e, laki, isani dooya.

¹⁵Kara kanaani d'uga teesani laala: anini maqa Faraotiini kakhad'a, aka isani haga oboleesa keesani diqaani d'uftaniti armaa iyyaane.

¹⁶Isani nami toko deema, isa fuud'a, isani kaani inhid'ani, haga d'uga dubbi teesani arganiti. Yokhaani Maqa Faraotiini kakhad'a, isani dooyuma.

¹⁷Duuba haga guyya sadi worra hid'e.

¹⁸Guyya sadeeso Yusufuuni waan jed'eeni, Waan isani taatani, anini Waaqa sodaad'a.

¹⁹Yo isani nama d'ugaa taatani, nama toko hid'aansa keesati lakisa; isanini kaani sagale bita, worra keesani, ka garaachi fit'e, sunitini gala.

²⁰Duuba oboleesa keesani ka maand'atiini nati koota, aka akanaani d'ugaani teesani mullatte dooti isanii hanqattu. Worri dubbi tana ee jed'e

²¹waan woliini jed'ani, Me laala, nu gati daba keenna argachu jirra, ta gaafa nu oboleesa keenna dabsine, inni gaafasi naasu nu kad'ate, nu ammo nahuufi dinne; tanaafi amma gaargali kunini nu qabate.

²²Reubeniini waan jed'e, Anini gaafasi, Waan tokole isa intolchina jed'e, ammo na ch'aqasu diddani. Amma gati d'iiga isaatiifi nu gaargalchani.

²³Yusufuuni waan worri jed'e hubate, ammo worri aka inni hubate imbeekanne, waan afaani worra isaa deebisanifi.

²⁴Yusufuuni worra biraa garagale bohe. Jennaani iti deebie worrani haasae Simeoni fuud'e fuula worra durati harkaafi miila wolti hid'e.

²⁵Yusufuuni hojattu ufii yaame, Subba worra mid'aaniini guuta, duuba nama ch'ufa beese isaa subba isaati deebisaafi woreegale kennaafi jed'eeni; worri akasuma tolche.

²⁶Oboleyaani taani mid'aani harreleti faate gala kaate.

²⁷Fulla bultiti worri nami toko harre mid'aani kenna subba ufii hiikhe jennaani beese qara mid'aaniini bitate taani keesati arge.

²⁸Oboleyaani ufiiti iyye, Kuno, beese tiyya ya naa deebisani, afaanuma subbaa teeti jed'eeni. Worra lubbuuni d'ufte, holatani waan woliini jed'ani, Aard'aa, isii Waaqi maani nuti buuse?

²⁹Lafa Kanaaniti gara abba galani, waan tahani argani ch'ufa iti himani waan jed'ani,

³⁰Guddaani lafa Misiri dubbi jajabdu nuuni jed'e nuti kae, Isani dooya lafa tiyya d'uftani nuuni jed'e.

³¹Nu dooyaniti, nama d'ugaati jenne dinne.

³²Nu qara oboleyaani kud'ani lamaati, abba tokotu nu d'ale, oboleesi keenna toko injiru, ammalle maand'ichi lafa Kanaani abba keenna birati hafe jenne.

³³Ammalle namichi waan nuuni jed'e, Aki anini d'uga teesani argu akana: isani nami toko ha na woliini hafu, isaniini kaani mid'aani fud'ad'a worra keesani, ka beelti balleesite suniti geesa.

³⁴Ammo oboleesa keesani natiini koota, akanaani aka isani dooya intahiini, nama d'uga, beekha. Duuba yo suni, oboleesa keesani isanii deebise, isani yo feetani lafa tana teetani bunat'ani nuuni jed'e.

³⁵Jennaani yo worri subba ufii hiikhe mid'aani keesaa jisse, kuno, beeseeni worri biteeni taani tana. Beese arginaani worrafi abbaaleeni nahani bakhakhani.

³⁶Abbaani waan jed'eeni, Isani aka anini ilmaani tiyya ch'ufa d'abu feetani? Yusufuuni injiru, Simeonileeni injiru, amma Benjamini harkaa na fuud'u feetani? Jireenni ya na hammaate.

³⁷Jennaani Reubeniini waan jed'eeni, Yo anini Benjamini siti ingaliini, ilmaani tiyya lamaanu fit'i; isa harka kiyyati lakisi, natu sitiini gala.

³⁸Ammo Yakobooni waan jed'eeni, Gurbaani kiyya isani gula indeemu, oboleesi isaa qara due, isa ch'allati hafe. Hegeri karaati wo taha, anini ya jaare hobae, lubbu isaa dandae iraa inhafu.