Read BORANA BIBLE – KITAABA WAAQA Uumama 49 Bible Online

Uumama 49 - BORANA BIBLE – KITAABA WAAQA bible

Uumama 49

¹Jennaani Yakobooni ilmaani isaa ch'ufa wolti yaame waan jed'eeni, Me, wolti gadi hiiqa, waan hegeri taha isaniti hima:

²Wolti koota, d'agaya, ee ilmaani Yakobo; waan abbaani keesani Israeliini jed'u ch'aqasa.

³Reubeni, atini angafa kiyya, irre tiyya, uumama qara ka gudeeda kiyya, kiyyibafi irreeleeni worra kana ch'ufa ira jirta.

⁴Atini lola yau fakaatta, ka nami indandeenne, ammo atini worrati gudda intaatu, waan gulanta takarfatte sire abbeeti d'at'e waan fafa taateefi.

⁵Simeonifi Lawiini oboleyaani. Woraana ufitiini nama had'ani balleesani.

⁶Anini haasaa worraa keesa inseenu, yokhaani kora worraale ind'aqu, waan dallansu keesa nama ijeesani taba keesa sangoole mogolchaniifi.

⁷Dallansuuni worraa guddo hamtu, miri worraa diqa, naasule inqabani. Waaqi ha worra abaaru. Anini gosa Yakobo keesa worra gargari qoode, lafa Israeli keesa gargari firfirsa.

⁸Yuda, oboleyaani tante si saaddi. Atini nyaapa kanke qabde uuta. Oboleyaani tante si durati gajetti.

⁹Yudaani kuble nyeench'aa fakaata, ta bineensa nyaatte kaate biraa deemtu. Yo isiini dirirfatte ch'iiftu, eentu dandae kaasa?

¹⁰Ororooni inni namaani fidu harkaa imbuutu, lichooni hayyumaa worra isaa keesaa imbaatu, haga abbaani damoosa baasanifi d'ufe isa durati gajed'ani saalfatanifiiti.

¹¹Inni harre ufii mukha zabibuti hid'a, bukhurale zabibu ira dansati hid'a. Inni woya ufile daad'i diimtu zabibutiini miich'ata.

¹²Ilti isaa daad'i zabibutiini diimatte, ilkaani isaaleeni aananiini addaatani.

¹³Zabuloniini afaani baariini qubata; hobolooni ch'ufti fulla isaa galti; seeri arda isaa Sidoniti muumme baha.

¹⁴Isakarini harrele iraa ingoomu, ta qaraqabaani gach'iiftu.

¹⁵Inni fulla gadi ch'iise dansa arge lafa sunile maacha. Tanaafi gadi jed'e miha duddati deefate, akuma tisse namaa hojata.

¹⁶Daniini gosa ufii fide, worri akuma gosa d'ibi Israeli keesa jirtu taha.

¹⁷Daniini bofa kara keesa ch'iisu fakaata, buuti dandi keesa ch'iiftu, ta yo fardi d'ufu kotte nyaate nama yaabatu duddaduubati buuftu.

¹⁸Anini baafama kanke eegachuu jira, ee AABBO Waaqa.

¹⁹Shiftati Gadi had'a, ammo inni iti garagale had'e d'eechisa.

²⁰Lafti Asheri waan dansa baafti. Inni sagale hayyuu malte namaani gololcha.

²¹Naftaliini hiddi diida keesa fiiddu, ta ilmaani mimid'aadu d'altu.

²²Yusufuuni harre diidaa, ta madda d'aatu ejitu fakaata, inni bukhura sokhara gaara deemu.

²³Nyaapi isaa guddo isaa had'e, guubefi t'iyaani reebe.

²⁴Ammo guubeeni isaa inchochoone, harki isaaleeni jabeenna qaba, ka Waaqi Guddaani ka Yakobo kenneefi, yokhaani ka Tissaani Jabaani Israeli tolcheefi.

²⁵Ka si qarqaaru Waaqa abba keetiti, ka si eebise bisaani gubbatiifi ka maddaa sii kennu Waaqa Gudda. Eebiti tunini ta hormaatafi bultuma,

²⁶ta mid'aanitifi ta daraara, ta gaareeni haguma duriti jirtutiifi Kubile haga jiru jireenna achuma jirtu iraa d'ufte. Eebiti tuni ch'ufti ha mata Yusufu gubbaa jiraattu, isa ka oboleyaani isaa keesaa fohatani.

²⁷Benjaminini yai hamtu, ta halkanifi guyya ijeefte wo nyaattu.

²⁸Worri kunini gosa kud'ani lama ta Israeli; ammalle wonti abbaani worrani jed'e gaafa Nagayaati jed'e eebiseefi suni.

²⁹Jennaani Yakobooni ilmaani isaati d'aamate waan jed'eeni, Anini ammatana fulla d'ugaa d'aqa; goda oobru Efroni ta gosa Hiti, Makpelati, ta Mamreeni ilaboru lafa Kanaani keesa, fulla abbooti tiyya iti awaalaniti, na awaala. Godaafi oobru suni Abrahamuuni Efroni iraa bite, aka nama isaa keesati awaalu.

³¹Achiti Abrahamufi niiti isaa Sara awaalani; achiti Isaaqofi niiti isaa Rebeka awaalani; ammalle artumati anileeni Lea awaale.

³²Oobrufi goda keesa jirule gosa Hiti iraa bitani; achumati na awaali.

³³Yakobooni d'aamsa kana ch'ufa ilmaani ufiiti d'aamannani miila sire gubbati olguurate, gadi ch'iise ch'ich'e, fulla d'uga ta worra due d'aqe.