Read BORANA BIBLE – KITAABA WAAQA Uumama 47 Bible Online

Uumama 47 - BORANA BIBLE – KITAABA WAAQA bible

Uumama 47

¹Jennaani Yusufuuni oboleyaani isaa shani fud'ate gara Farao d'aqe waan jed'eeni, Abbaafi oboleyaani tiyya ya lafa Kanaaniti ree, looni, waan qabani ch'ufa guuratani d'ufani, ammatana lafa Gosheni jirani.

²Duuba inni oboleyaani isaa suni Farao agarsiise.

³Faraoni waan jed'e, Hujiini teesani maani? Aabbo, nu tissitu akuma abbooti teenna.

⁴Lafa Kanaani la beelti balleesite, mari horiini d'eeduleeni injiru, tanaafi lafa tanati godaanne. Aabbo si kad'anna, lafa Gosheni keesa nu qubachiisi jed'aniini.

⁵Jennaani Faraoni waan Yusufuuni jed'e, Eegi abbeetiifi oboleyaani tante armaani baate,

⁶lafti Misiri tama worraati. Arda Gosheni, ka lafa Misiri ch'ufa ira dansaa, ha qubataniti. Ammalle yo nami beekha qabu, ka wo guutu, worra ke jiraate, hori kiyyale harka worrati kenni.

⁷Jennaani Yusufuuni abba isaa Yakobole Faraotiini d'ufe, Yakobooni Farao eebise.

⁸Hayyuuni, Ganni ke amma hagami? jed'e gaafate.

⁹Yakobooni waan jed'eeni, Anini haguma d'alad'e gudduma lafa keesa godaane, waan ani sehu ganni kiyya amma d'ibba tokofi sodoma inuma gaha. Anini haga abbooti tiyya ganna d'eera inteenne, ganni kiyya gabaaba, gabaabani kunileeni ka gaargalaati.

¹⁰Akasi jennaani Yakobooni Farao eebise, Nagayaati jed'e biraa deeme.

¹¹Jennaani Yusufuuni abbaafi oboleyaani isaa akuma hayyuuni jed'e lafa lafa Misiri keesa ch'ufa ira dansaa, ta d'aatu dira Ramesesi, qubachiise.

¹²Duuba Yusufuuni sagale abba isaatiifi oboleyaani isaatiifi ammalle worra abba isaa ch'ufa, ijoolle didiqole ch'ufa kenneefi.

¹³Duuba beelti jabaatte, sagale fulla ch'ufa d'abani; worra Misiritiifi ka Kanaanile beelti laafifte.

¹⁴Yusufuuni beese lafa Misiritiifi ta lafa Kanaani, ta mid'aaniini bitani ch'ufa wolti guure mana Farao geese.

¹⁵Eegi beeseeni worraa lafa Misiritiifi Kanaani ch'ufti hobaate, worri Misiri Yusufuti d'ufe waan jed'eeni, Sagale nuu kenni, duu nu d'owi. Beeseeni teenna la nuraa hobaate.

¹⁶Yusufuuni waan jed'eeni, Yo beeseeni isani iraa hobaate fulla isii horiini koota, sagale isanii kenna.

¹⁷Duuba hori ufii Yusufutiini d'ufani, inni farda, ree, looni, harrele ch'ufa iraa guure sagale kenneefi. Ganna suni ch'ufa akanuma hori iraa guure sagale kenneefi.

¹⁸Ganni suni hobae jennaani ammalle fulla isaa d'ufani waan jed'aniini, Aabbo, wonti si d'ossinu injirtu, beeseeni ya nuraa hobaate, horiini keenna ch'ufti amma keeti. Sai toko nu dura ineju, lubbufi oobru male waan d'ibi ka si baamnu inqamnu.

¹⁹Duu nu d'owi, lafa teennale badi d'owi, nufi oobru teenna bitad'i, sagale nuu kenni. Nu tisse Farao taane, lafti teennaleeni ta isaa taati. Mid'aani nu nyaannufi sanyi oobru keesati fach'aamnule nuu kenni, aka nu indoone.

²⁰Duuba Yusufuuni waan oobru jed'ani ch'ufa Farao bite. Wonti akanatiifi nami lafa Misiri ch'ufti, maro beelti hammaatteefi, oobru ufii gurgurate, lafti haguma geetuuni ta Farao taate.

²¹Yusufuuni nama lafa Misiri muumme tana fuud'e taaniti d'aabe, ch'ufa tissele Farao tolche.

²²Lafti inni imbitiini lakise, ta qaalole ch'alla. Wonti worri oobru ufii ingurguriinifi waan hayyuuni jiati wo hereguufi.

²³Yusufuuni waan biyyaani jed'e, Ilaala, isanifi lafa teesanile ya hayyuuni bite. Hod'a, sanyi tana fuud'a, oobru fach'aasa.

²⁴Hojja mid'aani murani kintaala shani ka isani argattani ch'ufa keesa, toko Farao kenna. Ka hafe gama toko sanyi tolfad'a, kaani isanifi ilmaani teesani nyaad'a.

²⁵Worri waan jed'e, Aabbo, ya lubbu nuu baafte, waan atini jettu ch'ufa ya quumne, tisse Farao nu tolchi.

²⁶Duuba Yusufuuni seera lafa Misiriti baase waan jed'e, Kintaala shani ch'ufa keesa toko ha ka hayyu tahu. Seeri kunini haga arrale inuma jira. Oobru qaalole qofati ta hayyuu intahiini.

²⁷Gochiti Israeli lafa Misiri arda Gosheni keesa teete achiti horte daraarte ilmaani heddu d'alte.

²⁸Yakobooni lafa Misiri keesa ganna kud'ani torba tae, duuba akanaani ganna d'ibbafi afurtami torba guute.

²⁹Guyyaani gabaabate jennaani ilma ufii Yusufu yaame waan jed'eeni, Harka kanke jiddu gudeeda kiyya keeyad'i, aka lafa Misiri keesati na inawaalle kakhad'i.

³⁰Fulla abbooti tiyya iti awaalaniti nale awaali; lafa Misiri tana keesaa na fuud'i, fulla worra iti awaalaniti na awaali.

³¹Yusufuuni waan jed'eeni, Ee, iti kakhad'a. Yusufuuni iti kakhate jennaani Yakobooni galata Waaqaa deebise gach'iise.